Partizani duket se ka në qendër të merkatos “dinamovitët”. Pas Xhuliano Skukës, Elsamed Burgaj është bashkuar me “demat e kuq” në stërvitje.

18-vjeçari zyrtarisht është pjesë e Dinamos dhe ka kontratë me blutë deri në fund të sezonit. Gjithsesi, ky fakt nuk e pengon aspak qendërmbrojtësin të braktisë skuadrën e Dinamos U-19 e t’i bashkohet të kuqve.

Te “nëndetësja” nuk kanë në plan ta lënë të lirë të riun dhe me shumë mundësi, atij do t’i duhet të qëndrojë pa luajtur deri në fund të sezonit, kur më pas del i lirë dhe mund të federohet si lojtar i Partizanit. Burgaj është pjesë e Kombëtares U-19 dhe shihet si një talent shumë premtues.

Nedim Bajrami është kthyer shumë shpejt në një personazh shumë të diskutuar në futbollin italian. Mesfushori i përfaqësueses shqiptare po paraqitet shumë mirë në radhët e Empolit që në vitin e tij të parë në elitën e futbollit italian dhe ka tërhequr vëmendjen e shumë klubeve. Por pakkush priste që një nga këto klube të ishte edhe Juventusi.

Klubi bardhezi ka aktualisht probleme sa i përket repartit të avancuar, me Moratën që kërkon të largohet, Dibala që nuk po rinovon e Kuluisevskin i cili nuk hyn të preferencat e Alegrit. Dëmtimi i Federiko Kiezës ka shkatërruar çdo plan që kishin bardhezinjtë, të cilët tashmë duhet të kërkojnë alternativa të tjera për fazën ofensive.

Sipas “Gazzetta Dello Sport”, edhe Nedim Bajrami hyn mes alternativave që po shqyrtohen nga bardhezinjtë që në merkaton e janarit. Empoli nuk do të heqë dorë lehtë nga lojtari, por Juventusi aktualisht duket në emergjencë të plotë dhe është gati të bëjë edhe sakrifica financiare për të plotësuar radhët me futbollistë cilësorë të cilët të ndihmojnë fazën ofensive e cila aktualisht nuk është në formën më të mirë.

Ka mjaftuar një gjysmë sezoni në Premier League dhe Armando Broja i ka dëshmuar të gjithëve se sa vlen. Sulmuesi shqiptar ka shënuar 5 gola në kampionat deri më tani dhe ka bindur Southampton-in për të synuar blerjen e kartonit të tij, shkruan Sport Ekspres. Me ardhjen e presidencës së re mundësitë ekonomike i lënë “shenjtorët” të besojnë për një mundësi të tillë, por gjithashtu janë të vetëdijshëm se nuk janë të vetëm në këtë garë.

Sipas asaj që bën me dije “Sky Sports”, Chelsea po shqyrton të gjitha pistat, duke qenë se ka shumë klube të tjera të interesuara të cilat kanë nisur që tani të pyesin për çmimin e kartonit të Armando Brojës. Media në fjalë zbulon se disa ekipe po mendojnë për transferimin e futbollistit kuqezi që në këtë muaj.