Inspektoriati i Lartë i Drejtësisë ka propozuar shkarkimin nga detyra të prokurores Belina Zeneli.

Inspektorët e ILD kanë paraqitur sot para Këshillit të Lartë të Prokurorisë parashtresat dhe konkluzionet për procedimin disiplinor ndaj magjistrates.

Në një njoftim për mediat, Inspektori i Lartë i Drejtësisë ka përfunduar hetimin disiplinor, të nisur bazuar në ankesën e depozituar nga Prokurori i Përgjithshëm, duke ngritur pretendime për zvarritje të pajustifikuara të veprimeve procedurale për tre magjistratë, XH.M., B.Z. dhe R.K. me detyrë prokurorë në Prokurorinë pranë Gjykatës së Shkallës së Parë Dibër. Nga hetimi disiplinor i kryer nga inspektorë të ILD, për prokurorët XH.M. dhe R.K., provat ishin të pamjaftueshme për të provuar kryerjen e shkeljes disiplinore, ndërsa hetimi ka vijuar për prokuroren B.Z.

Nga hetimi disiplinor i kryer nga Inspektori i Lartë i Drejtësisë, në analizë të punës së kësaj magjistrateje në periudhën 2013-2021, provohet se:

-Nga ana e prokurores B.Z. janë ndërmarrë veprime dhe mosveprime, që përbëjnë mospërmbushje të pajustifikuar dhe të përsëritur të funksioneve gjatë hetimit, duke sjellë zvarritje të pajustifikuara të akteve procedurale, të cilat janë të detyrueshme për zbatim nga ana e magjistratëve.

-Si pasojë e veprimeve e mosveprimeve të magjistrates, nuk i janë dhënë zgjidhje ligjore 33 procedimeve penale, si dhe nuk është kryer asnjë veprim verifikimi në lidhje me 300 kallëzime.

-Magjistratja ka zvarritur hetimet paraprake duke mos i kryer veprimet hetimore në kohë dhe në dinamikë për periudha të gjata kohore të gjata, tej afateve procedurale dhe pa pasur arsye ligjore.

-Magjistratja ka kryer të njëjtën shkelje, gjatë periudhës kohore 2013 – 2021, duke bërë që shkelja të jetë vazhduese.

-Shkeljet proceduriale të kryera nga magjistratja, provohen të jenë kryer me dashje direkte. Kjo bazuar në formimin dhe eksperiencën e gjatë si prokurore, si dhe për faktin se për këto lloj shkeljesh, ndaj saj në vitin 2014 është dhënë masa disiplinore “Vërejtje me paralajmërim për shkarkim nga detyra”.

-Veprimet e magjistrates B.Z. kanë sjellë pasoja në dhënien e drejtësisë dhe kanë cënuar imazhin e organit të akuzës duke ulur besimin e publikut tek drejtësia.

Veprimet dhe mosveprimet e magjistrates B.Z. përbëjnë shkelje shumë të rëndë disiplinore, që diskrediton pozitën dhe figurën e prokurorit gjatë ushtrimit të detyrës dhe Inspektori i Lartë i Drejtësisë i propozon Këshillit të Lartë të Prokurorisë masën disiplinore “Shkarkim nga detyra”, parashikuar nga neni 105, pika 1, shkronja “dh” dhe neni 111, pika 2 të ligjit nr. 96/2016 “Për statusin e gjyqtarëve dhe të prokurorëve në Republikën e Shqipërisë”, i ndryshuar, si dhe neni 148/d, pika 2, shkronja “a” e Kushtetutës së Republikës së Shqipërisë./CNA.al

Drejtori i Përgjithshëm i Policisë së Shtetit, Gledis Nano ka paralajmëruar zbardhjen e vrasjeve të bujshme që kanë tronditur vendin.

Në një deklaratë për mediat, Nano tha se po kryhen hetime të cilat do të bëhen të ditura, kur të ketë rezultate.

I pyetur nga gazetarët në lidhje me vrasjet e bujshme të mbetura pa autor, Nano tha se “Çështjet janë në hetim. Do të ketë rezultate. Jemi duke zhvilluar hetime të rëndësishme.

Ajo që dua të garantoj është që policia është e angazhuar për hetime cilësore me qëllim vënien para përgjegjësisë të të gjithë autorëve të ngjarjeve kriminale”.

Nano u pyet nga gazetarët për sjelljet jo të mira të efektivëve të policisë ndaj qytetarëve. Ai tha se ndaj çdo individi të tillë do të merren masa.

“Që prej marrjes së detyrës jam shprehur qartë për një qasje tjetër në raport me qytetarët. Jam i vendosur që për çdo sjellë të pahijshme të merren masat ndaj efektivëve. Unë jam për një polici profesionale dhe me aftësi kundër kriminalitetit. Dua të sqaroj shumë shkurt se jemi duke zhvilluar hetime të rëndësishme për të cilat do kemi rezultatet në kohën kur duhet të jepen këto rezultate. Policia është e angazhuar për çuarjen deri në fund të këtyre hetimeve.

Lëvizjet në Policinë e Shtetit kanë disa arsye kur kryhen. Për këtë merret mendim dhe analizohen të gjitha të dhënat. Policia e Shtetit vepron bazuar në kompetencën dhe bazuar në objektin e punës që ka. Detyra jonë është të kapim të gjithë personat që mbajnë armë pa leje. Vendime të tjera nuk i takojnë policisë”, u shpreh Nano./CNA.al

Një ngjarje e rëndë ka ndodhur mbrëmjen e kaluar në Tiranë. Dyshohet se një 21 vjeçare është vetëhedhur nga kati i katërt i banesës.

Si pasojë e dëmtimeve është paraqitur në gjendje të rëndë shëndetësore në spitalin e Traumës. Ndërkohë po punohet për zbardhjen e rrethanave të ngjarjes.

“Më datë 19.01.2022, në mbrëmje, është paraqitur në gjendje të rëndë shëndetësore në spitalin e Traumës, shtetasja S. A., 21 vjeçe, e cila dyshohet se është vetëhedhur nga kati i katërt i banesës. Po punohet për sqarimin e rrethanave të ngjarjes”, njofton policia./ CNA.al