Arsyet pse të protestojmë me “Feeling shqiptar” më 22 nëntor

18 Nëntor 2014, 23:00, Politikë CNA

Nga Lorisa YLLI

Duke marrë shkas nga vijimet e statuseve të shumta në rrjetet sociale ku së fundmi mori hov dhe një trend i ri, ?Feeling shqiptar?, po mendoja se sa shumë ndihemi shqiptarë ne që jetojmë në Shqipëri. Në fakt kjo ndjesi emocioni ekzistonte prej kohësh në faqen e ?Facebook?-ut, por pas vizitës së Ramës në Beograd situata u bë më e bujshme nga stafi i tij. Unë personalisht, si shumë prej jush, nuk ndjeva ndonjë krenari të madhe për një vizitë ku kryeministri ynë mendoi të merrte pikët e shtesës së një ndeshjeje ku u pa ?live? si na shiti vetë FSHF-ja. Federata jonë as që bëri lëvizjen më të vogël për të denoncuar dhunën dhe racizmin që në fillim të ndeshjes; askush nuk e çoi vëmendjen te FSHF-ja, as qeveria vetë, sepse në fakt i leverdiste ?show? që do të vijonte! Rama u pa si hero për një arsye shumë të zakonshme: si çdo shqiptar që do të shkonte e do pyetej nga një popull që na përbuz, dha mendimin e tij si shqiptar. Tha një të vërtetë ndërkombëtare. Sigurisht që, çështja e Kosovës ishte më se e drejtë të ishte pjesë e konferencës dhe kjo besoj është e vetmja pikë për të cilën biem dakord të gjithë, por, përveçse kësaj që e dinim me kohë?! S?besoj se ndonjëri nga ju mund të më thotë një arsye të fortë krenarie!

Fatkeqësisht qeveria na bën të ndihemi shqiptarë çdo ditë. Ndihemi shqiptarë kur paguajmë taksat e energjisë elektrike, taksa ku as nuk detajohen se pse shtohen dita-ditës, sepse ne si shqiptarë nuk kemi të drejtë transparence për një energji ku në të shumtën e rasteve ka filluar të na mungojë dhe qiriri mbetet ndriçimi ynë më i mirë, që nuk na tradhton kurrë sa herë na jepet shansi të rilindim.

Ndihemi shqiptarë kur mendojmë se si rendëm të gjithë për të blerë kutinë e emergjencës në farmaci sepse ?Bravo Çunat?, në vend që të ndalojnë kriminelët që shëtisin të armatosur apo ndonjë djalë politikani me precedencë, kanë kohë të merren me kutinë dekoruese nëse larg qoftë gërvishtesh dhe nuk ke leukoplast për t?u mjekuar! Ndoshta ky është plani i qeverisë për shëndetësi falas dhe siguri, të dhurojmë një leukoplast kujt i nevojitet. ?Feeling shqiptar?!

Ndihemi shqiptarë kur dëgjojmë pensionistët që me shumë gjasa do përfundojnë në burg për mospagim të faturës së energjisë elektrike, dhe kjo jo për arsye se duan të mos respektojnë komunitetin apo ligjin, por sepse sot ndihen më të varfër se kurrë. Buxheti për 2015-ën parashikon rritjen e pensionit me 2$. Arsye për ?Feeling shqiptar?!
Ndihemi shqiptarë kur betoni na ka zënë vëzhgimin kudo ku kthejmë kokën; madje dhe kur hedhim sytë nga deti, do shohim betonin (pistën) e radhës pa leje ndërtimi, sepse ligji vepron me pronarët me dokumente të rregullta, ku policia guxon dhe hedh pronarin nga shkallët e ndërtesës pa vendim gjykate! Më shumë se krenare, në fakt ndihem e diskriminuar nga qeveria ime, për faktin e thjeshtë se jam shqiptare. ?Feeling shqiptar?!

Asnjë shtet europian nuk do ta qeveriste vendin e tij duke na përbuzur çdo ditë, duke na diskriminuar çdo ditë. Arsyeja? Pikërisht sepse ne jemi shqiptarë dhe sikurse ka thënë i madhi Konica: ?Trimëria e shqiptarit nuk është e artë, është e teneqenjtë. Me fjalë të tjera, trimëria e shqiptarit, sado e madhe në vete, është e vogël në shkaqet që e ndezin. Për një kec të grabitur, për një fjalë të shtrembër, e shumë herë pa ditur as vetë përse, shqiptarët marrin armët, hidhen, vriten.? Këtë merr për bazë kryeministri ynë në qeverisjen e oborrit; ata janë shqiptarë! Ndihen krenarë vetëm për një ndeshje dhe kaq u mjafton!

Këtë shprehje e pranojmë çdo ditë në edicionet informative të lajmeve dhe në skenat teatrale të shumta që na fal foltorja Kryeministrore bashkë me precedencat penale! Kauza e varfërisë që po na gropos dita-ditës nuk është një kauzë e teneqenjtë për të protestuar më 22 nëntor! Dua që këtë herë Konica të gabojë, qoftë dhe për një herë të vetme, në momentin që ne do ndihemi shqiptarë të ndërgjegjësuar dhe jo aleatë të së keqes që na kanoset. Pikërisht sepse qeveria na kujton çdo ditë që jemi shqiptarë dhe nuk kemi të drejta europiane, unë më 22 nëntor do vë statusin nga sheshi ?Feeling shqiptar?!