E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Opinioni publik, i vetmi armik i dosjes “Fullani”

2 Gusht 2014, 20:16, Politikë CNA

Nga Mero Baze

Guvernatori i Shqipërisë është sot padyshim i vetmi monument korrupsioni që rruhet nga shteti.

Në historinë e këtij vendi, ai ka arritur konsesusin më të gjerë politik të mundshëm, më të paarritshmin, më të frikshmin dhe më të pështirin njëkohësisht.

Ai ka arritur t?i mbyllë gojën qeverisë, deputetëve, gojëhales më të madhe të këtij vendi, Sali Berishës, presidentit të vendit, Bujar Nishani, duke i marrë gruan në punë, ish- presidentëve dhe ish- kryeministrave, dhe shumicës së medias klienteliste të tij.

Nuk i ka blerë siç mund të mendohet, në mënyrë të shpifur. Nuk u ka dhënë para. Nuk është se ka ndarë me ta ndonjë histori kriminale, por i ka bërë pis në gjëra banale, në punësime, në begenisje, në aleanca politike, në qoka gjyqesh duke përdorur gruan, që po ashtu e çoi atje për shkak të pazareve të tij.

Është një rast i pashembullt, se si mediokriteti triumfon, dhe duke përdorur diku vanitetin, diku lëpirjen, diku paratë, diku kulinarin, diku dobësitë e udhëheqësve për njerëzit e pazot të familjes, që të duken me punë të mira, ja ka arritur të mbrohet nga gjithë shteti.

Kjo nuk ka nevojë të verifikohet, pasi është publike. Por, përkundër kësaj heshtje gardiane të shtetit, opinioni publik shqiptar është i zemëruar keqazi dhe zemërohet dita- ditës më shumë nga kjo heshtje, se sa nga milionat e guvernatorit dhe jeta luksoze e familjes së tij, të cilat po dalin në dritë, pasi guvernatorit nuk po i hyn asnjë gjemb në këmbë nga humbja e 7 milionë dollarëve.

Për skandalin ?Arsidi? në Shqipëri, për shuma shumë më të vogla dhe për transaksione bankare të verifikueshme, shkuan në burg drejtora bankash e ish- kryeministra, ndërsa këtu për një skandal të vjedhjes metodike të bankës, guvernatori mbrohet si viktimë. Banka nuk u vodh as me tanke, si më 1997 dhe as nga persona me maska. Në Bankën Qendrore, falë papërgjegjësisë së guvernatorit, ishte prodhuar një procedurë vjedhje legale dhe këtu nuk ka mëdyshje se kemi të bëjmë me një guvernator, që ose është totalisht i paaftë, ose është hajdut, ose siç besohet gjerësisht, i ka të dyja.

Tani që të jemi të qartë, ky guvernator nuk shkarkohet nga politika. Nuk ka ndaj tij as shtetarë dhe as ish- shtetarë të zemëruar. Kundër tij nuk bën dot as deputetë rebelë. Ata mund të zemërohen për ndonjë vend pune në CEZ apo ndonjë shef policie, por jo për vjedhjen e bankës. Kundër këtij njeriu tani kemi vetëm një shans, të mobilizojme opinionin publik.

Shqipëria ka provuar në rastin e armëve kimike, se opinioni publik mund të mposhtë qeverinë edhe kundër dëshirës së saj, dhe mund të nxjerrë jashtë loje këtë opozitë të blerë, të kapur, dhe të poshtëruar nga e kaluara e saj kriminale.

Opinioni publik duhet të mbahet ndezur deri në largimin e tij nga detyra. Ndryshe, kësaj gjëje të trashë dhe të majmur që na ka zënë derën e Bankës Qendrore, nuk ja dalim dot!

Mund të mos ja dalim dhe me opinionin publik, por së pari duhet ta provojmë. Një gazetar, ai e blen. Një media televizve dhe një të shkruar ai e blen. Një politikan dhe një shtetar ai e blen. Për të gjitha këto ka dhënë prova.

Opinionin publik nuk e blen dot. Nuk blen dot rrjetet sociale, qytetarët e zemëruar që mund të protestojnë ndaj tij dhe ngarkesën negative që do të marrë shteti për shkak të tij. Ne duhet ta detyrojmë qeverinë dhe opozitën, ose të bëhen gardianë me zë të Ardian Fullanit dhe ta dimë që kemi të bëjmë me një bandë hajdutësh, ose ta lëshojnë në duar të drejtësisë dhe pastaj të kemi punë vetëm me koorporatën e korrupsionit në vend.

Kjo është një sprovë e cila do të konfirmojë nëse shoqëria jonë po shkon drejt një standarti vetëkritik, apo është një shoqëri e pastabilizuar, pa një sistem vlerash dhe e manipulueshme.

Kjo sprovë e opinionit publik do të na vlejë për të testuar a është gjallë ky institucion. Kjo sprovë do të jetë një lakmues për të verifikuar nëse kapja e sistemit ka kapur dhe shoqërinë apo jo.

Nuk kemi tjetër shpresë për të rrëzuar shtatoren e këtij monumenti korrupsioni që rruhet nga shteti. Rruga mund t?i detyrojë të dorëzohen dhe të dorëzojnë njeriun që na ka fyer të gjithëve duke vjedhur dhe duke tentuar të na mbyllë gojën me lekët që na ka vjedhur.