Basha konfirmon për Çim Pekën lajmin e citynews/ Javen tjetër drejt SHBA-ve

4 Mars 2016, 20:07, Politikë CNA

Burime zyrtare dhe të konfirmuara nga Partia Demokratike kanë theksuar sot për citynews se kreu demokrat, Lulzim Basha, pritet që të udhëtojë drejt Shteteve të Bashkuara të Amerikës menjëherë pas vizitës që do të kryejë në vendin tonë Sekretari Amerikan i Shtetit, John Kerry.

Të njëjtat burime theksuan se vizita e Bashës për në SHBA po mbahet sekret për tu bërë publike menjëherë pas takimit që Lulzim Basha do të zhvillojë kokë më kokë me Sekretarin Amerikan të Shtetit.

Pritet që Lulzim Basha të ketë një axhendë mjaft të ngjeshur takimesh në departamentin e shtetit, kongresmenë dhe senatorë.

Vizita e Bashës vjen menjëherë pas disa betejave të Partisë Demokratike në luftën kundër krimit politik, por edhe aksioneve të tjera kundër korrupsionit, mbështetjes për Byronë Kombëtare të Hetimit, ligjin për dekriminalizimin dhe veprimeve të tjera të aksionit opozitar. Basha ka qenë sistematikisht në mbështetje të linjës zyrtare të SHBA-ve në të gjitha veprimet e tij. Ai e ka quajtur SHBA-në si partnerin kryesor strategjik të Shqipërisë.

Basha shkon në SHBA për të zhvilluar disa takime mjaft të rëndësishme të niveleve mjaft të larta në departamentin e shtetit. Ndërkohë që kreu i qeverisë aktuale, Edi Rama, ende nuk është pritur nga asnjë takim zyrtar nga autoritetet zyrtare në SHBA

Pjesë e intervistës së kreut të PD-së Lulzim Basha për gazetarin Çim Peka

Basha: Po do të udhëtoj në fundin e javës së ardhshme.

Peka: Domethënë këtë muaj jeni në Uashington?

Basha: Po.

Peka: Takime?

Basha: Po do të kem takime, sigurisht.

Peka: ku do ti keni takimet z Basha?

Basha: Në Uashington dhe disa prej tyre në Nju Jork. Në nivelet e larta të përfaqësimit e politikës dhe administratës amerikane. Të jeni të sigurtë që nuk do të jenë sekrete por do të bëhen transparente për publikun, për ju, për faqen tuaj që ju përgëzoj që për një kohë rekord ka arritur të jetë informuese kryesor e opinionit public. Sfidën nuk e keni të vogël as ju sepse folëm për këtë. Mos e merr për kompliment meqë folëm këtu sepse nuk e kam interesin tek Çim Peka as tek syri.net por e kam interesin tek media që sa vjen e thahet nën erërat dhe presionin e oligarkisë, mafias dhe pushtetit të pakufizuar të Edi Ramës si dhe tu uroj që kjo studio këtu, që është më shumë se sa syri.net sepse është syri.net në dinamikë, të ketë sa më shumë sukses në përcjelljen e zërit të lirë dhe të vërtetave të shoqërisë.

Peka: Të falenderoj. Pyetja e fundit.Me ftesë të kujt udhëton Lulzim Basha në Uashington?

Basha: Me ftesë të miqve të Shqipërisë në Uashington në Kongresin Amerikan dhe që përkon edhe me data të shënuara në marrëdhëniet shqiptaro-amerikane.