Detajet/ Ku dhe si do të zhvillohet Kuvendi i 11 Dhjetorit

3 Dhjetor 2021, 10:10, Politikë CNA
Detajet/ Ku dhe si do të zhvillohet Kuvendi i 11 Dhjetorit

“Foltorja” e ish-kryeministrit Sali Berisha tashmë ka siguruar mbi 5 mijë firma, të cilat vazhdojnë dhe mblidhen ditë pas dite dhe organizatorët, qartazi tashmë janë duke përfunduar detajet e fundit të mbledhjes së Kuvendit Kombëtar, në datën 11 Dhjetor.

Ata duket se po punojnë në detaje, që nga mandatet që do t?iu shpërndahen delegatëve, deri tek vendi ku do zhvillohet.

CNA.al ka mësuar nga burime pranë grupit organizator, se Kuvendi Kombëtar i datës 11 Dhjetor, do të mbahet në stadiumin “Air Albania”.

Pra, pjesëmarrja e madhe, numri i madh i delegatëve, por edhe të ftuarit apo pjesa e hapur për pjesëmarrësit që kanë dëshirë të jenë prezent, i ka detyruar organizatorët që të kalojnë nga pallati i Kongreseve në “Air Albania”. Një ambient ku pak kohë më parë mbajti Asamblenë edhe Partia Socialiste.

Ndoshta edhe për shkak të situatës së Covid-it, mbajtja në stadiumin “Air Albania”, është një tjetër faktor mjaft domethënës për Kuvendin e datës 11.

CNA.al gjithashtu ka mësuar se tashmë ka filluar shpërndarja e mandateve për personat që kanë firmosur.

Mandatet janë të përgatitura me emër, mbiemër, dhe kanë një barcod.

Ky barcod, do të skanohet nga personat e stafit dhe lehtësisht më pas nëpërmjet një programi, të gjithë skanimet do të tregojnë saktësisht sesa është numri i personave me mandat prezent në Kuvend dhe emrin e secilit personi që është paraqitur.

Pra, një tjetër proçedurë mjaft e saktë, për të treguar numrin prezent në sallë, për çdo vendim që do të ketë nga ky Kuvend, dhe për të mos ngjallur debate në lidhje me numrin e njerëzve.

Pallati i Kongreseve është një ambient i vogël dhe ndoshta do të ishte e pamundur futja e mbi pesë mijë personave me mandat apo edhe mijëra të tjerëve që do të kenë dëshirë të jenë prezent.

Detajet janë duke u përfunduar. Mandatet duke u shpërndarë.

Vendosja në “Air Albania” mund të jetë në dy pozicione. Në atë anësor ku mund të jenë delegatët dhe në ballorin ku mund të vendosen të gjithë të ftuarit e tjerë.

Pra, pritet që eventi, pra Kuvendi Kombëtar i datës 11 Dhjetor, të ketë të paktën 10 mijë persona prezentë. Nga të cilët pesë mijë janë personat me mandate dhe rreth pesë mijë të tjerë që do të jenë persona të ftuar, aktivistë, anëtarë, simpatizanë, pjesë të strukturave të Partisë Demokratike, qytetarë, të cilët kanë qënë dhe mbështetësit e “Foltores” në këto tre muaj që ajo ka zhvilluar aktivitetet e saj anembanë Shqipërisë.

Kuvendi i datës 11 Dhjetor, pritet të jetë një akt final i një lëvizje që pritet të sjellë shumë ndryshime në Partinë Demokratike. Që nga largimi i Lulzim Bashës deri tek riformatimi i plotë i partisë më të madhe opozitare në vend./CNA.al

Lajmet e fundit nga