Connect with Us

Një qeveri e re e gatshme për ndryshime

Bota

Një qeveri e re e gatshme për ndryshime

Publikuar

-

/
cna lajme bote

Marrëveshja për qeverinë e re gjermane mban titullin “Të guxojmë më shumë përparim.” Titulli të kujton sloganin e kancelarit Willy Brandt në vitin 1969 “Të guxojmë më shumë demokraci”.

Willy Brandt-it i njihet merita që inicioi një transformim (socialdemokrat) të politikës sociale dhe arsimit në Gjermani, si dhe të politikës së jashtme të Gjermanisë. Qeveria e re trepartiake synon për Gjermaninë „politikën e ndikimeve të mëdha”, u shpreh Kancelari i ardhshëm, socialdemokrati Olaf Scholz. Marrëveshja karakterizohet nga fryma e ndryshimit, “për të kapërcyer statuskuonë”, për një “ekonomi tregu sociale-ekologjike” në Gjermani.

Megjithëse në koalicion janë dy parti të majta, Socialdemokratët dhe Të Gjelbrit, dhe një parti konservatore, liberalët e FDP-së, marrëveshja është e balancuar. Në të janë të ndjeshme qëndrime të përbashkëta liberale dhe sociale: do të legalizohet (me kufizime) një drogë si kanabisi; do të lehtësohet integrimi i të huajve: nënshtetësia gjermane do të merret më herët, diplomat e huaja do të njihen më lehtë, emigrimi i të kualifikuarve në Gjermani do të zgjerohet.

Në qendër të marrëveshjes për qeverinë e re janë klima dhe modernizimi i Gjermanisë. Në raport me botën, marrëveshja e qeverisë premton thekse të reja në politikën e jashtme gjermane.

Marrëveshjet apo kontratat për qeverinë në Gjermani janë deklarata synimesh, pa fuqi ligjore. Ndaj testi i vërtetë edhe për synimet e kësaj marrëveshjeje do të jenë sfidat e qeverisjes. Njëkohësisht, qeveritë gjermane kanë një histori të mirë të respektimit të marrëveshjeve qeveritare: i kanë respektuar ato në 80 përqind të përmbajtjeve.

Klima

Marrëveshja premton që ndaj klimës të arrihet neutraliteti deri në vitin 2045. Deri në vitin 2030, tetë vjet më herët nga plani aktual, synohet të mbyllet termocentrali i fundit me qymyr në Gjermani. Deri në këtë vit synohet që Gjermania të sigurojë 80% të nevojave për energji nga energjitë e ripërtëritshme. Do të krijohet një superministri për Ekonominë dhe Klimën, që do të drejtohet nga Të Gjelbrit.

Ekonomia

Në ekonomi qeveria shpall si parime të politikës financiare “financat solide dhe përdorimin kursimtar të parave të taksapaguesve”.  Shumë ekonomistë në Gjermani janë shprehur të lehtësuar që marrëveshja tregon se “politika financiare ekspansive nuk do të vijë”.

Frika e ekonomisë me fitoren e partive të majta në zgjedhje ishte se për të pasur fonde për investime, do të merreshin borxhe pa kriter. Por tani frena e kufirit të borxheve, e sanksionuar në kushtetutën gjermane, nuk do të preket.

Njëkohësisht, marrja e borxheve është bërë më e lehtë. Për investimet publike dhe private janë gjetur opsione “pragmatike”: do të ketë një rol më të madh Banka Gjermane për Zhvillimin, banka shtetërore e investimeve; peshë më të madhe do të fitojnë partneritetet publike-private.

Taksa për pasurinë, një kërkesë e socialdemokratëve dhe Të Gjelbërve në fushatën elektorale nuk do të vijë. Ky nuk është thjesht një koncesion ndaj liberalëve të FDP-së, por është pranim i realitetit, përballë fitores jo të thellë të të majtëve ndaj konservatorëve në zgjedhjet parlamentare.

Por do të kemi një ngritje të pagës minimale bazë në 12 euro për orë, premtim qendror i socialdemokratëve. Nga kjo do të përfitojnë 10 milionë vetë. Kemi edhe zotim për pensione të qëndrueshme dhe për më shumë banesa sociale.

Politika financiare gjermane ndaj Evropës

Në qëndrimin financiar ndaj Evropës pritet një vazhdimësi e politikës së viteve të fundit të kancelares Merkel. Vitet e fundit, politika financiare gjermane ndaj Evropës faktikisht ndryshoi: u vërejt një afrim i pozicioneve gjermane dhe evropianoveriore me jugun e Evropës.

Qeveria e re gjermane mbështet bashkimin bankar në BE. Ajo angazhohet edhe për “zhvillimin e mëtejshëm të rregullave të politikës fiskale.” Kjo nënkupton, sipas marrëveshjes,thjeshtëzimin e rregullave të Paktit të Stabilitetit dhe të Rritjes, që rregullon edhe kufirin e lejuar për hyrjen në borxh të shteteve të BE. Franca dhe shtetet jugore duan ta ngrejnë kufirin e lejuar të borxheve.

Por sjellja e rreptë financiare mbetet konsensus i klasës politike në Gjermani. Marrëveshja sugjeron se do të kemi rivlerësim të modaliteteve teknike të Paktit të Stabilitetit. Ajo thotë se Pakti i Stabilitetit ka dëshmuar fleksibilitetin e tij. Dhe se duhet që borxhi të mbetet i pagueshëm. Më tej, qeveria tregohet e hapur të diskutojë, me kushte, edhe një skemë risigurimi për garancitë e depozitave në gjithë BE. Kjo përjashtohej më parë nga Gjermania.

Politika e jashtme gjermane ndaj botës

Thekset që vë Gjermania në politikën e jashtme kanë rëndësi për Bashkimin Evropian. Linja e Gjermanisë p.sh. ndaj shteteve partnere e rivale si Kina apo Rusia ndiqet zakonisht nga i gjithë Bashkimi Evropian.

LEXO EDHE:  Shqipëria ende pas dyerve të BE/ Manjani e pranon: Faji është yni, asnjë justifikim

Në politikën e jashtme, priten të theksohen më fort në marrëdhënie me shtetet elementë si vlerat demokratike dhe të drejtat e njeriut. Kjo vërehet edhe në retorikën që përdoret në marrëveshjen e qeverisë. Në marrëveshje bëhet thirrje për zgjedhje të reja në Bjellorusi. Dhe për sanksione të tjera, nëse Alexander Lukashenko nuk ndryshon kursin.

Në marrëdhëniet me Kinën, marrëveshja e qeverisë prek pika që kanë rezultuar nevralgjike, si Tajvani dhe Xinjiangu. Qeveria thotë se do të trajtojë shkeljet e të drejtave të njeriut, veçanërisht në Xinjiang. Ajo “mbështet përfshirjen demokratike të Tajvanit për çështje specifike në organizatat ndërkombëtare”. Kina përcaktohet si partnere potenciale, por edhe si rivale sistemore.

Përsa i përket Rusisë, marrëveshja e qeverisë gjermane i kërkon asaj të “ndalojë menjëherë” përpjekjet për destabilizimin e Ukrainës. “Dialogu konstruktiv” i Gjermanisë me Rusinë do të mbajë parasysh “rreziqet e perceptuara” nga Rusia.

Partnerët dhe integrimi evropian

Marrëveshja e qeverisë sinjalizon se qeveria e re do të jetë e angazhuar aktivisht për integrimin evropian. Në plan afatmesëm apo afagjatë, qeveria gjermane mbështet “ndryshimin e marrëveshjeve themeluese të BE”. Ajo shprehet për krijimin e një federate të shteteve evropiane, pas reformave, në kuadër të Konferencës për të Ardhmen e Evropës. Kjo federatë duhet të drejtohet në mënyrë të decentralizuar dhe sipas parimit të subsidiaritetit. Pra Brukseli angazhohet kur shtetet nuk ia dalin dot mbanë detyrave.

Më tej qeveria e re gjermane angazhohet për një “Evrope sovrane”, në qendër të politikës së  jashtme. Me Evropë sovrane, në marrëveshjen e qeverisë së re gjermane kuptohet aftësimi i Evropës në fusha strategjike si p.sh. furnizimi me energji, shëndetësia, importet e lëndëve të para dhe teknologjia digjitale; mbrojtja e teknologjisë dhe infrastrukturës kritike; mbrojtja më e mirë e sipërmarrjeve evropiane nga sanksionet ekstraterritoriale.

Si partnerët më të ngushtë të Gjermanisë deklarata përmend në radhë të parë Francën dhe SHBA. Kancelari i ardhshëm, Olaf Scholz tha në prezantimin e marrëveshjes qeveritare se politikën e jashtme Gjermania do ta zhvillojë “në miqësi me Francën dhe në partneritet me SHBA”.

Në marrëveshje shkruhet më tej se Gjermaninë e lidh një miqësi e thellë me Poloninë. Njëkohësisht marrëveshja thotë se “ne do të mbështesim propozimet e Komisionit Evropian për pagimin e fondeve vetëm nëse garantohen kërkesa të tilla si pavarësia e gjyqësorit”. Kjo kuptohet si paralajmërim për problemet me Poloninë dhe Hungarinë.

Vëmendje konkrete për Ballkanin

Ballkani pritet të ketë një rëndësi të qartë për qeverinë e re gjermane. Marrëveshja për qeverinë i përmend me emra, jo në grup, të gjashtë shtetet e Ballkanit Perëndimor, që duan të anëtarësohen në BE. Kjo vëmendje tregon se zgjerimin e BE me Ballkanin, edhe qeveria e re gjermane e sheh si element strategjik për Evropën.

Qeveria e re gjermane kërkon në marrëveshjen e koalicionit që “si hap pasues duhet të hapen kapitujt e parë të anëtarësimit në BE me Shqipërinë dhe Maqedoninë e Veriut, duhet vendosur liberalizimi i vizave me Kosovën dhe të vazhdohen negociatat me Malin e Zi dhe Serbinë”.

“Ne mbështesim dialogun e normalizimit ndërmjet Kosovës dhe Serbisë të udhëhequr nga BE”, thuhet në marrëveshje. “Paralelisht me negociatat e anëtarësimit, BE duhet të përmirësojë kapacitetin e tij pranues”. Franca pati thënë më parë se pa përmirësim kapacitetesh pranimi, me të nuk ka zgjerim të BE.

Ministria e Jashtme dhe profilizimi me sukses i Të Gjelbërve

Ajo që thuhet për Ballkanin në marrëveshjen e qeverisë është marrë, thuajse fjalë për fjalë, nga formulimet në programin elektoral të Të Gjelbërve dhe pjesërisht të socialdemokratëve. Do të jenë Të Gjelbrit që do ta drejtojnë Ministrinë e Jashtme gjermane, me bashkëkryetaren e partisë, Annalena Baerbock. Kjo parti e ka kritikuar qeverinë aktuale, se interesat e Gjermanisë i ka kufizuar në interesa ekonomike të Gjermanisë.

Politika e jashtme gjermane në 16 vitet e fundit është drejtuar kryesisht nga Kancelaria Federale. Ndaj mbetet të shihet sa të ndjeshme do të jenë në Realpolitikë pozicionet e Të Gjelbërve, të artikuluara përmes Ministrisë së Jashtme gjermane.

Njëkohësisht ia vlen të kujtojmë se Të Gjelbrit kanë një histori suksesi në Ministrinë e Jashtme me Joshka Fischerin, ish-ministrin e Jashtëm gjerman, 16 vjet më parë. Fisheri krijoi një profil të qartë dhe me ndikim në qëndrimet e Gjermanisë. Në luftën kundër Jugosllavisë, ai u bë mbështetësi kryesor i Ministres së Jashtme amerikane, Madlen Allbright, për ndërhyrjen ushtarake në mbrojtje të kosovarëve. Këtë vlerësim e bëri pak kohë më parë vetë Allbright./DW

Për të rejat më të fundit behuni pjesë e grupit tonë në facebook : City News Albania

Komentoni

Your email address will not be published. Required fields are marked *

Bota

Nga Myqerem Tafaj/ Friedrich Merz një lider i fortë në opozitë dhe një kancelar i fortë i ardhshëm i Gjermanisë

Publikuar

-

Nga

Friedrich Merz
Friedrich Merz zgjidhet kryetar i ri i CDU me 94,6 % të votave të 1001 delegatëve të Kongresit!
Më përpara Merz u votua nga antarėsia me 62,5 % të votave, ku morrën pjesë rreth 2/3 e tyre (CDU ka rreth 450 mijë antarë) në një votim digjital. Merz rikthehet pas 12 vitesh në elitën drejtuese të CDU. Ai bënte pjesë në politikanët më të talentuar të CDU dhe për këtë arsye u zgjodh si kryetar i Fraksionit të Unionit CDU-CSU në vitet 1999-2002, në kohën kur Schäuble ishte kryetar i CDU, i cili dha dorëheqje në vitin 2000, dhe u pasua nga Angela Merkel.
Merz u largua nga drejtimi i Fraksionit, kryesisht për shkak të mospërputhjes së vizionit të tij politik me atë të Merkelit si kryetare e CDU.
Merz kandidoi në 2018 dhe humbi me një diferencë të vogël votash ndaj Anette Karrrenbauer si kandidate e preferuar e Merkel. Ajo drejtoi CDU për më pak se 2 vjet dhe dha dorëheqjen në shtator 2020, për shkak se nuk arriti asnjë fitore në zgjedhjet e Landeve.
Merz kandidoi për herën e dytë në zgjedhjet e parakoshme të kryetarit të CDU në fillim tė vitit 2021, fitoi në raundin e parë ndaj Laschet, por në raundin e dytë humbi me diferencë të ngushtë ndaj tij, sepse u tërhoq kandidati i tretë dhe orientoi votat e tij drejt Laschet si kandidat i preferuar i Merkel. Kjo zgjedhje e sforcuar e Laschet si kryetar i CDU hapi një diskutim të madh nëse Laschet ishte kandidati më i mirë për kancelar në zgjedhjet e shtatorit 2021. Merz ishte ndër mbështetësit më të fuqishëm të Laschet si kandidat për Kancelar. Por, u duk qartë që Laschet nuk kishte mbështetje të plotë jo vetëm në CDU por edhe në CSU. Kjo bëri që Unioni CDU/CSU të pësoj humbjen më të thellë në historinė e tij, me një rezultat prej 24%. Merkel e morri CDU me rezultat 38-42% dhe e la me 24%. Laschet ishte viktima e këtyre zgjedhjeve. Ai dha dorëheqje menjëherë pas shpalljes së rezultatit, edhe pse ai kishte vetëm 6 muaj në krye të CDU dhe gjendja e partisë nuk kishte të bënte fare me rolin e tij.
Diferenca vetëm me 2% me SPD, vota masive e antarësisë së CDU dhe votimi gati unanim i delegatëve të Kongresit, tregojnë se, nëse nuk do të ishte shmangur në raundin e dytë, Merz do të ishte kryetar i CDU dhe kandidat për kancelar, ai do të kishte mbështetje shumë më të madhe, CDU/CSU do ishin sërish fitues të zgjedhjeve dhe Merz do të ishte sot Kancelari i Gjermanisë! Vendimi i gabuar drejtuesve të CDU në kongresin e fillimvitit 2021 e coi CDU/CSU në opozitë vetëm për 2% të votave!
Në këtë krizë të thellë të CDU, rreth 70% e antarësisë morri pjesë në një votim digjital dhe, ndër tre kandidatë, voti qartazi ( 62,5%) F. Merz.
Ai njihet për vizionin e tij më shumė të së Djathtës konservatore dhe për kompetencat e tij të spikatura në fushën e ekonomisë dhe financave. Merz do të përballet me sfida të mëdha që këtë vit kur do të zhvillohen zgjedhjet në tre Lande.
Pritet të shihet nëse “qelqet e thyera” midis tij dhe Merkel do të kapërcehen. Refuzimi nga ana e Merkelit i propozimit të Merzit për Presidencën e Nderit të CDU si dhe i ftesës së tij për darkën festive të zgjedhjes së Kryetarit të ri të CDU, është komentuar nga media gjermane, si mos ndryshim i pozicionit të Merkelit dhe grupit të saj ndaj Merz. Por votimi i sotëm, gati unanim, i delegatëve të Kongresit tregon se CDU paska pritur një lider të fortë si Merz.
E sigurtë është që roli i fortë i Merkel në PPE do të përmbushet plotësisht nga Merz. Madje, ai do të ndikoj fortë në zhvillimin e politikave të djathta në PPE. Ai pritet të jetë një lider i fortë në opozitë dhe një kancelar i fortë i ardhshëm i Gjermanisë.
LEXO TE PLOTE

Kosova & Rajoni

Haradinaj kundër masave të qeverisë Kurti: Po u bini në qafë qytetarëve

Publikuar

-

Nga

Ish kryeministri i Kosovës, Ramush Haradinaj ka dalë kundër masave të reja të Qeverisë për parandalimin e përhapjes së COVID-19.

 

Sipas Metës, për papërgjegjësitë e tyre dhe keqmenaxhimin e situatës, qeveria po i bie në qafë qytetarëve.



Përmes një postimi në Facebook, Haradinaj shkruan se këto masa tashmë nuk kanë asnjë efekt në parandalimin e përhapjes së virusit.

“Për papërgjegjësitë e veta dhe keqmenaxhimin e situatës me pandeminë, qeveria tani po i bie në qafë qytetarëve dhe gastronomëve duke kufizuar orarin e lëvizjes dhe mbylljen e hershme të gastronomisë. Këto masa tashmë nuk kanë asnjë efekt në parandalimin e përhapjes së virusit, siç edhe është dëshmuar. Prandaj jemi kundër masave të votuara dhe i bëjmë thirrje qeverisë që të jetë më e përgjegjshme përballë situatave të ndieshme si pandemia, duke analizuar mirë masat, e jo duke ndërmarrë veprime ndëshkuese ndaj qytetarëve pa asnjë efekt në pengimin e përhapjes së virusit”, shkruan Haradinaj./CNA.al

LEXO TE PLOTE

Bota

Video-Kriza në qeverinë malazeze/ Abazoviç përplaset me protestuesit

Publikuar

-

Nga

Zëvendëskryeministri në detyrë i Malit të Zi, Dritan Abazoviç është përplasur me një turmë protestuesish të mbledhur në Potgoricë kundër tij pas kërkesës që ai ka bërë për rrëzimin e qeverisë së Zdravko Krivokapiç.

Abazoviç u përball me protestuesit këtë mbrëmje para godinës së qeverisë Malit të Zi, njëri prej të pranishmëve ka përmendur faktin se ai është shqiptar.



Qytetarët e mbledhur me rastin e formimit të mundshëm të qeverisë minorance u shpërndanë në mënyrë paqësore pasi kanë marshuar para godinës së Qeverisë në kryeqytetin e Malit të zi.

LEXO EDHE:  Nevoja ulëritëse e projektit të pashpallur nga Berisha

LEXO EDHE:  Artan Hoxha tregon sekretin/ Pse qeveria nuk i godet bandat

Abazoviç mbështeti një mocion mosbesimi që pritet të shyrtohet në Kuvend ndaj qeverisë ku ai bën pjesë. Kjo bëri që kryeministri Krivokapiç ta shkarkojë nga detyra. Është ende e paqartë se cila është mënyra si do zgjidhet kriza në qeverinë malazeze.

LEXO TE PLOTE