E fundit!

18:28 Aktualitet

Të enjten seanca e fundit e sesionit parlamentar/ Në rend dite, një sërë projektligjesh

Seanca e fundit plenare e këtij sesioni parlamentar do të ...

Matura shtetërore, datat dhe struktura e testeve

27 Mars 2015, 06:43, Sociale CNA

Ministria e Arsimit dhe Sportit ka miratuar udhëzimin për zhvillimin e provimeve të maturës shtetërore 2015, ku përfshihen datat e zhvillimit të pesë provimeve, kohëzgjatja e tyre si dhe struktura e testit. Këtë vit, MAS ka reduktuar me një orë kohën e zhvillimit të provimeve të maturës, pasi nga 4 orë që ishte vjet këtë vit kohëzgjatjen e dy provimeve me zgjedhje e kanë bërë 3 orë. Provimi i parë i maturës edhe për këtë vit do të jetë gjuha e huaj me detyrim, i cili do të zhvillohet në 23 maj. Ndërsa të fundit janë dy provimet me zgjedhje që do të zhvillohen në datën 19 qershor. Struktura e testit do vijojë të jetë ajo e viteve të mëparshme. Provimet e maturës i jep maturanti i vitit shkollor 2014-2015 që ka përfunduar me sukses vitin e fundit shkollor dhe ka plotësuar formularin A1. Si dhe maturantët e viteve të mëparshme që kanë plotësuar formularin A1Z. Sipas rregullores së maturës, kandidati nuk quhet kalues nëse ka marrë më pak se 20 % të pikëve të testit.
Datat dhe kohëzgjatja
Ministria e Arsimit ditën e djeshme ka miratuar udhëzimin për zhvillimin e provimeve të maturës shtetërore. Në datën 23 maj, rreth 45 mijë maturantë do të japin provimin e detyruar të gjuhës së huaj, ndërsa në 29 maj provimin e Gjuhës Shqipe dhe të Letërsisë, në 9 qershor provimin e Matematikës, ndërsa të fundit janë provimet me zgjedhje të cilët do të jenë në 19 qershor.
Vitin e shkuar MAS për herë të parë maturantëve ju la në dispozicion për provimet me zgjedhje 4 orë, ndërkohë që në udhëzimin nr.8, i datës 26 mars, një orë që ua dha vjet e ka hequr sivjet. Pra maturantët këtë vit do të kenë në dispozicion vetëm tre orë për zhvillimin e testeve të dy provimeve me zgjedhje. Udhëzimi përcakton se: ? ?Provimet e detyruara dhe me zgjedhje fillojnë në orën 10:00. Provimet e detyruara zgjasin 2 orë e 30 minuta secila. Provimet me zgjedhje zgjasin 3 orë. Kandidatët që do të japin provim të maturës shtetërore njërën nga lëndët me zgjedhje, do ta fillojnë provimin në orën 11:30 dhe do ta përfundojnë atë në orën 13:00?. Edhe këtë vit testi i gjuhës së huaj me detyrim do të hartohet nga AKP, por do të administrohet nga DAR/ZA, pasi edhe këtë vit nota që maturantët do të marrin në këtë provim nuk do të llogaritet në formulën e maturës shtetërore. Në këtë udhëzim për herë të parë përcaktohet se brenda datës 25 maj, drejtorët e shkollave duhet të informojnë maturantët mbetës në provim që nuk duhet të hyjnë në provimet e maturës, edhe pse provimet nisin që më datë 23 maj me gjuhën e huaj me detyrim. Maturantët e shkollave pedagogjike dhe seksionet dygjuhëshe, provimet ?gjuhë dhe letërsi italiane?, ?gjuhë dhe letërsi greke? dhe ?gjuhë frënge? provimin do ta zhvillojnë në datën 19 maj 2015 pranë shkollave përkatëse.
Përbërja e testit
Para se të futen në provimet e maturës, maturantët e dinë që nëse nuk marrin 20% të pikëve të testit, nuk konsiderohen kalues. Përcaktimi i pikëve dysheme është një ndër risitë më pozitive të maturës 2014, e cila pritet që të sjellë rritjen e cilësisë së maturantëve që do të fitojnë një të drejtë studimi në universitetet publike. Testi për secilin nga provimet e detyruara do të përmbajë 25 pyetje, nga të cilat 13 do të jenë me përgjigje alternative, që vlerësohen me 1 pikë secila (13 pikë gjithsej) dhe 12 pyetje me zhvillim, të cilat vlerësohen me 37 pikë. Testi vlerësohet maksimalisht me 50 pikë. Pra, një maturant që quhet kalues në provimet me detyrim duhet të marrë jo më pak se 10 pikë në secilin prej tre provimeve me detyrim. Ndërsa testi për secilin nga provimet me zgjedhje do të përmbajë 20 pyetje, nga të cilat 10 pyetje do të jenë me përgjigje alternative, që vlerësohen me 1 pikë secila (10 pikë gjithsej) dhe 10 pyetje me zhvillim të cilat vlerësohen me 30 pikë. Testi vlerësohet maksimalisht me 40 pikë. Dhe me kriterin e vendosur që një maturant është kalues kur merr 20% të testit, në provimet me zgjedhje ata duhet të marrin minimalisht 8 pikë, pra notën 4.5 që të quhen kalues. Në pikën 9 të këtij udhëzimi përcaktohet se maturantët mbetës në provimet e maturës shtetërore kanë të drejtën e provimit në sezonin e dytë.