E fundit!

19:42 Aktualitet

52 ditë protestë kundër qeverisë/ Qytetarët marshojnë drejt Kryeministrisë

Në sheshin “Skënderbej” janë grumbulluar qytetarët për pro...

Lëmshet që duhet të zgjidhë Lulzim Basha

11 Prill 2016, 07:42, Aktualitet CNA

Ndoshta është vështirë të zgjidhësh një lëmsh kur ai ngatërohet, por kur bëhen shumë dhe ngatërohen me njëri-tjetrin është edhe më vështirë.

Kryetari i Partisë Demokratike Lulzim Basha është sot përballë shumë lëmsheve në partinë e tij. Lëmshe që fillojnë nga klanet, mungesa e organizimit, braktisja e ideve dhe aksioneve, paaftësia e krerëve të degëve, përlasja me grupin parlamentar, mos funksionimi i strukturave e kështu me rradhë.

Në fakt këto nuk lindën në një ditë, por u krijuan në gati 3 vite drejtim të PD-së nga Basha. Jo se nuk kanë ekzistuar, por Berisha ishte mjeshtër për të zgjidhur çdo lëmsh që i ngatërohej nëpër këmbë, apo i jepte zgjidhje duke bërë lëmsh diçka tjetër që atij i interesontë për të mbajtur bashkuar interesat rreth tij dhe PD-së.

Klanet dhe përplasjet duken që kanë hequr cdo maskë në PD. Të rinj apo gjoja të rinj deklarojnë se ?Iku koha e gjyshit?, gjyshi është Berisha deklarimin e ka bërë Fatbardh Kadilli serkretar i Burimeve Njerëzore. Ish-këshilltar i Berishës që në 8 vite nuk e thirri kurrë në zyrë, merr post politik, fillon intriga dhe përplasje mes brezash, i pasuar nga grupi i Genc Pollos që ka Enno Bozdon, Kreshnik Collakun etj, grupi i UET-it që ka Grida Dumën, Ervvin Salianjin etj. Një lëmsh që më shumë sesa përplasje brezash duket çarje e thellë që vjen nga morali, kush i serviloset dhe i lëpihet Bashës, duke mos bërë asnjë punë por vetëm duke cicëruar në ekrane dhe pjesa dinjitoze që vlerëson punën dhe kontributet me rezultate konkrete dhe jo me sharlatanizma.

Idetë dhe aksionet e PD-së këto gati 3 vite në opozitë, po ti analizosh dalin ?beteja me mullinjtë e erës?. Don Kishotizëm politik, në rast se do shohim kauzat e nisura dhe të braktisura rrugës. Betonizimi i Liqenit është rasti më I fundit, pas dy përplasjeve opozita e braktisi betejën. Flet për dekriminalizim, një betejë e filluar nga Jozefina Topalli, por e stërzgjatur për shkak të përdredhjeve të mazhorancës por edhe të opozitës. Asnjë kauz, asnjë rezultat në tre vite.

Departamentet kanë drejtues në qendër, por stafi dhe pjesmarrja është e vogël. Nuk mjafton vetëm pasioni I disa njerëzve, ku jo të gjithë duket të jenë në aksion dhe veprim. Në qëndër disa prej tyre vetëm kanë emrin dhe nuk bejnë asnjë punë, ose puna e tyre e ka vlerën 0. Sa për departamente apo struktura të tyre në degë ato janë thjesht disa letra që i përgatisin kryetarët e degëve për të gënjyer Lulzim Bashën, apo Ennot dhe Kadillrat që bëjnë sikur lexojnë letra.

Në degët e PD-së paaftësia e krerëve të saj, apo zgjedhje me preferencën e Bashës ka ndërtuar lëmshe që Basha vështirë se mund ti zgjidhë. Përplasje klanore ka në Vlorë ku kreu i degës nuk pranon në seli Arben Ristanin, sekretar i Përgjithshëm i PD-së. Në Sarandë përplasja është më e ashpër në 3 vite kryesia nuk ka pasur asnjëherë korum. Në Gjirokastër, Korcë, Fier Berat, Shkodër, vazhdojë konfliktet dhe ndarjet që sa vijnë dhe thellohen. Aktivitetet e 2 prillit në Shkodër ishin sinjal I fortë alarmi për gjendjen që kalon PD-ja në bastionin e saj kryesor.

Grupi Parlamentar i PD-së, vazhdon të ketë përplasje zyrtare me Bashën, ide dhe qëndrime të kundërta. Askush nuk e pranon më kryetarin e PD-së me një copë letër të shpallë vendimin në fillim të mbledhjes dhe më pas të fillojë diskutimet. Aksioni, qëndrimet dhe veprimet janë pa pëlqim midis palëve por vijnë thjesht si veprime rastësore. PD bllokoi dy seance parlamentit dhe ju rikthye atij normalisht pa asnjë fitore, duhej përplasja me deputetin socialist Erjon Brace që PD të rikthehej në bllokim seance.

Strukturat në bazë duken të tërhequra, jo nga represioni qeveritar por nga mungesa e besimit tek PD-ja. Kjo për faktin se selitë e PD-së në rrethe kanë pasur më shumë njerëz në vitin e prapshtë 1997 apo 1998 dhe jo sot, kur nuk mohojmë presionin qeveritar, por frika është vrarë.

Fakti që nuk ka pjesmarrje vjen nga mungesa e besimit tek opozita e cila do bëjë ciklin e saj, por kjo duhet të jetë e shpejtë dhe me baza të forta. Në rast se braktiset kauza, në degë nuk ndërhyn për zgjidhjen e problematikave, në disa qytete kryetarët dhe strukturat flenë gjumë, mjaftohen me një konferencë shtypi në 6 muaj, përplasjet e brendshme vazhdojnë të gryejnë, stafi politik pranë kryetarit nuk ngjall besim tek baza, atëherë ke jo një, por disa lëmshe për të zgjidhur dhe këto Lulzim Basha duhet ti bëjë shpjet vërtet shumë shpejt. Lënia e tyre si plagë apo sëmundje që mund të shërohen vetë është njësoj si të kurosh kancerin me aspirina. Basha duhet të marë përgjegjësitë dhe të tregojë se di të mare vendim, të mbajë anën e drejtë, të bashkojë bazën dhe elitën e partisë, të emërojë në drejtim individë me më reputacion në opinion duke sjellë një ekip që funksionon mbi parime dhe jo mbi intriga. Kjo është mënyra e ringritjes të opozitës, sa më shumë ta vonojë aq më gjatë do qëndrojë në opozitë. Lëmshet i zgjidh vetëm ai, të tjerët i shërbejnë për ti ngatërruar, në mos disa i ngatërron edhe vetë. /Elvi FUNDO