Basha rekord humbjesh në politikë/ U jep leksion të rinjëve: Të qarkullojnë elitat

15 Janar 2022, 15:29, Politikë CNA

Basha rekord humbjesh në politikë/ U jep leksion të rinjëve:

Kryetari i shkarkuar i PD Lulzim Basha ka zhvilluar një takim me të rinjtë në Tiranë, ku ka nisur tu japë “leksione” mbi të ardhmen në politikë.

Basha, njeriu që ka mbajtur në politikë çdo post të mundshëm, 4 vjet kryetar i Bashkisë Tiranë, ka qenë ministër i Brendshëm dhe Infrastrukture dhe mbi tetë vjet në krye të PD, ka deklaruar se politika nuk është dinasti dhe se duhet të qarkullojnë elitat.

Por kur duhet të qarkullojnë elitat, atëherë pse Lulzim Basha, i cili ka shënuar disa humbje në karrierën e tij, nuk u jep hapësirë të rinjve?

“Janë kohë të vështira që po kalojmë, janë bërë edhe më të vështira, pikërisht sepse një grusht njerëzish nuk duan t’i japin fund tranzicionit. Çfarë do të thotë tranzicion? Tranzicion do të thotë të kalosh nga një e kaluar diktatoriale drejt demokracisë, drejt lirisë, drejt hapjes, drejt dinjitetit të çdo njeriu ashtu siç e ka bërë Zoti. Drejt lirisë që me të vërtetë e garanton ligji siç tha Rei, por në fakt është një e drejtë natyrore me të cilën lindim, është e drejta jonë, na e ka dhënë zoti s’na e merr dot askush. E garanton ligji në mënyrë që liria ime mos të dëmtojë lirinë tënde.

Këto janë përgjegjësisë e politikës, e cila përmes institucioneve të cilat ka përgjegjësinë t’i administrojë përmes votës së qytetarëve, duke përfaqësuar qytetarët, i bën këto ligje të funksionojnë, ose ndal funksionimin e ligjeve dhe e kthen vendin në xhungël. Dhe kështu kemi përfunduar në 30 vite, në një xhungël me disa kafshë më të barabarta se disa kafshë të tjera, për të përdorur Orëellin, meq jeni dhe studentë të gazetarisë. Xhorxh Orëell, në “Fermën e Kafshëve”, një libër i famshëm tashmë për rininë shqiptare, përshkruan se si kishte një hierarki dhe megjithëse thuhej se gjithë kafshët ishin të barabarta, dukej derrat ishin më të barabartë se kafshë e tjera, i kishte zgjedhur derrat si simbol të le të themi të babëzisë.

Pse bëhet e gjithë kjo betejë? Pse bëhet gjithë kjo luftë? Në mënyrë që të qarkullohen elitat, që karriget mos të jenë të përjetshme. Politika nuk njeh karrige të përjetshme, nuk njeh dinasti. Vet koncepti i politikës është ndryshimi. Të ndryshosh, do të thotë të përmirësosh. Të ndryshosh shpesh, do të thotë ta bësh perfekt ndryshimin”, tha Basha./CNA.al