Skandali “Nikolla”, ja raporti sekret për Henri Çilin, në UET një profesor udhëheq 16 doktorantë, ligji lejon dy

7 Prill 2015, 06:10, Aktualitet CNA

Gazeta SOT ka zbardhur një raport të grupit të kontrollit të Ministrisë së Arsimit dhe Sportit, për kontrollin e zbatimit të ligjshmërisë, në Universitetin Europian të Tiranës.
Ky raport, me gjetje dhe konstatime shokuese, është mbajtur i fshehtë nga Ministria e Arsimit dhe Sportit, për shkak se, kjo ministri tashmë e ka tradhëtuar misionin dhe interesin publik, duke u marrosur pas interesave të Henri Çilit, njeriut që ka ngritur piramidën më të madhe arsimore dhe që ka sot monopolin e doktoraturave në Shqipëri. Nëse raporti do të konsiderohej dhe nëse MAS do të operonte me një standard, UET i Henri Çilit, sot do të ishte shkrirë siç ndodhi me Vitrinën apo me Kristalin. Por çfarë ndodhi? Shkrirja e universiteteve duket se ishte një lojë e diktuar nga vetë UET për të agresuar konkurrencën. Ky dyshim forcohet me faktin se sot UET ka monopolin e doktoraturave në Shqipëri, sot UET nuk paguan borxhet në tatime, Henri Çili ka diktuar të gjithë kupolën drejtuese të MAS si dhe ligjin e ri për arsimin e lartë, i cili parashikon financimin e UET nga buxheti i shtetit, pra nga paratë e qytetarëve shqiptarë, duke falimentuar universitetet publike me 60-70 vjet traditë.

Një profesor udhëheq 16 doktorantë

Çfarë ka ndodhur dhe çfarë ndodh në Universitetin Europian të Tiranës? Gazeta SOT ka vendosur të publikojë vetëm një nga gjetjet dhe konstatimet më të rënda të grupit të kontrollit të Ministrisë së Arsimit. Sipas raportit të kontrollit, një profesor këshillon dhe udhëheq njëherësh 16 doktorantë, gjë e cila është në shkelje flagrante me udhëzimin e MAS. Duket e pabesueshme, por një profesor i asociuar udhëheq nëntë doktorantë dhe këshillon shtatë të tjerë. ?Bazuar në pikën 6.3.1 të rregullores për organizimin e programeve të studimit të doktoratës, numri i studentëve që mund të udhëheqë njëkohësisht një udhëheqës shkencor përcaktohet nga Këshilli i Profesorëve, por në asnjë rast ky numër nuk mund të jetë më shumë se 3 deri në 5 studentë në vit, me kusht që temat të jenë të fushave të përafërta. Ndërkohë që nga listat e vëna në dispozicion rezulton p.sh. që Prof. Asoc. Dr. Migena Leskoviku, figuron që këshillon 7 doktorantë dhe udhëheq 9 të tillë. Në bazë të rregullores, kreu V, proceset dhe detyrimet akademike, pika 9.2., dallojnë qartë procesin e këshillimit dhe udhëheqjes. Në këshillim janë doktorantët që ndjekin vitin e parë, në udhëheqje janë doktorantët e vitit të dytë dhe të tretë?, thuhet në raport.

Çfarë parashikon udhëzimi i MAS?

Ka një udhëzim të Ministrisë së Arsimit, i cili parashikon raportin profesor/doktorant. Ky udhëzim duhet të zbatohet si nga universitetet private ashtu edhe ato shtetërore. Udhëzimi thotë se udhëheqësi shkencor me titullin akademik ?Profesor i Asociuar? dhe udhëheqësi shkencor me gradën shkencore ?Doktor? (PhD) të fituar pranë universiteteve perëndimore, i punësuar me kohë të plotë, udhëheq njëkohësisht, jo më shumë se dy doktorantë. Udhëheqësi me titullin akademik ?Profesor?, i punësuar me kohë të pjesshme, udhëheq vetëm një doktorant. Tek Henri Çili profesori i asociuar udhëheq sa doktorantë paguajnë paratë. Megjithatë, UET nuk është shkrirë.