Numri i infeksioneve globale me COVID ka kaluar shifrën 300 milionë. U desh më shumë se një vit për të arritur shifrën 100 milionë dhe vetëm pesë muaj për 100 milionëshin e fundit të të infektuarve, ndërsa bota përballet me variantin shumë ngjitës Omicron.

Profesionistët e shëndetësisë dhe pacientët e Londrës janë goditur rëndë nga varianti Omicron, duke bërë që qeveria të dërgojë 200 pjesëtarë të ushtrisë, përfshirë 40 mjekë, në spitalet e qytetit.

Kritikët e Shërbimit Shëndetësor të vendit thonë se përhapja masive e Omicronit po ekspozon të metat e sistemit mjekësor të vendit.

Guvernatori i Virxhinias Perëndimore në Shtetet e Bashkuara tha të enjten se për shkak të variantit Omicron ai po kërkon autorizim nga Qendrat për Kontrollin dhe Parandalimin e Sëmundjeve për të ofruar një dozë të katërt të vaksinës COVID për banorët 50 vjeç e lart në shtetin e tij.

Organizata Botërore e Shëndetësisë thotë se një variant i ri i koronavirusit i zbuluar së fundmi në Francë nuk përbën arsye për shqetësim aktualisht. Shkencëtarët e një fondacioni mjekësor në Marsejë thonë se e zbuluan variantin e ri në dhjetor tek 12 pacientë që banojnë pranë këtij qyteti. Pacienti i parë rezultoi pozitiv pasi udhëtoi në Kamerun të Afrikës.

Studiuesit thanë se kanë identifikuar 46 mutacione në variantin e ri, të cilat mund ta bëjnë atë më rezistent ndaj vaksinave dhe më ngjitës se koronavirusi origjinal./VOA

Sekretari amerikan i Mbrojtjes, Lloyd Austin më 6 janar zhvilloi një bisedë telefonike me homologun e tij rus, Sergei Shoigu dhe diskutoi për “uljen e rrezikut pranë kufijve të Ukrainës”, tha Petagoni në një deklaratë të shkurtër.

“Është e qartë se ne ende jemi shumë të shqetësuar nga ajo që po shohim”, tha një zyrtar amerikan i mbrojtjes për agjencinë Reuters, pa komentuar për këtë bisedë mes zyrtarëve amerikanë dhe rusë.

Biseda mes Austin dhe Shoigo vjen në kohën e shqetësimeve në Perëndim, pas grumbullimit të pothuajse 100,000 trupave ruse në afërsi të kufijve të Ukrainës. Perëndimi ka frikë se Rusia po përgatitet për një pushtim të Ukrainës, por Moska hedh poshtë këto pretendime.

Rusia ka kërkuar garanci se Ukraina dhe shtetet e tjera të ish-Bashkimit Sovjetik nuk do t’i bashkohen NATO-s dhe po ashtu kërkon që Aleanca Veri-Atlantike të tërheqë dislokimet ushtarake në Evropën Lindore dhe Qendrore.

Perëndimi ka hedhur poshtë ultimatumet e Moskës sa i përket NATO-s dhe ka kërcënuar se do të vendosë sanksione të ashpra dhe do të ndërmarrë masa të tjera nëse Rusia sulmon Ukrainën.

Rusia më 2014 aneksoi Gadishullin ukrainas të Krimesë dhe vazhdon të sundojë këtë rajon./voa

Një vit pas trazirave të 6 janarit në Kapitol, ish-Presidenti Donald Trump vazhdon të këmbëngulë se votimet e vitit 2020 ishin të manipuluara. Gjatë muajve të fundit, ish-presidenti ka nxitur republikanët në legjislaturat shtetërore për të ndryshuar ligjet për zgjedhjet.

Donad Trumpi nxiti mijëra njerëz të zemëruar drejt Kongresit në një nga ditët më të errëta të historisë amerikane.

Turma e zemrëuar, që hyri në ndërtesën e Kapitolit atë ditë të janarit, kërkonte ligjvënësit dhe në veçanti Kryetaren e Dhomës së Përfaqësueve Nancy Pelosi dhe ish-Zëvendëspresidentin Mike Pence. Kongresi ishte mbledhur për të zyrtarizuar fitoren e demokratit Joe Biden ndaj Donald Trumpit në zgjedhjet presidenciale të nëntorit 2020.

Turma ngriti podiume për varje në litar, sulmoi policinë dhe gazetarët, vandalizoi dhe plaçkiti zyra.

Dhuna dhe kaosi la pesë të vdekur, 138 policë të plagosur dhe shkaktoi ngritjen e akuzave ndaj 720 pjesëmarrësve si dhe hapjen e procesit kundër zotit Trump, vetëm pak ditë para se ai të largohej nga posti.

Por zoti Trump vazhdon të pohojë se zgjedhjet u manipuluan, përballë provave dërrmuese se nuk kishte mashtrime zgjedhore. Këtë qëndrim mbajnë edhe mbështetësit e tij, të cilët marrin pjesë në tubimet që zhvillon zoti Trump.

“Jam këtu për të parë presidentin tonë të ligjshëm, që i fitoi në të vërtetë zgjedhjet dhe dua të dëgjoj se çfarë ka për të thënë”, thotë Beth Turbey, mbështetëse e zotit Trump.

Trump po planifikonte t’u drejtohej përsëri mbështetësve të tij më 6 janar, por ai e anuloi atë dhe tha se do t’u drejtohej mbështetësve të tij në një tubim të planifikuar më 15 janar në Arizona.

Analistët thonë se ai ka qenë i zënë gjatë gjithë vitit duke u përpjekur të ndikojë tek ligjvënësit simpatizantë. Zëri i Amerikës bisedoi përmes rrjetit Skype me zotin Jeremi Suri, profesor historie në Universitetin e Teksasit në Austin.

“Ai po përpiqet të kufizojë qasjen e votuesve në shtetet që kanë popullsi të larmishme, si Xhorxhia dhe Teksasi. Po mundohet të bëjë për vete njerëz si Jim Jordan dhe Marjorie Taylor Greene, dy anëtarë të Kongresit, që të ndihmojnë në fitoren e zgjedhjve të individëve që do të mbështesnin politika të hartuara kundër imigrantëve apo politika për tërheqjen e Shteteve të Bashkuara nga aleanca ndërkombëtare si NATO-ja. Pra ai ka axhendën Amerika e para. Ka një axhendë egoje dhe po përpiqet të rishkruajë historinë që të përputhet me pohimet e tij të rreme. Përpjekjet e tij janë të përditshme.”

Aanalistja Suzanne Spaulding, e cila drejton projektin Mbrojtja e Institucioneve Demokratike në Qendrën për Studime Strategjike dhe Ndërkombëtare, thotë për Zërin e Amerikës se kjo ngjarje shokuese ka thelluar më tej ndasitë politike në Shtetet e Bashkuara.

Republikanët që folën kundër Trump-it menjëherë pas 6 janarit, vitin e kaluar, duket se kanë heshtur. Më shqetësuese, tha ajo, sondazhet tregojnë se një në tre amerikanë beson se dhuna kundër qeverisë është e justifikuar. Kjo duket se i ka dhënë vrull Trump-it.

“Mendoj se kjo e ka bërë të guximshëm. Disa orë pas dhunës në Kapitol kishte një ndjenjë mes disa ligjvënësve republikanë se Trump-i ndoshta i kishte kaluar caqet. Dhe menduan se kishin hapësirë për t’u distancuar. Për fat të keq, ajo që duket se ka ndodhur është se ai nuk e ka humbur kontrollin e tij në Partinë Republikane.”

Shtëpia e Bardhë do të vazhdojë të mbajë përgjegjës ish-Presidentin Trump për ngjarjet e 6 janarit, thotë zëdhënësja Jen Psaki.

“Ne kemi qënë të drejtëpërdrejtë në këtë front. Roli i Presidentit Trump në përmbysjen e rendit kushtetues, përpjekja për të bllokuar transferimin paqësor të pushtetit dhe mbrojtja e një turme që sulmoi Kapitolin dhe punonjësit e rendit, të gjitha këto janë të dokumentuara mjaft mirë. Presidenti e ka cilësuar 6 janarin si një nga ditët më të këqija të demokracisë tonë.”

Ka të ngjarë që zoti Trump gjatë tubimit të 15 janarit t’u referohet fjalëve të Presidentit Biden. Por analistja Spaulding thotë fjala e fundit i takon popullit amerikan dhe jo politikanëve.

“Gjithmonë më mahnit hymni ynë kombëtar që këndohet anembanë vendit. Vargjet fillojnë me pyetje dhe përgjigje. Fillon me pyetjen, a po valvidet ende flamuri? Flamurin e pamë gjatë errësirës në betejë, por tani është agimi dhe pyetja është, a valvitet flamuri ende mbi këtë tokë të lirë të njerëzve trima ? Hymni mbaron me këtë pyetje. Ndaj të gjithë ne duhet të sigurohemi që përgjigje të jetë PO, çdo ditë.”

Një vit nga trazirat në Kapitol, pyetja është, çfarë flamuri do valvitet?/voa