Bogdani: Rama nën akuzë, sulmon opozitën dhe kandidon Gjicin e dyshimtë të 6 mln eurove

13 Prill 2015, 15:28, Politikë CNA

Deputeti i Partisë Demokratike, Gerti Bogdani në një deklaratë për mediat ka akuzuar kryeministrin Rama për sulmet që po përdor në adresë të kandidatëve të përzgjedhur nga opozita për njësitë vendore në vend. Sipas Bogdanit është nën akuzë tronditëse sepse po kandidon për Bashkinë e Krujës, trafikantin e arrestuar për drogë në Itali, të cilin më parë e bëri deputet.

?Rama është prej disa ditësh nën akuza tronditëse, për abuzime me fondet publike me dhjetra mijë euro me klientin e tij belg, ndaj të cilit ka nisur hetimi penal, dhe i vetmi reagim i tij është sulmi ndaj opozitës. Kryeministri sulmon opozitën për kandidatin e Kamzës, pasi ka ndërhyrë vetë drejtpërdrejt duke manipuluar e duke sajuar një proces të paqënë ndaj tij, pa prova e pa fakte. Kandidati i opozitës akuzohet nga Edi Rama për një tender që nuk është bërë kurrë, ku nuk ka asnjë dëm ekonomik, ku nuk ka asnjë pasojë. Çfarë ka, është vetëm skema e Edi Ramës përmes segmenteve të kapura prej tij dhe presionit te tij në prokurori e gjykatë, për të eleminuar kundërshtarin në një Bashki të rëndësishme, pra një përpjekje për ta arritur Kamzën në tavolinë, pa garë. Dhe këtë e bën ai që ka zhpenzuar dhjetra mijë euro nga fondet publike te Bashkise se Tiranes me pare dhe te Qeverise tani, duke ia dhuruar mikut e tij belg, kur për këtë ka nisur hetimi në Bruksel.

Po kush është kandidati i z.Rama për Kamzën; ndërkohë që sulmon opozitën. Eshtë Safet Gjici, për të cilin kemi sot disa pyetje; A ka dijeni ai për grabitjen e 6 milionë eurove në mes të ditës nga një bankë në Tiranë? Pse kompania e tij e sigurimit, dështoi në mënyrë spektakolare dhe nuk bëri asnjë përpjekje për të ndaluar grabitjen? Pse vëllai i tij, pjesë e eskortës së sigurimit nuk u mbajt asnjë ditë në burg? Pse policia e ka varrosur si çështje duke mos bërë asnjë hap edhe pse kjo është një nga grabitjet më të mëdha të bëra në Shqipëri? A janë të mjaftueshme për Gjicin 6 milionë euro për të fituar mandat kryebashkiaku? Partia Demokratike angazhohet sot se do ta zbardhë këtë ngjarje të rëndë, dhe do të gjejë përgjegjësit dhe autorët e vërtetë të grabitjes?, deklaroi Bogdani.