web counter
LEXO PA REKLAMA!

SHKARKO APP

App Store
Google Play

E fundit!

x

Pol.al/ Si i shpetoi zhurmes mediatike njeriu i Kokedhimes. Mediat u manipuluan

31 Tetor 2014, 23:00, Aktualitet CNA

Drejtori i Albpetrol, Endri Puka

Nga Habjon Hasani
Tri ditë më parë, më datën 29 Tetor 2014, në mediet e Tiranës, sidomos në ato me informacion intensiv ?online? u raportua një zhvillim tejet i rëndësishëm: Prokuroria kishte zbarkuar në zyrat e Albpetrolit dhe kishte bërë sekuestro voluminoze dokumentacioni.

 Por pa kaluar as 20 minuta, ky lajm u zhduk, avulloi. Çfarë ndodhi?

 Pol.al është interesuar për këtë çështje dhe në mënyrë të përmbledhur po ofrojmë atë çfarë kemi mundur të mësojmë deri më tani:   

 Kontrolli i Lartë i Shtetit ka kallëzuar tre javë më parë në prokurori drejtuesin e Albpetrolit Endri Puka dhe një sërë zyrtarësh të tjerë të këtij institucioni. Prokuroria e Tiranës ka nisur hetimet, fillimisht për abuzim me detyrën, por shqyrtimi i materialeve që kishte dërguar KLSH-ja, dhe disa verifikime të tjera të kryera nga prokurorët, hapën një pistë të re: Dyshohet se një skemë vjedhje e organizuar po realizohet në Albpetrol dhe loja funksionon si një grup i strukturuar me infrastrukturë dhe hierarki. Si një grup kriminal i organizuar. Ndaj dhe në hetime janë përfshirë dhe specialistë të Prokurorisë për Krimet e Rënda.

Një burim nga Prokuroria e Përgjithshme, i tha Pol.al se në proces hetimi janë realizuar dhe interceptime në komunikim të kreut të Albpetrolit dhe disa zyrtarëve të tjerë, biznesmenëve etj, interceptime që sipas prokurorisë kanë hapur një faqe të re të hetimeve dhe që me sa duket e kanë rënduar shumë pozitën e kreut të Albpetrolit Endri Puka dhe i kanë shtuar së tepërmi dyshimet mbi implikimet e tij mbi objektin e hetimit.

Deputeti Kokedhima dhe kryeministri Rama

 Zoti Puka u zgjodh drejtor i Albpetrolit fill pas ardhjes së koalicionit PS-LSI në pushtet, ai dikur ka qenë një bashkëpunëtor i ngushtë i deputetit socialist Koço Kokëdhima, ka qenë administrator i emëruar nga Kokëdhima në disa prej kompanive më kryesore të tij në të kaluarën. Këtë fakt e ka vënë në dukje dhe opozita, e cila e konsideron Pukën si një operator ekskluziv dhe të besuar të Kokëdhimës në Albpetrol.

Ai tashmë është në proces hetimi dhe nuk kemi asnjë të drejtë ta paragjykojmë pa pasur të dhëna zyrtare dhe pa përfunduar hetimet mbi të. Por ama mund të bëjmë një vështrim mbi mënyrën se si është trajtuar në media kjo çështje(me një rëndësi të padiskutueshme publike) dhe si është shmangur nga vëmendja e opinionit publik një hetimi kaq domethënës.

 Fejsbuku i Dasarës si mburojë?.

Në media u shpërnda informacioni se në Albpetrol kishte gjurmë të një vjedhje të madhe nga një grup kriminal që administronte skemën e vjedhjes. Ky informacion ka dalë nga prokuroria, por një pjesë e mediave nuk kishte fuqinë ta publikonte ndërsa pjesa tjetër e publikoi por më pas e zhduku lajmin.

Si për ironi, kryelajm në media(djathtas e majtas) u shndërrua mbesa e Berishës,  Dasara Malltezi dhe thëniet e saj në fejsbukun personal. Të gjithë nisën të merresshin se çfarë thoshte Dasara, pse e thoshte Dasara, sa mirë apo sa keq kishte folur Dasara. Dukej sikur ky vend nuk kishte ndonjë hall tjetër përveç tekstit të fejsbukut të Dasara Malltezit.

Nga ana tjetër, hetimi i prokurorisë u sfumua, u la në hije dhe orientimi mediatik u kthye drejt Dasarës, duke ofruar  një pamje të paprecedentë në realitetin mediatik: 

Thëniet e një vajze 18-vjeçare në fejsbuk, befas përbënin më shumë interes se një hetim delikat i prokurorisë në Albpetrol, ku objekt janë abuzimet  e dyshuara në qindra miliona dollarë me pasurinë kombëtare, me pasurinë tonë të përbashkët.

A nuk është pakëz e çuditshme që në debatin publik të dominojë fejsbuku i Dasarës dhe ky hetim të lihet në hije? Çfarë ka ndodhur?

Dasara Malltezi me ciftin Berisha

Kocka, media, manipulimi?
Për kompaninë Albpetrol është shkruar në disa artikuj pas ardhjes së PS-LSI në pushtet, por gradualisht zërat medial që orientonin vëmendjen drejt problemeve të kësaj kompanie erdhën duke u shuar. 
Nëse shikon me vëmendje në gazetat e përditshme, çdo javë, në gazetat që kanë potencial hulumtues nuk mungojnë reklamat nga kompania Albpetrol. Rasti më spektakolar ishte  ai i një muaji më parë, kur kjo kompani kishte bërë një shpallje në media, ku njoftonte (ish)punonjësit e saj për të marrë shpërblimet  dhe rrogat e prapambetura.

 Keni parë ndonjëherë ndonjë kompani që të njoftojë (ish)punonjësit e vetë nëpërmjet gazetës? Ku i mban borderotë, listat dhe të dhënat e punonjësve Albpetroli? 
Në zyrat e veta të Financës dhe burimeve njerëzore apo nëpër tezgat e gazetave? (!)

 Këto njoftime, Albpetroli nuk i publikon veresie, ato kanë një çmim, që duhet thënë se nuk është as ndonjë çmim i lartë, shkon shumë-shumë diku tek 500 mijë lekë të reja në muaj, nëse publikimet dhe njoftimet janë intensive. 
Por me sa duket janë ?kocka? të mjaftueshme që Albpetroli të sigurojë heshtjen e medias dhe qetësinë e vetë kur i del ndonjë problem me zarar.

Albpetroli është aset strategjik energjitik i Shqipërisë dhe me siguri që tërheqja e vëmendjes së opinionit publik ndaj tij, në momentin kur qeveria ka shpallur dhe aksionin për ndërhyrjen në sistemin e energjisë elektrike rrezikon të  zbehë këtë aksion.  

Sepse fjala vjen, ministri i Energjisë Damian Gjiknuri, është më komod kur nuk e pyet kush për problemet e Albpetrolit dhe ka luksin që të dalë e të flasë vetëm për aksionet për energjinë elektrike. Nëse ai do ishte dhe nën presionin publik për hetimin, me siguri që do i duhej të jepte disa shpjegime për Albpetrolin përpara se të promovonte aksionin me energjinë elektrike.

Duke u shmangur vëmendja nga Albpetroli; edhe Endri Puka vazhdon punët e veta i qetë, edhe Gjiknuri vazhdon e promovon veten, por edhe media ka Dasarën dhe pa gjë nuk mbetet. 

Një tjetër rast flagrant në panoramën e kësaj jave lidhej me investigimin e dy gazetarëve Gjergj Erebara dhe Besar Likmeta të cilët hodhën dritë mbi aktivitetin e OSHEE-së e cila dyshohet se manipulon tenderat e blerjes së energjisë elektrike.  Kjo ishte një e dhënë shumë interesante, pasi aktualisht të gjithë po debatojnë mbi vjedhjen që kryejnë familjarët dhe bizneset por askush nuk duket i interesuar të pyesë: 

Po zyrtarët e lartë shtetërorë a janë pjesë e vjedhjes dhe e abuzimit me energjinë? I kanë bërë siç duhet detyrat e tyre ata?

Nëse vështron atë që ka ndodhur javën e fundit, nuk është e vështirë të kuptosh, se media në pjesën dërrmuese të saj, e ka privuar opinionin publik nga e drejta për t?u informuar mbi hetimet e rëndësishme në Albpetrol dhe mbi dritëhijet e aksionit qeveritar për energjinë elektrike.

Si mburojë për të lënë në hije këto probleme, ka shërbyer për bukuri fejsbuku i një 18-vjeçareje. Me sa duket, nuk qenka dhe aq e vështirë për t?u hedhur hi syve njerëzve në këtë vend. 





Lajmet e fundit nga