Socialistët nuk e përjashtojnë si mundësi që në krye të shtetit të vendosin për herë të parë një grua.

Këtë e ka konfirmuar edhe kryeparlamentarja Lindita Nikolla. Ajo është shprehur se nuk përjashtohet si mundësi, por e rëndësishme është që të jetë një person me integritet moral dhe profesional.

Pyetjes nëse ka marrë një propozim për të qenë ajo presidente, në rast se Gjykata Kushtetuese shkarkon Metën, Nikolla përgjigjet:

“Jo asnjë propozim, jam duke ushtruar funksionet që më janë besuar si kryetare e Kuvendit. Jam e angazhuar për të përmbushur këtë besim të dhënë nga Partia Socialiste dhe deputetët e Kuvendit të Shqipërisë”, tha Nikolla.

Gjithashtu Nikolla ka folur për zgjedhjet e pjesshme vendore në 6 Mars, si dhe ka treguar se ku socialistët do të kenë përballjen më të fortë.

“Ju iu referuat Shkodrës, duke e evidentuar si bastion, patjetër Durrësi i cili është një qytet i madh me shumë kontribute dhe problematika”.

Përveç Lulzim Bashës, shumica socialiste do të ketë kundërshtar në zgjedhje dhe ish-kryeministrin Sali Berisha.

“Janë zgjedhje të lira, sa kohë që këto zgjedhje janë sipas ligjit patjetër janë të mirëkuptuar në atë që janë pjesë e konkurencës politike edhe në zgjedhjet lokale”, tha Nikolla.

“KQZ njeh ato parti që njeh dhe gjykata. Sot dhe gjithë ditën është i qartë spektri politik në vend sepse kjo është një normë që vendoset nga Gjykatat”, thekson Nikolla./A.E- CNA.al

Qeveria shqiptare vendosi të marrë një hua tjetër me vlerë 184 milionë rialë sauditë ose rreth 48 milionë dollarë, me qëllimin për të përfunduar punimet në një segment rrugor 43 kilometra të gjatë, një rrugë me dy  korsi që pritet të lidhë fshatin Qukës në Librazhd me Qafën e Plloçës në Pogradec, duke shkurtuar në këtë mënyrë rrugën Tiranë-Korçë.

Këshilli i Ministrave miratoi në parim të mërkurën marrëveshjen e huasë shtesë me Fondin Saudit për Zhvillim, një agjenci e Mbretërisë Saudite që jep kredi zhvillimi nëpër vende të ndryshme të botës. Sipas vendimit të publikuar, sauditët kanë rënë dakord të japin 184 milionë rialët pasi kanë dhënë një pjesë të kredisë fillestare si dhe një kredi tjetër shtesë në vitin 2014.

Rruga në ndërtim

Punimet për ndërtimin e kësaj rruge nisën me forcat e buxhetit të shtetit në vitin 2009 dhe përparuan për 2.9 kilometra para se një konsorcium kreditorësh, përfshirë Bankën Islamike për Zhvillim, Fondin Opek, Fondin Abu Dhabi dhe Fondin Saudit, i erdhën në ndihmë për të financuar pjesën tjetër të rrugës. Punimet realisht nisën në vitin 2013, por ndryshimet në projektin e rrugës, të ndërmarra nga qeveria e re, e rritën menjëherë koston me 25 milionë dollarë të tjera, të cilat u siguruan me një kredi të dytë nga sauditët në vitin 2014. Punimet duhej të kishin përfunduar sipas kontratës rreth vitit 2018, por tre vjet pas tejkalimit të afatit, rruga nuk është ndërtuar dhe do të kërkojë, përveç kohës shtesë, edhe 48 milionë dollarë të tjera.

Kreditë e dhëna për këtë rrugë kanë afat shlyerje të gjatë dhe një periudhë fillestare pesëvjeçare gjatë së cilës nuk paguhet principal, por vetëm interesa. Megjithatë, ndërsa rruga mbetet e pandërtuar, taksapaguesit paguajnë interesat pa e përdorur investimin e kryer në këtë rrugë. Shqipëria filloi të paguajë principalin e kredisë së parë në vitin 2019, kohë në të cilën rruga duhej të kishte filluar të përdorej.

Qeveria e kryeministrit Edi Rama erdhi në pushtet në vitin 2013, mes të tjerave, duke u tallur me nismat e shumta të qeverisë paraardhëse për ndërtim rrugësh pa pasur paratë. Ai sajoi edhe togfjalëshin “rrugët e mbetura rrugëve”. Nëntë vjet më vonë, disa nga rrugët e nisura nga qeveria e tij kanë mbetur rrugëve gjithashtu dhe Qukës-Qafë Pllocë nuk është segmenti i vetëm. Rruga Kardhiq – Sarandë duhej të kishte përfunduar, por u përball me një tunel të shembur dhe me mbi 80 milionë euro investim, ndërsa rruga e Dibrës, e nisur me një kontratë koncesioni, është aktualisht e përbërë nga një segment malor që bie në kategorinë e rrugës së fshatit, pavarësisht se pritet t’i kushtojë taksapaguesve mbi 330 milionë euro./BIRN

Një 60-vjeçar është kërcënuar me armë zjarri mbrëmjen e sotme në Shkodër pas një sherri për pronën.

Sipas njoftimit te policise, më datë 26.01.2022, rreth orës 19:05, në fshatin Kasnec, Njësia Administrative Pult, Bashkia Shkodër, shtetasit P. A., 54 vjeç dhe N. A., 46 vjeç (vëllezër), banues në fshatin Dukagjin i Ri Krujë, për motive pronësie kanë kanosur shtetasin N. U., 60 vjeç, banues në fshatin Kasnec Shkodër, dhe  kanë qëlluar me armë zjarri në ajër në oborrin e banesës së tij.

Shërbimet e Policisë me marrjen e njoftimit kanë shkuar mënjëherë ë  vendin e ngjarjes  dhe vijon  krehja e zonës  me qëllim kapjen e autorëve.

Grupi hetimor po punon  për sqarimin e rrethanave të ngjarjes./CNA.al