web counter
LEXO PA REKLAMA!

SHKARKO APP

App Store
Google Play

Dita e titullit kampion/ Partizani dhe Egnatia luajnë sezonin

2024-05-26 10:55:00, Sport CNA

Partizani dhe Egnatia, luajnë mes tyre, ndeshjen më të rëndësishme të sezonit, siç është finalja për titullin kampion.

Në “Air Albania”, spektakli është i garantuar, me dy ekipet që do të luajnë gjithçka për gjithçka.

Përballë, janë dy skuadrat më të mira të sezonit, që e mbyllën kampionatin e rregullt në kuotë të barabartë pikësh dhe në dy vendet e para.

Egnatia është në kërkim të historisë, pasi ky klub nuk e ka fituar kurrë më parë titullin kampion. Pikë së pari ata janë fituesit moralë të këtij kampionati. Kryesuan që në javët e para duke e mbyllur në udhëheqje deri në të 36-ën dhe në një kampionat të rregullt do të kishin ngritur tanimë trofeun.

Fitimi i titullit kampion, do të ishte padyshim suksesi më i madh i Egnatias, që do të mbetej për dekada të tëra në librat e historisë.

Megjithatë, përballë është Partizani, skuadër që kërkon të mbrojë kurorën e kampionit, të marrë një vit më parë. Të kuqtë e kryeqytetit vijnë pas gjashtë fitoreve radhazi dhe synojnë atë të shtatën, që do të përkthehej në titullin e 18-të në histori.

Në stadiumin “Air Albania”, pritet një numër i lartë tifozësh, kryesisht të “demave”, për shkak se ndeshja luhet në kryeqytet dhe Egnatia vjen nga një qytet i vogël.

Është e vështirë për të zgjedhur favoritin në ndeshje si kjo, ku mundësitë e skuadrave janë 50 me 50.

Të kuqtë dhe rrogozhinasit janë dy skuadrat e paraqitura më mirë dhe që kanë arritur të kenë një ritëm krejt të ndryshëm me skuadrat ndjekëse.

Që kjo të ndodhë duhet punë dhe vazhdimësi, por edhe cilësi e talent. Te të dyja këto nuk mungojnë, pasi kanë arritur të bëjnë bashkë ndër lojtarët më të mirë në qarkullim në tregun tonë. Të dyja skuadrat kanë në përbërje pjesën më të madhe të lojtarëve cilësorë të këtij kampionati, të cilët do të kërkojnë kurorëzimin.

Ndeshja finale mes Egnatias dhe Partizanit, do të luhet mbrëmjen e kësaj të diele, duke nisur nga ora 19:00.





Lajmet e fundit nga