Mes Paulo Dibalës dhe Juventusit, ndoshta bisedimet duhet të rifillojnë edhe një herë nga e para, duke qenë se në 48 orët e fundit tonet janë nxehur më shumë se ç’duhet.

Nëse të martën kishte qarkulluar lajmi se klubi ka vendosur që ta ulë ofertën nga 8 në 7 milionë euro neto, plus 2 milionë të tjera bonuse, është një tjetër deklaratë e fortë e drejtorit të përgjithshëm, Mauricio Arrivabene, pas asaj përpara ndeshjes me Romën (“Dibala të tregojë se i vlen paratë që kërkon”), e cila tensionon edhe më shumë ambientin.

“Ajo që kam thënë për Dibalën vlen për të gjithë lojtarët e Juves. Dua të shoh karakter, grintë dhe dëshirë për të fituar. Aq më shumë nga ai që mban numrin 10 të Juventusit mbi shpatulla. Ka ardhur koha që Paulo ta tregojë se e përballon peshën e këtij numri te ne, pasi kërkesat që bëhen edhe duhet të justifikohen në fushë”, u shpreh Arrivabene.

SHPËRTHEN DIBALA – Por këto fjalë të radhës të ashpra nga drejtori Arrivabene, që Paulo Dibala ndoshta i ka mësuar vetëm në fund të ndeshjes me Interin, kanë irrituar shumë sulmuesin argjentinas.

Të paktën sipas asaj që raportoi dje në mesnatë rrjeti “TyCSports”, futbollisti bardhezi duket se i ka raportuar klubit se nuk ka më ndër mend që të rinovojë marrëveshjen me “Zonjën e Vjetër” dhe do të nisë të vlerësojë ofertat tani e në vazhdim.

Sipas televizionit argjentinas, jo vetëm oferta në ulje, por edhe kritikat e vazhdueshme në kohët e fundit nga drejtori i përgjithshëm kanë nervozuar tepër numrin 10 bardhezi, i cili tani më shumë se kurrë rrezikon që të largohet me parametër zero nga Torino, një luks që Juventusi nuk mund ta përballojë dhe duhet ta shmangë me çdo kusht.

Një episod i turpshëm ka ndodhur në përfundim të sfidës Inter-Juventus, finalja e Superkupës së Italisë që u zhvillua të merkurën në mbrëmje në “San Siro”.

Leonardo Bonucci, që ishte gati për tu futur në fushë për të gjuajtur penalltitë, ngriu në vend nga goli i Sanchez në minutën e 121-të, dhe goditi me shpullë sekretarin zikaltër Cristiano Mozzillo në shkallët që të çojnë në dhomat e zhveshjes.

Gjithçka është filmuar nga një tifoz dhe video është bërë virale në rrjet. Mbrojtësi rrezikon skualifikimin. Ka shtyrje dhe shpulla me drejtuesin e Interit, që kërkon të shpëtojë nga shpërthimi i mbrojtësit të Juventusit.

Nuk dihet arsyeja e zënkës, por mund të imagjinohet nervozizmi për një humbje në sekondat e fundit, ose ndoshta festimi i golit nga drejtuesi i Interit ka “çmendur” lojtarin juventin.

Si può perdere male, malissimo e poi c’è #Bonucci #InterJuventus #SupercoppaItaliana pic.twitter.com/uWMNRqTSrQ

— BELLIDEROMA (@BELLIDEROMA) January 13, 2022

Skënderbeu bëhet gati për një tjetër shitje. Klubi danez i Odenses ka ofruar 100 mijë euro për të marrë shërbimet e Marës, ndërsa i lë Skënderbeut 20% të pronësisë së kartonit. Një ofertë e parë kjo shumë e ulët, që ka detyruar drejtuesit bardhekuq të refuzojnë. Klubi ka vendosur edhe një çmim minimal të uljes për bisedime. Të njëjtat burime treguan se presidenti Ardjan Takaj është i vendosur të mos ulet për të biseduar shitjen e Marës, pa një shumë minimale prej 300 mijë eurosh.

Të paktën është kjo ajo që kërkon klubi korçar për të lënë të lirë fantazistin, shkruan “Panorama Sport”.  Për momentin një shumë e tillë është disi e vështirë të arrihet nga dy klubet daneze. Nga ana tjetër, po shqyrtohet edhe një tjetër mundësi. Kjo ka të bëjë me huazimin gjashtëmujor të Marës në Danimarkë dhe më pas një klauzolë me detyrim blerjeje nëse përmbushen kushtet. Një zgjidhje alternative që deri diku mban të kënaqura të dyja palët, por që mbetet të diskutohet se sa do të jetë shuma e huazimit nëse arrihet një marrëveshje. Gjithsesi, për momentin transferimi është pezull.