Bota
SHBA: Gjykata rrëzon nismën për vaksinimin e detyruar në sipërmarrjet e mëdha
Detyrimi për vaksinim ose test do të vlente për rreth 80 milionë të punësuar në SHBA. Qeveria e presidentit Joe Biden donte që ta vendoste këtë rregull për sipërmarrjet e mëdha. Por këto plane tani u hodhën poshtë nga Supreme Court në Uashington, që e ndali nismën në fjalë. Në argumentim thuhet, se një rregullore e tillë e nxjerrë jo nga parlamenti, por në rrugë adiministrative i tejkalon kompetencat e autoritetit përgjegjës.
Kësisoj firmat me mbi 100 të punësuar tani për tani nuk kanë nevojë të kujdesen, që punonjësit e tyre të vaksinohen ose të testohen ndaj COVID-19. Edhe detyrimi për mbajtjen e maskës tani për tani bie.
Qeveria e konsideronte këtë rregull si një mjet presioni të rëndësishëm ndaj sipërmarrjeve, që në sfondin e ngarkesës që krijohet nga testimet rregullisht t’i vinin në lëvizje punonjësit e tyre për t’u vaksinuar, në mënyrë që të rritej kuota e vaksinimit në SHBA.Deri tani në SHBA janë vaksinuar plotësisht ndaj koronavirusit 63 përqind e popullsisë – ose rreth 208 milionë vetë. Prej tyre rreth 77 milionë, ose 37 përqind kanë marrë edhe dozën përforcuese të vaksinës.
Detyrimi për vaksinim për sipërmarrjet e mëdha në fakt do të duhej të kishte nisur qysh këtë javë, por disa shtete të drejtuara nga republikanët dhe biznesmenë ngritën padi kundër kësaj rregulloreje. Tani rregullorja do të kthehet për verifikim përfundimtar në një instancë më të ulët.
Vendimi i Supreme Courts ka të bëjë me mazhorancën konservatore të gjykatës së përbërë nga nëntë gjyqtarë. Tre gjyqtarët liberalë në një qendrim të tyre shkruajnë, se autoriteti përkatës për sigurinë dhe kujdesin shëndetësor në punë (OSHA) nisur nga rreziku i madh, që vjen prej pandemisë, kishte të drejtë me vendosjen e rregullores për detyrimin për vaksinim dhe për test. Detyra e këtij autoriteti është, që të mbrojë të punësuarit nga “rreziqet e rënda”.OSHA parashikon që kjo rregullore mund të parandalojë në gjashtë mujorin e ardhshëm rreth 6.500 raste vdekjesh dhe 250.000 shtrime në spital. “Nuk ka asnjë arsye, për ta kundërshtuar këtë”, shkruajnë gjyqtarët.
“Ne nuk jemi autoritet shëndetësor”
Gjyqtarët konservatorë theksojnë në argumentimin e tyre, se ata nuk kanë gjykuar në thelb mbi legjitimitetin e detyrimit për vaksinim, por lidhur me atë se cili është organi kompetent për ta marrë këtë vendim: A ishte urdhëresa legjitime dhe a është ky autoritet federal përgjegjës për këtë? “Kjo gjykatë nuk është autoritet shëndetësor”, nënvizojnë gjyqtarët. Problemet e kujdesit shëndetësor janë nën kompetencën e shteteve federale dhe të komunave.
Pandemia po vazhdon prej dy vjetësh, por kongresi në Uashington nuk ka votuar që t’ia kalojë OSHA-së ose një tjetër autoriteti federal kompetencën për të urdhëruar detyrimin për vaksinë, shpjegojnë gjyqtarët. “Ajo që na u parashtrua ne për zgjidhje nuk ishte reagimi ndaj pandemisë, por kush i ka kompetencat për të vendosur mbi këtë”, shkruajnë gjyqtarët. Në një rast të tillë përgjigja është e qartë: në bazë të së drejtës aktuale kompetencën e kanë shtetet federale dhe kongresi, jo OSHA-ja.”
Detyrimi për vaksinim i personelit mjekësor
Në një vendim tjetër për detyrimin për vaksinim të personelit mjekësor në spitale dhe shtëpitë e kujdesit, që mbështetet financiarisht nga federata, Gjykata Supreme i dha të drejtë qeverisë. Bazuar në situatën ligjore në fuqi qeveria ka kompetencën, të kujdeset për shendetin dhe sigurinë e pacientëve në programet e shërbimit dhe asistencës mjekësore. Kësisoj për shumicën e institucioneve të shëndetësisë vlen detyrimi për vaksinim ndaj koronavirusit./DW
Bota
SHBA, Gjykata e Lartë bllokon urdhrin për vaksinim të detyruar në bizneset e mëdha
Gjykata e Lartë e SHBA-së bllokoi të enjten një urdhër të administratës së Presidentit Joe Biden për vaksinim ose testim të detyrueshëm për COVID-19 në bizneset e mëdha, në një kohë kur infeksionet po përhapen me shpejtësi.
Nga ana tjetër, gjykata më e lartë e vendit la në fuqi urdhrin për vaksinim të punonjësve të kujdesit shëndetësor.
Gjykata i mori vendimet pasi dëgjoi të premten argumentet pro dhe kundër në betejën ligjore mbi urdhrat për vaksinimin e detyruar që u ndërmorën nga dy agjenci federale me synimin për rritjen e normave të vaksinimit në SHBA dhe sigurisë në vendet e punës dhe mjediset e kujdesit shëndetësor.
Këto çështje vunë në provë se deri ku mund të shkojnë kompetencat presidenciale për të përballuar krizën në rritje të shëndetit publik që deri tani ka shkaktuar vdekjen e më shumë se 845,000 amerikanëve.
Gjykata ishte e ndarë në të dyja rastet. Gjykata vendosi me gjashtë vota të anëtarëve konservatorë pro dhe tre të atyre liberalë kundër, për të bllokuar vendimin për vaksinimin e detyruar në bizneset me më shumë se 100 punonjës.
Për të mbajtur në fuqi detyrimin për vaksinimin e punonjësve shëndetësore, votimi ishte 5-4, pasi kryetari i gjykatës John Roberts dhe gjykatësin Brett Kavanaugh, të dy konservatorë iu bashkuan krahut liberal.
Shtëpia e Bardhë ka thënë se dy urdhrat do të shpëtojnë jetë dhe do të forcojnë ekonominë e SHBA-së duke rritur numrin e amerikanëve të vaksinuar.
Entitetet që kishin ngritur paditë, përfshirë shtete të drejtuar nga republikanë dhe një aleancë biznesi dhe grupesh fetare, kishin argumentuar se agjencitë federale kishin tejkaluar kompetencat e tyre, kur lëshuan urdhrat pa autorizimin e Kongresit.
Shqyrtimi i këtyre dy çështjeve nga Gjykata e Lartë nxorri në pah se sa përçarëse është bërë çështja e vaksinimit në Shtetet e Bashkuara./ VOA
Bota
Tensionet mes Rusisë dhe Ukrainës në qendër të takimit të OSBE-së
Përpjekjet për të zbutur tensionet përgjatë kufirit Rusi-Ukrainë po vazhdojnë të enjten në Vjenë me një takim të Këshillit të Përhershëm të Organizatës për Siguri dhe Bashkëpunim në Evropë (OSBE).
Seanca pason një takim dypalësh mes Rusisë dhe Shteteve të Bashkuara në Gjenevë të hënën dhe bisedimeve mes Rusisë dhe NATO-s të mërkurën në Bruksel.
Zëdhënësi i Departamentit të Shtetit, Ned Price u tha gazetarëve se pas takimit të së enjtes, palët do të reflektojnë mbi bisedimet dhe “të përcaktojnë hapat e ardhshëm të duhur.”
Zoti Price tha të mërkurën se Shtetet e Bashkuara presin që delegacionet ruse në tre grupet e takimeve “t’i raportojnë Presidentit [rus] [Vladimir] Putin dhe ne të gjithë shpresojmë që ai të zgjedhë paqen dhe sigurinë. Ne jemi të sinqertë dhe të vendosur kur themi se preferojmë rrugën e diplomacisë dhe dialogut.”
Shtetet e Bashkuara dhe aleatët e saj në NATO-s i kanë kërkuar Rusisë të ulë tensionet dhe që situata të zgjidhet në rrugë diplomatike, dhe të mërkurën ofruan propozime për hapa reciproke për të pakësuar rreziqet, për të përmirësuar transparencën dhe komunikimin, si edhe kontrollin e armëve.
Zëvendës Sekretarja amerikane e Shtetit Wendy Sherman, që drejtoi delegacionin amerikan në Bruksel, tha në një konferencë për shtyp se takimi NATO-Rusi përfundoi me “një kërkesë të qartë” ndaj Moskës për të ulur tensionet dhe “për të zgjedhur rrugën e diplomacisë, për të vazhduar të angazhohet në dialog të sinqertë dhe reciprok, në mënyrë që së bashku të mund të identifikojmë zgjidhje që përmirësojnë sigurinë për të gjithë”.
Pas takimit që zgjati afro katër orë të mërkurën, zonja Sherman tha, “se as nuk pati angazhim për të ulur tensionet, por as ndonjë deklaratë se që nuk do të kishte një angazhim të tillë.”
Ajo shtoi se Rusisë iu bë e qartë se është shumë e vështirë që të veprojë diplomacia kur ka 100,000 trupa të saj pranë kufirit ukrainas.
Sekretari i Përgjithshëm i NATO-s, Jens Stoltenberg tha se ai ka propozuar idenë për një sërë takimesh me Rusinë, e cila kërkoi kohë për të kthyer një përgjigje.
“Aleatët e NATO-s janë të gatshëm të angazhohen në dialog me Rusinë, por ne nuk do të bëjmë kompromis mbi parimet themelore, ne nuk do të bëjmë kompromis për sovranitetin dhe integritetin territorial të asnjë vendi në Evropë,” u tha zoti Stoltenberg gazetarëve në Bruksel.
Rusia ka kërkuar garanci sigurie si tërheqja e trupave dhe pajisjeve ushtarake të NATO-s nga vendet në kufi me Rusinë dhe kufizime në zgjerimin e aleancës së NATO-s. Ajo gjithashtu ka mohuar të ketë plane për të pushtuar Ukrainën./voa
Kosova & Rajoni
Situata epidemiologjike në Kosovë/ Regjistrohen 427 raste të reja me Covid dhe dy humbje jete
Ministria e Shëndetësisë në Kosovë, ka njoftuar ditën e sotme janë regjistruar 427 raste të reja me koronavirus, pas testimit të 5.881 mostrave.
Shkalla e pozitivitetit nga mostrat e marra është 7.26 për qind.
Në 24 orët e fundit nuk janë regjistruar dy viktima.
Autoritetet shëndetësore kanë njoftuar edhe se 31 persona janë shëruar derisa 2.811 persona janë ende aktivë në koronavirus.
Prej shpërthimit të pandemisë në mars të vitit 2020, autoritetet kosovare kanë regjistruar mbi 163.000 raste të infektimit.
Prej tyre 2.994 persona kanë vdekur.
Kosova ka nisur fushatën e vaksinimit kundër koronavirusit në mars të vitit të kaluar.
Prej atëherë janë dhënë mbi 1.7 milion doza të vaksinës.
Qytetarët në Kosovë mund të marrin vaksina të kompanive: Pfizer/BioNTech dhe AstraZeneca.
Doza përforcuese e vaksinës mund të merret pas tre muajve të marrjes së dozës së dytë./rel
