E fundit!

19:55 Aktualitet

“Protestat e kanë goditur qeverinë”/ Kikia: Ministrat dhe deputetët nuk ecin të lirë në rrugë

Gazetari dhe analisti Mentor Kikia ka folur ditën e sotme ...

Gara për kreun e FRPD-së/ Enri Çeno: U largova nga nje proces i deformuar

18 Nëntor 2015, 21:47, Aktualitet CNA

Kandidati i dorëhequr nga gara për kreun e ri të FRPD-së, Enri Çeno ka deklaruar se është tërhequr pasi procesi ishte i deformuar. Përmes një postimi në rrjetin social Facebook, Çeno shpjegon arsyet e largimit duke përmendur edhe faktin se ka patur abuzim të përsëritur me emrat e hierarkisë së Partisë Demokratike në funksion të orientimit dhe kontrollit të votave të të rinjve demokratë.

Deklarata e plotë e Enri Çenos:

Duke ju falënderuar me gjithë zemër për ftesën, me keqardhje më duhet të bëj me dije mungesën time të detyruar në debatin e sotëm në TOP SHOW, e cila lidhet me heqjen dorë prej meje nga gara për kryetar të FRPD.
Kandidimi im për kreun e FRPD ishte një gjest politik i menduar gjatë, i bazuar tek vullneti për ti dhënë të djathtës diçka nga vetja, si dhe tek vlerësimi që u bëra kapaciteteve të mia në një mjedis ku forcat duhet të mateshin ballë për ballë. Gjatë këtyre muajve, bashkë me miqtë e mi, u përpoqa të ravijëzoj një program për ta ngritur forumin në nivelin e sfidave që e presin, si nga ana organizative, ashtu edhe nga ajo ideologjike. U përpoqa të flas qartë dhe thjesht, duke paraqitur ato alternativa për realizimin e të cilave e dija se do të mund të përgjigjesha konkretisht, nëse përgjegjësia e tyre do të binte mbi mua.
Vendimi për tu tërhequr nuk erdhi as si rezultat i ndonjë pakënaqësie të çastit, as si pasojë e ndonjë kalkulimi politik, as për shkak të ndonjë nevoje të papërballueshme për të trafikuar vota dhe këmbyer influenca. Vendosa të tërhiqem pasi konstatova në mënyrë të përsëritur se në shumë aspekte ne nuk jemi më të mirë sesa fenomenet që duam të luftojmë. Vendosa të tërhiqem duke i qëndruar bindjes time që një betejë e ndershme mes miqsh dhe kolegësh duhet bërë ballë për ballë.
Por vërejta se ndërhyrjet deformuan vullnetin, vërejta se mbështetja nëpër sallat e debatit nuk u reflektua tek vota nëpër kuti. Mu bënë me dije situata të papranueshme në lidhje me ndikimin e votës, situata të cilat ne me shumë zell i denoncojmë tek kundërshtari ynë politik. Vërejta gjithashtu një abuzim të përsëritur me emrat e hierarkisë së partisë në funksion të orientimit dhe kontrollit të një vote, e cila në parim dhe në praktikë do të duhej të ishte e lirë.

Gjithësesi rruga në politikë është e gjatë, aty ku një derë mbyllet, një tjetër hapet. Por unë nuk e ndërtoj trasenë time mbi gënjeshtra, prapaskena, hatërmbetje, cmirë dhe armiqësi. Për mua do të jetë gjithmonë e më shumë më i vlefshëm besimi dhe respekti ndaj atyre që gjatë një viti kam takuar dhe njohur në çdo cep të Shqipërisë.

Rruga ime nuk mbaron këtu, ajo fillon këtu.