Bota
Tensionet mes Rusisë dhe Ukrainës në qendër të takimit të OSBE-së
Përpjekjet për të zbutur tensionet përgjatë kufirit Rusi-Ukrainë po vazhdojnë të enjten në Vjenë me një takim të Këshillit të Përhershëm të Organizatës për Siguri dhe Bashkëpunim në Evropë (OSBE).
Seanca pason një takim dypalësh mes Rusisë dhe Shteteve të Bashkuara në Gjenevë të hënën dhe bisedimeve mes Rusisë dhe NATO-s të mërkurën në Bruksel.
Zëdhënësi i Departamentit të Shtetit, Ned Price u tha gazetarëve se pas takimit të së enjtes, palët do të reflektojnë mbi bisedimet dhe “të përcaktojnë hapat e ardhshëm të duhur.”
Zoti Price tha të mërkurën se Shtetet e Bashkuara presin që delegacionet ruse në tre grupet e takimeve “t’i raportojnë Presidentit [rus] [Vladimir] Putin dhe ne të gjithë shpresojmë që ai të zgjedhë paqen dhe sigurinë. Ne jemi të sinqertë dhe të vendosur kur themi se preferojmë rrugën e diplomacisë dhe dialogut.”
Shtetet e Bashkuara dhe aleatët e saj në NATO-s i kanë kërkuar Rusisë të ulë tensionet dhe që situata të zgjidhet në rrugë diplomatike, dhe të mërkurën ofruan propozime për hapa reciproke për të pakësuar rreziqet, për të përmirësuar transparencën dhe komunikimin, si edhe kontrollin e armëve.
Zëvendës Sekretarja amerikane e Shtetit Wendy Sherman, që drejtoi delegacionin amerikan në Bruksel, tha në një konferencë për shtyp se takimi NATO-Rusi përfundoi me “një kërkesë të qartë” ndaj Moskës për të ulur tensionet dhe “për të zgjedhur rrugën e diplomacisë, për të vazhduar të angazhohet në dialog të sinqertë dhe reciprok, në mënyrë që së bashku të mund të identifikojmë zgjidhje që përmirësojnë sigurinë për të gjithë”.
Pas takimit që zgjati afro katër orë të mërkurën, zonja Sherman tha, “se as nuk pati angazhim për të ulur tensionet, por as ndonjë deklaratë se që nuk do të kishte një angazhim të tillë.”
Ajo shtoi se Rusisë iu bë e qartë se është shumë e vështirë që të veprojë diplomacia kur ka 100,000 trupa të saj pranë kufirit ukrainas.
Sekretari i Përgjithshëm i NATO-s, Jens Stoltenberg tha se ai ka propozuar idenë për një sërë takimesh me Rusinë, e cila kërkoi kohë për të kthyer një përgjigje.
“Aleatët e NATO-s janë të gatshëm të angazhohen në dialog me Rusinë, por ne nuk do të bëjmë kompromis mbi parimet themelore, ne nuk do të bëjmë kompromis për sovranitetin dhe integritetin territorial të asnjë vendi në Evropë,” u tha zoti Stoltenberg gazetarëve në Bruksel.
Rusia ka kërkuar garanci sigurie si tërheqja e trupave dhe pajisjeve ushtarake të NATO-s nga vendet në kufi me Rusinë dhe kufizime në zgjerimin e aleancës së NATO-s. Ajo gjithashtu ka mohuar të ketë plane për të pushtuar Ukrainën./voa
Kosova & Rajoni
Situata epidemiologjike në Kosovë/ Regjistrohen 427 raste të reja me Covid dhe dy humbje jete
Ministria e Shëndetësisë në Kosovë, ka njoftuar ditën e sotme janë regjistruar 427 raste të reja me koronavirus, pas testimit të 5.881 mostrave.
Shkalla e pozitivitetit nga mostrat e marra është 7.26 për qind.
Në 24 orët e fundit nuk janë regjistruar dy viktima.
Autoritetet shëndetësore kanë njoftuar edhe se 31 persona janë shëruar derisa 2.811 persona janë ende aktivë në koronavirus.
Prej shpërthimit të pandemisë në mars të vitit 2020, autoritetet kosovare kanë regjistruar mbi 163.000 raste të infektimit.
Prej tyre 2.994 persona kanë vdekur.
Kosova ka nisur fushatën e vaksinimit kundër koronavirusit në mars të vitit të kaluar.
Prej atëherë janë dhënë mbi 1.7 milion doza të vaksinës.
Qytetarët në Kosovë mund të marrin vaksina të kompanive: Pfizer/BioNTech dhe AstraZeneca.
Doza përforcuese e vaksinës mund të merret pas tre muajve të marrjes së dozës së dytë./rel
Kosova & Rajoni
Kurti: Serbët e Kosovës votim me postë ose tek zyra ndërlidhëse
Pas një bisede telefonike që kryeministri i Kosovës pati me kryediplomatin e BE, Josep Borrell, ai u shpreh, se serbët e Kosovës mund të votojnë në referendumin e Serbisë vetëm me postë ose përmes zyrës ndërlidhëse.
Në lokalitetet e banuara me shumicë serbe në Kosovë nuk do të ketë hapje të qendrave të votimit, por serbët e Kosovës që kanë dy shtetësi mund të votojnë në referendumin në Serbi përmes postës dhe zyrës ndërlidhëse të Serbisë në Kosovë. Të dielën më 16 janar, Serbia mban një referendum, në të cilin qytetarët e saj do të deklarohen lidhur me pyetjen: “A jeni për konfirmimin e aktit për ndryshimin e Kushtetutës së Republikës së Serbisë?”.
Kryeministri i Kosovës, Albin Kurti, të mërkurën në mbrëmje zhvilloi një bisedë telefonike me shefin e diplomacisë evropiane Josep Borrell dhe tha se qëndrimin e Kosovës lidhur me referendumin në Serbi ia konfirmoi edhe zotit Borrell. “Ia transmetova qëndrimin tonë: serbët në Kosovë, të cilët kanë shtetësi të dyfishtë mund të votojnë në referendumin e Serbisë nëpërmjet postës apo në zyrën ndërlidhëse në Prishtinë. Një referendum në territorin sovran të një shteti tjetër nuk është praktikë e pranuar në asnjë vend demokratik”, shkroi Albin Kurti në Twitter pas bisedës telefonike që zhvilloi me Josep Borrell.
Borrell: Të ushtrohet e drejta për të votuar
Kreu i diplomacisë evropiane, Josep Borrell është shprehur, se për referendumin e Serbisw ka folur edhe me kryeministrin e Kosovës, Albin Kurti dhe me presidentin serb, Aleksandër Vuçiq. Sipas tij, qytetarët duhet të lejohen ta ushtrojnë të drejtën e tyre për të votuar. “Kam folur me kryeministrin e Kosovës, Albin Kurti dhe presidentin e Serbisë, Aleksandër Vuçiq në lidhje me referendumin për Kushtetutën që organizohet të dielën në Serbi. Mbledhja e votave në të kaluarën, është bërë përmes lehtësimit të OSBE-së. Qytetarët duhet të jenë në gjendje të ushtrojnë të drejtën e tyre për të votuar”, shkroi Borrell të enjten në Twitter.
Vuçiq: Pasoja afatgjata
Vetë presidenti i Serbisë, Aleksandër Vuçiq është shprehur të mërkurën, se moslejimi i mbajtjes së referendumit në zonat e banuara me shumicë serbe në Kosovë “do ketë pasoja afatgjata përtej asaj çfarë mendojnë shqiptarët dhe komuniteti ndërkombëtar”. “Pasojat do të jenë të gjëra për ata që duan të ndalojnë votimin e serbëve në referendum. Kërkesa ime për të gjithë komunitetin ndërkombëtar është që të informojë fëmijën e tyre që e përkëdhel dhe kujdeset aq shumë, se duhet të respektojë marrëveshjet. Pasojat do të jenë shumë të rënda nëse kjo ndodh, më të rënda se ç’supozojnë shqiptarët e Quint-i”, ka thënë Vuçiq për mediat publike në Serbi. Ai i bëri thirrje diplomatëve perëndimorë që të bëjnë presion mbi Prishtinën, ndërkohë, i kërkoi OSBE-së, që të trajtojë referendumin e Serbisë njësoj si është vepruar me votimet për zgjedhjet e Serbisë në Kosovë.
Pse Kosova mban qëndrim ndryshe ndaj referendumit?
Kosova nuk e ka ndaluar organizimin e mbajtjen e zgjedhjeve të Serbisë në Kosovë, por në rastin e referendumit situata është më ndryshe, thonë zyrtarë të qeverisë. “Duhet bërë dallimi mes referendumit për një çështje ekskluzivisht të brendshme të një vendi dhe zgjedhjeve. Në rastin konkret, Serbia po organizon referendum për sistemin e organizimit shtetëror të Serbisë, përkatësisht sistemin e drejtësisë”, ka thënë qeveria e Kosovës.
Të dielën më 16 janar Serbia mban një referendum në të cilin qytetarët e saj do të deklarohen në pyetjen “a jeni për konfirmimin e aktit për ndryshimin e Kushtetutës së Republikës së Serbisë?”. Ndryshimet kanë të bëjnë me gjyqësorin dhe janë pjesë e përpjekjeve të shtetit të Serbisë për t’u afruar me strukturat e Bashkimit Evropian.Autoritetet e Kosovës disa herë kanë përsëritur se Serbia do të duhej të ndryshonte kushtetutën e saj për të hequr pjesën në të cilën thuhet, se Kosova “është pjesë përbërëse e territorit të Serbisë”./DW
Bota
“Digjet” Australia/ I nxehti kap shifra rekord
Autoritetet australiane kanë raportuar se temperatura në brigjet e Australisë ka arritur në 50.7 gradë Celsius, duke barazuar rekordin e vitit 1962.
Kjo temperaturë e lartë është raportuar në Onslou të Australisë Perëndimore, derisa ajo e viteve më parë ishte regjistruar në jug të Australisë.
Onslou dhe rajonet përreth, mund të regjistrojnë temperatura rekorde sërish, pasi moti pritet të jetë edhe më i nxehtë të premten.
Këto temperatura janë regjistruar pasi Australia Perëndimore është përballur me zjarre të mëdha muajin e kaluar.
Si pasojë e tyre, janë djegur mbi 6,000 hektarë tokë dhe shumë persona janë evakuuar.
Përveç Onslout, edhe qytezat tjera si, Mardi dhe Robërn, kanë regjistruar temperatura mbi 50 gradë Celsius të enjten.
Valët e nxehtësisë janë duke u bërë secilën herë e më ekstreme, për shkak të ndryshimeve klimatike, të nxitura nga njeriu.
Bota veçse është ngrohur për 1.2 gradë Celsius prej nisjes së epokës industriale dhe temperaturat pritet të rriten, përveç nëse qeveritë nëpër botë marrin masa për të kufizuar emetimet e karbonit./ REL
