E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Edi Rama shkoi në zyrën e Ilir Metës si Enver Hoxha në zyrën e Mehmet Shehut në tetor 1981

6 Tetor 2015, 06:10, Aktualitet CNA

Nga Kastriot Myftaraj

Në fillim të tetorit 1981 Enver Hoxha bëri një gjest kuptimplotë në lojën e tij si macja me miun, që kishte nisur prej rreth një muaji me zëvendësin e tij Mehmet Shehu, duke marrë shkas nga fejesa e djalit të zëvendit të tij me një vajzë nga një familje të cilën Enver Hoxha e cilësoi befasisht si celulë të shërbimeve të fshehta të huaja në Tiranë, duke përfshirë CIA-n. Pasi Enver Hoxha e futi Shehun në rrethin vicioz nga ku rrugëdalja ishte vetëm vdekja, duke i kërkuar që reflektonte thellë mbi atë se përse i lejoi vetes që ta pranonte krushqinë me këtë familje, diktatori u kujdes që, deri kur të vinte momenti i eliminimit të zëvendësit të tij, ta qetësonte atë. Enver Hoxha e bëri Shehun të mendonte se në marrëdhëniet mes të dyve nuk kishte ndryshuar asgjë, dhe se ai, Hoxha ishte në anën e Shehut, por ishin partia dhe populli ata që kërkonin shpjegime.
Për ta qetësuar zëvendësin e tij dhe për t? i dhënë shpresë të rreme, Enver Hoxha një ditë ndryshoi itinerarin e shëtitjes së tij të paradites dhe u nis për të përshkuar në këmbë dyqind hapat që e ndanin shtëpinë e tij nga ndërtesa e Kryeministrisë, në anën tjetër të bulevardit qendror të Tiranës, për të shkuar në zyrën e Shehut. Gjithçka ishte e inskenuar dhe Enver Hoxha ishte paraprakisht në dijeni që Shehu nuk gjendej në zyrën e tij në Kryeministri, por në zyrën që kishte marrë në Komitetin Qendror pas vdekjes së Hysni Kapos, sekretarit të Komitetit Qendror të PPSH që mbulonte Ushtrinë dhe organet e punëve të brendshme, duke përfshirë Sigurimin e Shtetit. Sekretariati i Komitetit Qendror e kishte ngarkuar Shehun që të mbulonte përkohësisht edhe funksionin e Hysni Kapos, funksioni nr. 2 në parti, deri kur të zgjidhej sekretari i ri i Komitetit Qendror në kongresin e rradhës, duke u nënkuptuar se ky do të ishte Mehmet Shehu.
Me të arritur Enver Hoxha në hyrje të ndërtesës, sipas skenarit e njoftuan se Kryeministri nuk ishte në zyrë. Shehu gjendej në zyrën e tij të dytë në ndërtesën e Komitetit Qendror të Partisë, përballë Kryeministrisë, në anën tjetër të bulevardit, më pak se njëqind hapa larg. Meqënëse tashmë kishte nisur izolimi i Shehut, atë nuk e njoftoi askush për atë që po ndodhte.
-Mehmeti i paska marrë në dorë mirë punët, në Qeveri dhe në Parti, -tha Enver Hoxha dhe shtoi: Epo nuk kemi çfarë të bëjmë, meqënëse u nisëm për të takuar Mehmetin duhet të shkojmë në zyrën e tij të re në Komitetin Qendror të Partisë.
Nënkuptimi ishte se Shehu kishte marrë nën kontroll Qeverinë dhe Partinë, domethënë e kishte marrë nën kontroll shtetin totalitar, partinë-shtet, duke e mënjanuar atë Enver Hoxhën. Enver Hoxha me shpurën e tij u nis të kapërcente përsëri bulevardin dhe shkoi në ndërtesën e Komitetit Qendror të Partisë. Mehmet Shehu u befasua shumë kur e pa në derën e zyrës së tij dhe u lumturua nga sjellja shumë e përzemërt e diktatorit. Enver Hoxha ia arriti qëllimit që ta bënte zëvendësin e tij të besonte se ai nuk donte ta eliminonte atë, por vetëm t? i jepte të kuptonte se cili ishte i pari i këtij vendi, para se t? i jepte edhe një post të dytë në kongresin e nëntorit.

Edi Rama këto ditë përsëriti në trajtë karikature gjestin e Enver Hoxhës, kur pas kthimit nga SHBA, u nis në këmbë nga ndërtesa e Kryeministrisë, që është e njëjta si në 1981, për të shkuar në ish-ndërtesën e Komitetit Qendror të partisë së Enver Hoxhës, ndërtesë që edhe ajo është e njëjta si në 1981.

Vajtja e pazakontë e Edi Ramës në zyrën e Ilir Metës, ishte një gjest i llogaritur për të dhënë një kumt të dyfishtë në lojën si macja me miun të Edi Ramës ndaj Ilir Metës. Nga njëra anë Rama kërkon ta qetësojë Metën dhe për ta bindur atë se nuk intrigoi kundër tij gjatë vizitës në SHBA.

Vizita e Ramës në zyrën e Metës ndodhi në kohën kur mosbesimi i Metës ndaj Ramës është më i madh se kurrë. Meta ka bërë publikisht aluzione për një aleancë Rama-Basha që do të përmbyste realitetin e sotëm politik në Shqipëri, duke eliminuar politikisht Metën, me ç? rast do të shkrihej LSI-ja. Krahu i djathtë i Metës në këto çështje, kryetari i Komisionit Parlamentar të Sigurisë, Spartak Braho, në cilësinë e zëdhënësit të pashpallur të dyshes Meta-Berisha, kumtoi ultimatumin e destabilizimit të Shqipërisë në rast të arrestimit të Metës dhe Berishës.

Nga ana tjetër, Rama kërkon t? i thotë Shqipërisë se ai i ka duart e lidhura nga Meta, i cili është bërë si Enver Hoxha, duke e drejtuar shtetin që nga zyra e vjetër e Enver Hoxhës në ndërtesën e ish-Komitetit Qendror. Prandaj, ai, Rama nuk mund të mbajë premtimet e tij zgjedhore ndaj popullit pa e eliminuar politikisht aleatin e tij të sotëm. Si do të përfundojë kjo histori. Historia e Enver Hoxhës me Mehmet Shehun përfundoi sipas stereotipit të asaj partie, e cila është në origjinë partia që drejton Rama sot. Gjesti i Ramës tregoi se stereotipët makabër të partisë së vjetër janë janë ende aktivë ne mendjen e liderëve të Partisë Socialiste. Prandaj mënyra më e thjeshtë është ta parashikosh përfundimin e historisë së Ramës me Metën sipas stereotipeve të partisë së vjetër amë, kuptohet duke ndryshuar skenarët sipas rrethanave të reja të kohës së sotme.