Politikë
Intervistë-Nga afera korruptive e inceneratorëve tek zhvillimet në PD/ Belind Këlliçi, flet pa dorashka
Deputeti i PD-së, Belind Këlliçi, në një intervistë dhënë për CNA.al, ka folur pa dorashka, duke nisur nga situata në PD, firmat, Kuvendi, Foltorja, qëndrimet e Lulzim Bashës dhe duke përfunduar tek afera më e madhe korruptive që është ajo e inceneratorëve.
Sa i përket, Kuvendit Kombëtar të PD-së, Këlliçi ka thënë se kjo gjë është vendosur tashmë, sipas statutit të PD-së, nga vetë demokratët.
“Ju thoni “kuvend paralel”. Kështu do e cilësoja dhe unë nëse kjo thirrje do të vinte në rrugë statutore përpara vendimarrjes së 4.200 delegatëve që zyrtarisht kërkojnë mbledhjen e një Kuvendi të Jashtëzakonshëm. Por jo, kryesia e PD nuk mund të marrë asnjë vendim pasi kanë shprehur vullnetin e tyre 4.200 delegatë, pjesë e organit më të lartë vendimarrës në PD, Kuvendit Kombëtar”, është shprehur Këlliçi.
Më tej ai ka folur edhe në lidhje me zhvillimet në Komisionin hetimor Parlamentar për inceneratorët, duke nënvizuar se një nga njerëzit e inceneratorëve, Mirel Mërtiri po mbrohet nga pushteti.
Më poshtë po sjellim të plotë intervistën:
CNA: Zoti Basha ka thirrur një kuvend paralel me atë të delegatëve, pra në datën 18 dhjetor. Çfarë do të ndodhë realisht? A mendoni se do të mbahen dy kuvende?
Këlliçi: E vërtetë është se ka kureshtje mediatike për të parë a do t’i qëndrojë këtë herë vendimeve të tij Lulzim Basha apo do të kundërshtojë veten si shpesh ka ndodhur në këto 8 vite të lidershipit të tij. Unë nuk mund të parashikoj qëndrimet e Z. Basha, sepse ato shpesh janë të luhatura.
Nuk hyjmë në zgjedhje me Ramën kryeministër, pastaj hyjmë. Nuk do të ketë kuvend, pastaj do të ketë por kur them unë e jo kur e thërrasin delegatët. Këto qëndrime kontradiktore, të shtrira në kohë, e kanë cënuar mendoj imazhin e kryetarit të PD, e për rrjedhim imazhin e PD si alternativë qeverisëse në zgjedhje.
Ju thoni “kuvend paralel”. Kështu do e cilësoja dhe unë nëse kjo thirrje do të vinte në rrugë statutore përpara vendimarrjes së 4.200 delegatëve që zyrtarisht kërkojnë mbledhjen e një Kuvendi të Jashtëzakonshëm. Por jo, kryesia e PD nuk mund të marrë asnjë vendim pasi kanë shprehur vullnetin e tyre 4.200 delegatë, pjesë e organit më të lartë vendimarrës në PD, Kuvendit Kombëtar.
Organizimet burokratike, me artifica statutore, me keqinterpretime të Statutit të PDSH, siç është “antikuvendi” i datës 18, janë tentativa për ti përçarë dhe më shumë demokratët dhe kjo nuk e nderon kryetarin aktual.
CNA: Kush do shkojë në Kuvendin e datës 11 dhe në atë të datës 18?
Këlliçi: Ka vetëm një kuvend, ai që thirret konform normave statutore, dhe ai që thirret i pari. Kapriçot e tipit “jo 11 por 18, jo 11, po sa” nuk i kanë hije autoritetit dhe staturës që duhet të ketë një kryetar partie. Kjo është lojë kungulleshkash, të cilën nuk kemi as kohën as moshën ta luajmë. Ne garuam në zgjedhjet e 25 prillit me një kalë beteje: Të bënim Lulzim Bashën kryeministër.
Rezultati i kësaj strategjie është i njohur dhe ne sërish mbetëm në opozitë. Prandaj e shoh legjitime thirrjen e delegatëve për një kuvend të jashtëzakonshëm, sepse i tillë është momenti. Po shkonim drejt asgjësimit dhe demokratët nuk mund të pranonin një fund të tillë. Delegatët përfaqësojnë anëtarësinë e PD, vullnetin e saj për ndryshim dhe dalje nga kjo krizë identiteti. Shumica e tyre kërkon thirrjen e Kuvendit Kombëtar, si organin më të lartë vendimmarrës në PD. Do të shkojnë të gjithë ata demokratë që kërkojnë një PD fituese. Të gjithë demokratët që nuk dëshirojnë një disfatë të radhës.
CNA: Nga ana tjetër, po shohim që Foltoret e zotit Berisha kanë qenë gjithmonë të suksesshme, por nga ana e një pjese të deputetëve të PD janë hedhur akuza se edhe në datën 11 dhjetor do të ketë një “Foltore” të dytë? A keni një koment për këtë?
Këlliçi: I ftoj kolegët në fjalë të jenë përfaqësues të zgjedhësve të tyre, jo të vetes, dhe u risjell në vëmendje se mandati i deputetit i përket demokratëve.
Të respektojnë thirrjen e shumicës për Kuvend Kombëtar, edhe nëse nuk bien dakord me vendimet e saj. Në demokraci vendos shumica. Nëse Lulzim Basha ndihet shumicë, pasi kështu ka deklaruar, le të jetë ai i pari që do të hyjë në portën e Pallatit të Kongreseve sëbashku me 95% të bazës që e mbështet atë.
Nuk është serioze që partia mblidhet në kuvend, ndërsa kryetari qëndron në seli dhe ruan vulën. Kryetar pa anëtarësi dhe udhëheqës pa popull nuk ka. Kryetar të bëjnë njerëzit, jo vula!
Është shqetësuese që bën habi kaq të madhe thirrja e një kuvendi nga vetë baza e partisë. Është tregues i kulturës sonë demokratike. Unë jam për demokraci pjesëmarrëse, e ushtruar drejtpërdrejtë nga sovrani.
CNA: Z. Shehaj ka qenë në zyrën e Palokës ku ka verifikuar firmat. Pas këtij veprimi, ndaj Shehajt kanë nisur një sërë akuzash dhe sulmesh. Rasti më i fundit ishte ai i një delegateje, e cila pretendon se i është falsifikuar firma. Ju a i keni vërtetuar firmat në zonën ku ishit drejtues politik? A keni konstatuar shkelje?
Këlliçi: Kam qenë dhe jam në kontakt ditor me delegatët dhe anëtarësinë e zonave të mia zgjedhore si dhe me delegatët e FRPD. Kush ka dëshirë të njohë qëndrimin e bazës mjafton të dalë në bazë e të takohet me demokratët. Nga televizori, nga telefoni, nga zyra apo shtëpia, është e vështirë të kuptosh më shumë.
Shumë prej delegatëve të zonës kanë patur dëshirën të ndanin me mua informacionin se kishin firmosur thirrjen për Kuvend Kombëtar. Nuk kishte asnjë hezitim për të biseduar hapur.
Të tjerë delegatë nga zona e Kombinatit në Njësinë nr.6 u shfaqën me krenari në ekrane për të treguar formularin e plotësuar. Demokratët nuk kanë asnjë arsye të turpërohen, as t’i frikësohen fjalës së lirë dhe mendimit ndryshe, që janë pasaporta jonë, identiteti ynë politik, arsyeja përse PD është themeluar 30 vjet më parë. Nuk do të trokas derë më derë për të vërtetuar a janë demokratë demokratët apo jo. Shkeljet bëhen në kupolën e partisë, jo në bazë.
CNA: Përtej kësaj, ju keni qenë edhe një nga zërat më të fortë që keni denoncuar aferën e inceneratorëve. Në komision keni deklaruar se Mirel Mërtiri po mbrohet nga socialistët. Nga kush konkretisht, a keni emra?
Këlliçi: “Burrat e shtetit” po na fshihen pas gishtit. Jemi përballë një orkestre socialiste që dirigjohet nga Rama dhe Veliaj për të prodhuar zhurmë. Zhurmë që synon të pengojë të vërtetën të mbërrijë në shtëpitë e shqiptarëve, në ekranet e televizorëve të tyre.
Komisioni hetimor parlamentar kërkon informacione nga bankat private, por informacionet nuk na jepen të plota. Anëtarët socialistë të komisionit janë trajnuar nga drejtoria e propagandës, për t’i vendosur të vërtetës shkopinj në rrota. Për fat të keq bashkëpunëtorë të censurës ka edhe në media. Shumica dërrmuese e anëtarëve socialistë i marrin argumentet nëpërmjet celularit.
Mërtiri mbrohet nga pushteti sepse pushteti qëndron pas Mërtirit. Synohet të pengohet demaskimi i kupolës, ku Mërtiri është vetëm një mëkëmbës, që nëse bie i merr me vete. Dhe me vete do ti marrë!/CNA.al
Intervistoi: Elisjeda Kiko
Politikë
Grupimi “Dhjetori 90″ thirrje Bashës/ “Mos guxo të përsëritësh 21 Janarin”
Kreu i grupimit “Dhjetor 90”, Bislim Ahmetaj i është drejtuar me një letër Lulzim Bashës, ku i kërkon që të hapë dyert e PD dhe të ulet në bisedime.
“Jam i bindur që asnjë demokrat apo demokrate nuk do ta dëshironte këtë situatë sa absurde, aq edhe groteske, por mbi të gjitha dramatike dhe tragjike për fatin e qindra mijera anëtarëve dhe mbështetësve të familjes së tyre politike që shëmbi diktaturën komuniste dhe ndërmori reforma të jashtëzakonshme për ndërtimin e shtetit demokratik”, shkruan Ahmetaj.
Më tej Ahmetaj është ndalur tek humbjet që kanë pësuar demokratët në këto 8 vite dhe apelon Bashën që të japë dorëheqjen se nuk është fundi i botës.
“Është po kaq e vërtetë që përgjatë këtyre gati 9 viteve të drejtimin të PD-s nga ju, demokratët edhe pse janë cfilitur në përkushtim dhe sakrifica nuk kanë njohur asnjë fitore.
Vendi ka shkuar keq e më keq dhe nga kriza në krizë.
Kjo sigurisht që tek anëtarët dhe mbështetësit e opozitës ka shkaktuar zhgënjime të mëdha, por ky nuk do të thotë që është fundi i botës as për ju , as për demokratët ndaj gjej fuqi dhe jep dorëheqje”, shkruan Ahmetaj.
Letrën, Ahmetaj e mbyll duke ripërsëritur thirrjen për bisedime me grupin për rithemelimin e PD-së.
“Ulu në bisedime me Grupin për Rithemelimin e PD-s, ulu siç je ulur me Edi Ramën, siç je ulur me Ilir Metën, siç je ulur me aleatët e tu.
Siç je ulur me ndërkombëtarët.
Por ama ulu me qëllimin e mirë që Partia Demokratike ta rimarrë rolin e vërtetë të opozitës.
Që PDSH të frymëzojë dhe të shndërrohet në parti fituese të zgjedhjeve dhe jo më si bisht i mazhorancës socialiste.
Kjo sjellje do të tregonte që nuk je peng i askujt, kjo sjellje do të tregonte që mund të vazhdosh të kontribosh në politik, ndoshta jo si kryetar, por për aq sa mund ta rifitosh besimin e demokratëve”, shkruan ndër të tjera Ahmetaj.
Letra e plotë:
Partia Demokratike siç po e përjetoni edhe ju po kalon një situatë të jashtëzakonshme, të paparë ndonjëherrë në historinë e egzistencës së saj 31 vjecare.
Jam i bindur që asnjë demokrat apo demokrate nuk do ta dëshironte këtë situatë sa absurde, aq edhe groteske, por mbi të gjitha dramatike dhe tragjike për fatin e qindra mijera anëtarëve dhe mbështetësve të familjes së tyre politike që shëmbi diktaturën komuniste dhe ndërmori reforma të jashtëzakonshme për ndërtimin e shtetit demokratik.
Ndër vite jemi përballur me sfida dhe situata të rënda sic ka qënë ajo e vitit 1997, kur falangat e komunizmit rrëzuan rendin kushtetues me armë, por megjithatë kemi qënë më të bashkuar dhe më me besim tek forca jonë politike.
Na është vrarë në prag të derës së Selisë së PDSH, Prijësi i Lëvizjes Studentore, Kryetari i parë i PDSH, i ndritshmi Azem Hajdari dhe kemi mundur ta sfidojmë dhimbjen dhe të ringrihemi për tu shndërruar në parti qeverisëse me rezultate historike pjesë e së cilës keni qënë edhe ju.
Është po kaq e vërtetë që përgjatë këtyre gati 9 viteve të drejtimin të PD-s nga ju, demokratët edhe pse janë cfilitur në përkushtim dhe sakrifica nuk kanë njohur asnjë fitore.
Vendi ka shkuar keq e më keq dhe nga kriza në krizë.
Kjo sigurisht që tek anëtarët dhe mbështetësit e opozitës ka shkaktuar zhgënjime të mëdha, por ky nuk do të thotë që është fundi i botës as për ju , as për demokratët ndaj gjej fuqi dhe jep dorëheqje.
Është pikërisht koha që të tregosh që je udhëheqës i stilit liberal perendimor.
Të jesh kryetar i opozitës dhe të pretendosh të bëhesh Kryeministër i vendit nuk është aspiratë e ndaluar në një vend demokratik, por në këto rrethana kjo ambicje e juaja duket një iluzion në sirtarë, sepse jeni ju vet që e keni shuar dhe djegur këtë ëndërr tuajën dhe të demokratëve përkohësisht.
Por e përseris s’është fundi i botës as për jua as për Partinë Demokratike, as për Shqipërinë.
Ndaj si një prej drejtuesve kryesor të lëvizjes studentore, themelues i pluralizmit politik po të drejtohem me zemër në dorë, me sinqeritetin e një njëriu që është krijuar për të kontribuar dhe jo për të përfituar të ftoj që qysh sot dhe jo nesër ti ndërmarrësh disa hapa krejt të mundshëm:
Së pari: Çeli dyert e Partisë Demokratike, jo vetëm kryesoren, por që të tria.
Së dyti: Hiqi bravat nga dyert e zyrave që ju përkasin kundërshtarëve tuaj të përkohshmë në parti.
Dhe së treti: Ulu në bisedime me Grupin për Rithemelimin e PD-s, ulu siç je ulur me Edi Ramën, siç je ulur me Ilir Metën, siç je ulur me aleatët e tu.
Siç je ulur me ndërkombëtarët.
Por ama ulu me qëllimin e mirë që Partia Demokratike ta rimarrë rolin e vërtetë të opozitës.
Që PDSH të frymëzojë dhe të shndërrohet në parti fituese të zgjedhjeve dhe jo më si bisht i mazhorancës socialiste.
Kjo sjellje do të tregonte që nuk je peng i askujt, kjo sjellje do të tregonte që mund të vazhdosh të kontribosh në politik, ndoshta jo si kryetar, por për aq sa mund ta rifitosh besimin e demokratëve.
Kjo sjellje do të justifikonte formimin tuaj të pretenduar si perëndimor.
Kjo sjellje do t’ju rifarmatonte ju, por edhe politikën shqiptare për një fillim të ri.
Kjo sjellje do të tregonte se je njeri dhe për pasoj edhe mund të gabosh por njeriu normal reflekton dhe di të kërkoj falje.
Në qoftë se nuk i ndërmerr këta hapa sonte , apo përgjatë natës do ta bësh vetën përgjegjës për gjithçka do të ketë gjasa të ndodhë nesër në shtëpinë e demokratëve.
Jo vetëm përgjegjës moral por edhe penal.
Mos guxo ta përsëritësh përvojën tënde të 21 Janarit të 2011-ës si Ministër i Brendshëm, sepse jo vetëm do të përfundosh para drejtësisë por historia do të shënjoj si Luli i Zi i Shekullit të XXI-të./CNA.al
Aktualitet
Grida Duma, Rushaj, Salianji dhe Gjekmarkaj braktisin Lulzim Bashën
Dy nënkryetarët e partisë dhe dy deputetë duket se janë braktisjet e fundit të Lulzim Bashës. Ajo që bie në sy është se prej shumë ditësh Ervin Salianji nuk del në media të bëjë avokatinë e Lulzim Bashës, por në tavolinat miqësore thotë se ai e ka kryer misionin e tij dhe duhet të dalin të tjerët të marrin përgjegjësi.
Gjekmarkaj gjithashtu e ka braktisur mbrojtjen publike të Lulzim Bashës kur ka parë qartazi se shumica e demokratëve, anëtarësia e PD është kundër Lulit. Ajo që bie në sy është fakti se prej shumë ditësh Alfred Rushaj, nënkryetar i PD dhe kryetar i Grupit Parlamentar nuk është parë të hyjë në selinë e PD.
Gjithashtu Grida Duma, nënkryetarja tjetër e PD e cila e ka braktisur Lulzim Bashën. Mësohet se për t’ju shmangur çdo lloj përplasje, apo për të mos qenë aktiive në mbrojtje të Lulzim Bashës, Duma ka zgjedhur të udhetojë jashtë shtetit. Këta janë katër emrat që kanë braktisur se fundmi Lulzim Bashën.
Por midis tyre, pra drejtuesve dhe kryesisë ka edhe emra të tjerë të cilët nuk po flasim, dhe janë tërhequr duke bërë një hap pas, përfshirë edhe Jorida Tabakun, nënkryetaren tjetër të PD.
Janë të paktë emrat qe tashmë po e mbështesin Lulzim Bashën, përjashto ndonjë periferik dhe të papeshë në PD si rasti i Roland Bejkos apo grupi i analistëve politik turq, mbështetësit e Erdoganit siç janë Fitim Zekthi, Vehab Kola e disa të tjerë. Pesha e tyre politike është thuajse zero në PD.
Janë mbetjet e fundit në krah të Lulzim Bashës të cilët po përpiqen t’i japin kurajo së bashkui me Gaz Bardhin që të qendrojë i mbyllur në bunker dhe të mos e lëshojë selinë e PD sikur ta kishte pronë të tijën personale. Gjithësesi tashmë, qartazi të gjithë po e kuptojnë: Koha e Bashës ka mbaruar!
Nesër PD e marrin demokratët dhe këtë e ka kuptuar edhe Grida Duma, Alfred Rrushaj por edhe deputetët Salianji dhe Gjekmarkaj që kanë zgjedhur të heshtin përpara furtunës./CNA.al
Politikë
“Rama do e ndjekë ndeshjen nga Surreli”/ Nikollë Lesi: Gaz Bardhi nesër do veshë mbathje çeliku pasi demokratët nga Mamurrasi e kanë shumë qejf
Gazetari Nikollë Lesi, ka komentuar zhvillimet e fundit politike brenda Partisë Demokratike. Lesi parashikon se nesër do të ketë përplasje të fortë mes demokratëve.
Sipas tij , kreyministri Edi Rama do ta shikojë ndeshjen nga Surreli, ndërsa Bledi Çuçi me një helikopter amerikan nga ajri.
Gazetari nuk ka lënë pa ironizuar edhe Gazment Bardhi për të cilin shkruan se do të veshë mbathje çeliku, se tifozat nga Mamaurrasi e kanë shumë qejf një foto me njeriu e dytë, pas Lulzim Bashës.
“Nesër në ora 12.00 (datë 8 janar 2022) do të jetë ndeshja finale “Berisha-Basha”, por vetëm me një takim te oborri i PD-së. Pra nesër njeri merr Selinë qendrore përfundimisht dhe tjetri ikën në shtëpi.
Ndeshja nuk ka arbitër, por gjithsesi topin e parë do ta shkelmojë Edi Rama që do ta kalojë te zyra e Bashës. E më pas Kryeministri Rama, si tifoz neutral, do ta ndjekë ndeshjen në fjalë nga kafja e Surrelit.
Kurse ministri i brendshëm Bledi Çuçi, me një helikopter amerikan, do ta shikojë duelin nga ajri, mu mbi selinë e PD-së.
Mësohet se numri dy në Selinë Blu do të ketë mbathje çeliku, sepse tifozat nga Mamurrasi e kanë me shumë qejf një përqafim dhe foto me njeriun e dytë, pas Lulit”, shkruan Nikollë Lesi./A.E-CNA.al
