Ja çfarë fshihet pas vizitës së Aleksandër Vuçiç në Tiranë

28 Maj 2015, 06:18, Politikë CNA

Pas disa shekujsh armiqësi, akulli, luftërash të përgjakshme dhe platformash për shfarosje të popullit shqiptar, mes Shqipërisë dhe Serbisë ka nisur shkëmbimi i vizitave në nivele të larta. Vetëm shtatëmbëdhjetë vjet nga lufta e fundit, e fituar nga shqiptarët, çka çoi edhe në çlirimin e Kosovës, një kryeministër serb viziton për herë të parë Tiranën zyrtare.

Kryeministri i Serbisë, Aleksandër Vuçiç, ka mbërritur paraditen e djeshme për herë të parë në Shqipëri, nën paranojën e pandërprerë të provokimit, në një klimë mosbesimi, tensioni të vazhdueshëm, nën masa ekstreme sigurie dhe me një axhendë të përcaktuar deri në hollësi. Kryeministri serb preku për herë të parë tokën shqiptare në orën 11:00 në Rinas, vetëm gjashtë muaj pas vizitës së kryeministrit Edi Rama në Beograd. Vuçiç u prit nga kryeministri shqiptar, Edi Rama, në një ceremoni zyrtare në Pallatin e Brigadave. Pas shtrëngimit të dorës me homologun shqiptar Rama, banda ka luajtur tingujt e flamurit të Serbisë, e më tej sipas protokollit, himnin tonë kombëtar.

Si kryeministri Rama, ashtu edhe Vuçiç, u përulën para flamurit shqiptar. Më pas nisi takimi i dy delegacioneve, që kryesoheshin nga Rama dhe Vuçiç. Takimi ka zgjatur rreth 40 minuta. Pas takimit, dy kryeministrat, ashtu siç edhe parashikohej në protokoll, dolën në një konferencë për shtyp. Misioni i Vuçiç Krahas detajeve të vizitës dhe mesazheve politike, kryeministri serb ka ardhur me një axhendë dhe pikësynim konkret në Tiranë.

Ndërsa secila palë përpiqet ta paraqesë si sukses dhe arritje të saj këtë vizitë, Vuçiç ka ardhur në Tiranë me një mision të qartë. Kryeministri serb ka kërkuar një dalje të Serbisë në detin Adriatik, me anë të një autostrade dhe hekurudhe. Atë që nuk e arritën paraardhësit e tij me luftëra dhe platforma, kryeministri serb po e arrin me një mënyrë paqësore, me disa marrëveshje me qeverinë shqiptare. Ndaj dhe projekti kryesor i Vuçiç në Tiranë është ndërtimi i autostradës dhe hekurudhës, të cila do të kalojnë përmes Kosovës.

Mediat serbe për takimin Rama-Vuçiç

Mediat serbe i kanë kushtuar një hapësirë të madhe kësaj vizite, ku binte në sy numri i konsiderueshëm i titujve lidhur me këtë vizitë duke veçuar sidomos pritjen e bërë nga autoritetet shqiptare dhe masat e larta të sigurisë për mbarëvajtjen e vizitës. ?Takimi i dy kryeministrave në Pallatin e Brigadave është takimi i tyre i dytë dhe i pari i një kryeministri serb në kryeqytetin shqiptar. Jashtë këtij pallati, ku u zhvilluan bisedimet, Vuçiç u mikprit në mënyrë ceremoniale, me roja nderi dhe me ekzekutimin e himneve kombëtare të të dy vendeve. Për këtë vizitë janë marrë masa të larta sigurie, me monitorim nga toka dhe ajri, përfshirë njësitë antiterroriste?, theksonte TANJUG-u. Rëndësi takimit Rama-Vuçiç i ka kushtuar rëndësi dhe një media franceze. Agjencia franceze e lajmeve, AFP shkruante se vizita e kryeministrit serb, Aleksandar Vuçiç është një vizitë historike.