Connect with Us

Nga deklarimi i rremë për pasurinë tek raporti i DSIK/ Ja, pse u shkarkua prokurori Lorenc Mërkuri

Vetingu

Nga deklarimi i rremë për pasurinë tek raporti i DSIK/ Ja, pse u shkarkua prokurori Lorenc Mërkuri

Publikuar

-

Nga Edmond Hoxhaj

Prokurori i Sarandës Lorenc Mërkuri u shkarkua nga detyra më 22 shtator 2021, pasi Komisioni i Pavarur i Kualifikimit, KPK konstatoi probleme në të tri kriteret e rivlerësimit, atë të pasurisë, profesionalizmit dhe figurës. Megjithëse të tre anëtarët e trupit gjykues, Xhensila Pine, Valbona Sanxhaktari dhe Lulzim Hamitaj kanë rënë dakord për shkarkimin e Mërkurit dhe kanë vlerësuar se me veprimet dhe mosveprimet e tij subjekti ka cënuar besimin e publikut tek drejtësia, janë ndarë lidhur me vlerësimin në një konstatim për pasurinë dhe për profesionalizmin.

Lorenc Mërkuri e ka nisur karrierën në sistemin e drejtësisë në vitin 2003 si oficer i policisë gjyqësore në Prokurorinë e Sarandës. Ai u emërua prokuror në vitin 2012 dhe prej dhjetorit 2013 deri në shkarkimin e tij, e ushtroi funksionin e prokurorit në Prokurorinë e Sarandës.

Deklarim i rremë për pasurinë

Komisioni ngre dyshime se Mërkuri ka tjetërsuar faktet lidhur me një pasuri në emër të prindërve të bashkëshortes dhe kësaj të fundit, e cila rezulton bashkëpronare me 1/3 pjesë takuese. Subjekti ka pasqyruar në deklaratën veting pjesën takuese të bashkëshortes në apartamentin me sipërfaqe 69.3 m2 në Sarandë me vlerë 3.1 milionë lekë.

Si burim krijimi janë deklaruar të ardhurat e krijuara nga shitja e banesës së prindërive të bashkëshortes në qershor të vitit 2007 në vlerën 2 milionë lekë, si dhe të ardhurat e siguruara prej tyre nga puna në SHBA. Bashkëshortja ka deklaruar se nuk ka dhënë asnjë kontribut për pjesën e saj.

Por, nga hetimi ka rezultuar se në ditën që është kryer shtija e apartamentit të prindërve, bashkëshortja e ka derdhur shumën në llogarinë e saj. Një ditë më pas ajo ka tërhequr shumën 20 mijë euro dhe në prill të 2008-ës ka transferuar në llogarinë e të birit 14 mijë e 800 euro.

Me këto shuma janë kryer në vijmësi edhe transferta të tjera, që kanë çuar në vlerësimin e trupit gjykues se vlera e përfituar nga shitja e apartamentit në vitin 2007 nuk ka shërbyer për pagesat për apartamentin e blerë po atë vit.
“[…]Kur subjektit iu njoftua se nuk janë prekur vlerat monetare të mbetura në llogarinë e përbashkët në euro në emër të shtetaseve E. M. ose D. M. në ‘Societe Generale Albania Bank’, ai deklaroi se si burim kishin shërbyer të ardhurat e përfituara nga këta shtetas nga punësimi i tyre në SHBA”, konstaton trupi gjykues dhe vlerëson se deklarimi se pagesa për blerjen e këtij apartamenti është kryer pjesë-pjesë nga viti 2007 e në vijim, nuk është justifikuar me asnjë dokumentacion ligjor provues.

Në vendimin e arsyetuar të KPK thuhet se nuk është vërtetuar që prindërit e bashkëshortes të kenë pasur ndonjë marrdhënie të mëparshme me shoqërinë e ndërtimit. Po ashtu, nuk është provuar transferimi i shumave nga prindërit e bashkëshortes prej SHBA, si në rrugë bankare ashtu dhe tokësore.

KPK nuk ka konsideruar si provë edhe deklaratën e një prej ish-ortakëve të shoqërisë ndërtuese që konfirmonte se kishte miqësi të hershme me vjehrrin e subjektit dhe se pagesat ishin kryer në Shqipëri dhe në SHBA. Kjo, pasi ka rezultuar se ky ish-ortak i kishte shitur aksionet që zotëronte kur kishte udhëtuar drejt SHBA-së në vitin 2009 dhe nuk kishte lidhje me shoqërinë.

Sipas KPK subjekti ka kryer deklarim të rremë pasi është përpjekur për të deformuar të vërtetën në funksion të paraqitjes së të dhënave, që lidheshin me krijimin e kësaj pasurie. “[…]Trupi gjykues vlerëson se sjellja e subjektit të rivlerësimit, duke zgjedhur të mos jetë i sinqertë në shpjegimet mbi gjendjen e pasurisë që bashkëshortja e tij disponon në 1/3 pjesën, përbën një rrethanë që më së pakti, në këndvështrimin e një vëzhguesi objektiv, përbën arsye që të cenohet besimi i publikut te drejtësia”, konkludon Komisioni.

Kryesuesi i trupit gjykues, Lulzim Hamitaj në pakicë vlerëson se në këtë rast subjekti nuk gjendet në kushtet e deklarimit të rremë. “Bëhet fjalë për veprime dhe informacione që nuk burojnë drejtpërdrejt nga veprimet apo dijenitë e subjektit të rivlerësimit, in prima persona, por për veprime, fakte dhe rrethana të kryera apo të njohura nga persona të tretë dhe, më pas, të referuara te subjekti”, konstaton Hamitaj dhe çmon se nuk mund të konsiderohet deklarim i rremë pasqyrimi i një fakti apo informacioni ashtu sikurse i është referuar deklaruesit.
Ai vlerëson se nuk ka ndonjë veprim specifik të subjektit që të kishte për qëllim deformimin e fakteve reale ose pasqyrimit të tyre ndryshe me qëllim fshehjen e pasurive.

Situatë e ngjashme si oër apartamntin është konstatuar edhe për blerjen e një autoveture tip Benz në vitin 2009, çmimi shitjes së të cilit është deklaruar si një prej burimeve të krijimit të një automjeti tip Audi në vitin 2015, kundrejt çmimit 1 milion lekë.

Nga kronologjia e blerjes dhe shitjes së automjetit tip Benz që ka shërbyer për blerjen e Audi-t janë gjetur një sërë problemesh. Sipas KPK, subjekti e ka futur mjetin në Shqipëri në maj të vitit 2009, por pa kryer zhdoganimin e tij – ndërkohë që ka realizuar rishtazi hyrjen e makinës në territorin shqiptar në shkurt të 2010-ës, por pa e dokumentuar daljen.

LEXO EDHE:  Letër për Alfred Pezën/ Dy pyetje dhe dy sqarime publike

Kryerja e zhdoganimit të automjetit sikur të kishte hyrë në shkurt të 2010-ës në territorin e Shqipërisë, konsiderohet jo vetëm në shkelje të praktikave normale duke shmangur detyrimet doganore, por edhe si paraqitje e fakte të pavërteta.

“[…]Kjo mënyrë sjelljeje e subjektit të rivlerësimit tregon qasjen e tij në raport me respektimin e ligjit. Sjellja e subjektit, për shkak të rëndësisë që ka besimi i publikut tek integriteti dhe autoriteti i ushtrimit të ndjekjes penale, përbën zgjedhje, të cilat jo vetëm nuk shërbejnë në krijimin e besimit të publikut te drejtësia, por e dëmtojnë atë”, arsyeton trupi gjykues megjithëse vëren se ky fakt ka ndodhur kur subjekti nuk ishte emëruar ende si prokuror.

Komisioni vlerëson se ky fakt nuk mund të sjellë pasojë në vlerësimin e pasurisë, por është konsideruar në vlerësimin tërësor lidhur me shkallën e besueshmërisë së tij.

Trupi gjkykues konstaton deklarim të pasaktë të Mërkurit për shpenzimet për ndërtimin e një shtese 40 m2, në një apartament banimi në Sarandë të përfituar nga privatizimi nga familja e origjinës së tij, si dhe paqartësi të burimit të krijimit të një apartamenti me sipërfaqe 112 m2 në sarandë + zyrë me sipërfaqe 28 m2 + truall me sipërfaqe 150 m2. Gjithashtu, Mërkuri nuk ka deklaruar kur ka filluar detyrën një garazh me sipërfaqe 23.8 m2 në Sarandë, për të cilin ka pretenduar se është ndërtuar pa leje rreth viteve 1994-1995 dhe nuk ka provuar burimin e ligjshëm të tre trojeve në Sarandë, me sipërfaqe totale 4200 m2.

Në përfundim, Komisioni konstaton se subjekti i rivlerësimit dhe personat e lidhur nuk kanë shpjeguar bindshëm burimin e ligjshëm të krijimit të pasurive.

Problemet për figurën

 

Drejtoria e Sigurimit të Informacionit të Klasifikuar, DSIK ka ngritur dyshime për përfshirje të Mërkurit në veprime korruptive në disa procese penale. Gjithashtu janë ngritur dyshime për kontakte të papërshtatshme me persona të përfshirë në krimin e organizuar.
Nga verifikimi i fashikujve të çështjeve penale për të cilat janë ngritur dyshime nga DSIK është konkluduar se Mërkuri nuk ka përmbushur funksionet e prokurorit në disa raste, pasi ka vendosur mosfillim procedimi penal pa kryer hetime shteruese.

“[…]Për një vëzhgues të jashtëm krijon premisa serioze të cenimit të besimit te drejtësia, në kontekstin e mosveprimit apo veprimeve të qëllimshme për të mos lejuar mbajtjen e përgjegjësisë penale, duke krijuar efektin e pandëshkueshmërisë në perceptimin e publikut”, konstaton KPK në rastin e verifikimit të një kallëzimi të hetuar nga Mërkuri në vitin 2014.

Sipas KPK, subjekti nuk ka ndërmarrë veprime procedurale të nevojshme për vënien para përgjegjësisë penale të autorëve të veprave të nryshme penale. Ndërkohë, janë evidentuar disa raste kur procedimet penale janë regjistruar 3 ose 4 muaj pas depozitimit të kallëzimeve.

Megjithëse Komisioni konkludon se nuk është provuar që Mërkuri të ketë pasur kontakte të papërshtatshme me persona të përfshirë në krimin e organizuar, vlerëson se subjekti me veprimet dhe mosveprimet e tij ka krijuar kushtet e klimës së pandëshkueshmërisë në sytë e publikut, duke cënuar besimin e publikut te drejtësia.

Mangësitë profesionale

Mangësi të përsëritura janë dhe në aspektin profesional. Sipas KPK subjekti është treguar pasiv në kryerjen e veprimeve hetimore ose nuk ka kryer hetime dhe janë konstatuar raste kur arsyetimet janë gjetur të pabazuara në legjislacionin procedural penal.
Gjithashtu, janë evidentuar raste kur Mërkuri nuk ka referuar rrethanat rënduese të të pandehurit ose i ka hequr lirinë një qytetari të pafajshëm për shkak të moskryerjes së hetimeve të nevojshme.

“ Këto mosveprime të subjektit kanë afektuar indikatorët e njohurive të ligjit, aftësitë organizative të etikës dhe integritetit, të parashikuara në nenet 74 dhe 75 të ligjit nr. 96/2016, ‘Për statusin e gjyqtarëve dhe prokurorëve në Republikën e Shqipërisë’”, citohet në vendim.

Trupi gjykues arrin në konkluzionin se subjekti ka demonstruar mangësi të theksuara të njohurive ligjore, duke shkelur procedurën.“[…]gjatë ushtrimit të profesionit ka demonstruar gjykim të dobët, që ka sjellë, gjithashtu, shkelje të të drejtave të palëve, në nivel të tillë që shihen të pamundura të riparohen nëpërmjet programit trajnues në Shkollën e Magjistraturës”, konstaton KPK dhe vlerëson se në kushtet kur gabimet evidentohen të përsëritua në mënyrë të vazhdueshme, subjekti konsiderohet i papërshtatshëm për aftësitë profesionale.

Ndërsa kryesuesi Hamitaj në pakicë vlerëson se mangësitë profesionale të konstatuara nuk e bëjnë Mërkurin të papërshtatshëm profesionalisht, por sipas tij në vlerësimin tërësor bindjen se subjekti i rivlerësimit ka cënuar besimin e publikut në sistemin e drejtësisë.

Për të rejat më të fundit behuni pjesë e grupit tonë në facebook : City News Albania

Komentoni

Adresa juaj email nuk do të bëhet publike. Fushat e domosdoshme shënohen *

Vetingu

Transaksione të dyshimta financiare/ Shkarkohet gjyqtarja Eda Kaja

Publikuar

-

Nga

cna lajme vetting

Komisioni i Pavarur i Kualifikimit njoftoi se ka shkarkuar gjyqtaren e  Durrësit Eda Kaja, pas problemeve të gjetura në kriterin e pasurisë.

Në fillim të seancës kryesuesja e trupës Valbona Sanxhaktari njoftoi se fillimisht KPK kishte rrëzuar kërkesën për hapje të hetimit në dy kriteret e tjera dhe bëri me dije se trupa kishte dalë me vendim shkarkimi. Kaja u paraqit në seancë së bashku me përfaqësuesen e saj ligjore, avokaten Romina Zano, shkruan Birn.

Gjyqtarja Eda Kaja e Gjykatës së Rrethit Durrës u përball më 11 nëntor me Komisionin e Pavarur të Kualifikimit, KPK, ndërsa gjatë seancës dëgjimore që zgjati afro katër orë, u pyet dhe dha shpjegime për problemet e konstatuara për pasurinë.



Sipas Birn, gjatë seancës u relatuan një listë e gjatë gjetjesh për disa pasuri të paluajtshme dhe të luajtshme, për transaksionet e të cilave janë ngritur dyshime për Komisionin për veprime fiktive me qëllim shmangien e detyrimeve. Kaja dhe avokatja kundërshtuan këto gjetje, por KPK ka krijuar bindjen se ajo nuk ka përmbysur dot barrën e provës.

LEXO EDHE:  Olsian Çela raport mbi gjendjen e kriminalitetit në vend/ Deputetët “injorojnë” Prokurorin

LEXO EDHE:  Artan Hoxha tregon përse vettingu filloi nga policët/ Ja cilët janë peshqit e mëdhenj

Procesi i vetingut për gjyqtaren Kaja u krye nga trupi gjykues i KPK i kryesuar nga Valbona Sanxhaktari, me relator Olsi Komicin dhe anëtare Xhensila Pine. Në cilësinë e vëzhguesit ndërkombëtar ishte i pranishëm Gerrit Sprenger.

Eda Kaja e ka filluar karrierën në sistemin e drejtësisë në vitin 1992 si ndihmës gjyqtare dhe është emëruar në funksionin e gjyqtares në 1994-ën. Ajo punon prej më shumë se dy dekadash si gjyqtare e Gjykatës së Durrësit.

LEXO TE PLOTE

Vetingu

La të lirë zyrtarët që abuzuan me tenderat/ Gjyqtarja jep llogari në Vetting

Publikuar

-

Nga

cna lajme vetting

Vettingu po vijon, ndonëse me ritme të ngadalta.

Në radhën e sitës së Vettingut është gjyqtarja Eda Kaja, dosja e së cilës do të shqyrtohet nga trupa gjykuese e KPK-së e përbërë Valbona Sanxhaktari, Xhensila Pine dhe Olsi Komiçi

Emri i saj është lakuar për një sërë çështjesh, që kanë pasur ndjeshmëri në opinionin publik.

Në shtator 2017, Këshilli i Lartë i Drejtësisë nisi një inspektim në Gjykatën e Kavajës pas vendimit të dhënë 2 vite më herët për Fadil Kasemin, i cili parë vrau ish-bashkëshorten e tij Fildeze Hafizi me armë zjarri në zonën e “Xhamllikut” në Tiranë.

Në grupin e tre gjyqtarëve të inspektuar ishte edhe Eda Kaja.

Fillesat datojnë në vitin 2015 kur Fadil Kasemi tentoi të vriste ish-bashkëshorten gjyqtare në një restorant në Golem nuk u klasifikua si tentativë vrasje, por për “Mbajtjen pa leje të armëve luftarake” dhe të “Dhunës në familje”. Ish-bashkëshorti i gjyqtares u dënua për “Armëmbajtje pa leje në banesë” që dënohet nga 1 deri në 5 vjet burg, dhe jo për “Armëmbajtje pa leje në makinë apo ambiente publike” që dënohet nga 7 deri në 15 vjet burg.

Nuk dihet  se në çfarë përfundimi ka dalë Këshilli i Lartë i Drejtësisë, por gjyqtarja Eda Kaja rezulton e përfshirë edhe në çështje të tjera.

Në tetor të vitit 2017 ajo liroi nga salla e gjyqit një shtetas turk, i cili me vendim të Gjykatës së Lartë Kriminale turke ishte shpallur në kërkim ndërkombëtar për organizatë terroriste.

Gjyqtarja Kaja e la të lirë shtetasin Muhammet Yasir Aydogmus, ndonëse nga zyra e Interpolit, ai rezultoi person në kërkim ndërkombëtar.

Arrestimi i përkohshëm i tij u bë nga Policia e Durrësit më 11 tetor 2017, nga ku më pas do të nisnin procedurat e duhura ligjore me qëllim ekstradimin drejt Turqisë, në sajë edhe të marrëveshjeve që kanë dy shtetet.

Më tej në vitin 2018, në media u raportua se gjyqtarja Eda Kaja, kishte lënë të lirë zyrtarë të Portit të Durrësit, që dyshoheshin nga Prokuroria për  abuzime me tenderat.

LEXO EDHE:  Vendimi për Donika Prelën/ Ish-ministri i Ramës kundër Vettingut

LEXO EDHE:  Olsian Çela raport mbi gjendjen e kriminalitetit në vend/ Deputetët “injorojnë” Prokurorin



I proceduari kryesor në këtë rast ka qenë ish-drejtori i portit, Aleksandër Lipivani, një nga emërimet e LSI-së,  i cili u shkarkua në fund të vitit 2017.

Sipas prokurores Ornela Rrumbullaku, ai bashkë me juristë, ekonomistë, inxhinierë apo pjesëtarë të forcave të sigurisë në port, kanë bërë abuzime të shumta me tenderat, por gjyqtarja Kaja, ka refuzuar kërkesën e Prokurorisë për arrest me burg.

Pasuria

Sipas deklaratave të pasurisë së gjyqtares Kaja, rezulton se në vitin 2017 është punësuar djali i saj në Autoritetin Portual të Durrësit, si Specialist në Drejtorinë e Forcave të Sigurisë Portuale.

Nuk dihet nëse ka qenë kjo arsyeja që ka ndikuar në vendimmarrjen e Kajës, por është detyrë e Komisionerëve të Vettingut, që të hetojnë rastet e dyshimta ku Kaja është e përfshirë.

Sa i përket pasurisë, rezulton ka pasuri të patundshme si trashëgimi nga nëna e saj.

Në vitin 20003 si pasuri të patundshme ajo deklaron një truall në bashkëpronësi, ndërsa në vitin 2005 deklaron se ka përfituar një apartament 3+1, mbi tokën që gjyqtarja ka trashëgimi nga nëna e saj. Gjithashtu deklaron se ka përfituar një garazh dhe një dyqan.

Në vitin 2008 ajo ka blerë apartament 1+1 në plazhin e Durrësit, me vlerë 41 600 euro si dhe ka shitur një dyqan, me vlerë 23 000 euro.

Në vitin 2009 bashkëshorti i saj ka blerë një makinë në shumën 5 000 euro, ndërsa një viti më vonë ai ka shitur 100 % të aksioneve të autoshkollës Glorieta në shumën 100 mijë lekë.

Në vitin 2018 edhe vjehrra e saj ka blerë një apartament me vlerë 17 000 euro.

Ndërkohë që ka janë bërë këto blerje, ajo deklaron dhe një kredi 5 000 euro, që deri në 2018 rezulton e pashlyer përfundimisht./CNA.al

LEXO TE PLOTE

Vetingu

Pasuria fundos gjyqtarin/ Një tjetër magjistrat jashtë sistemit të drejtësisë

Publikuar

-

Nga

cna lajme vetting

Komisioni i Pavarur i Kualifikimit njoftoi të premten vendimin për shkarkimin nga detyra të gjyqtarit të Vlorës, Ervin Trashi. Gjyqtari Trashi nuk ishte i pranishëm gjatë shpalljes së vendimit.

Gjatë seancës dëgjimore më 9 nëntor, u relatuan probleme në pasurinë e gjyqtarit Ervin Trashi si dhe balancë negative në shumën totale 7.7 milionë lekë. Problem u gjet edhe në mosdeklarimin prej tij të një procedimi penal.

Trashi i kundërshtoi gjetjet e KPK dhe kërkoi hapje të hetimit edhe në kriterin e profesionalizmit, shkruan Birn.



Trupi gjykues që kreu procesin e vetingut për gjyqyarin Trashi kryesohej nga Brunilda Bekteshi, me relatore Firded Shulin dhe anëtare Suela Zhegun.

LEXO EDHE:  Olsian Çela raport mbi gjendjen e kriminalitetit në vend/ Deputetët “injorojnë” Prokurorin

LEXO EDHE:  Gjyqtarët dhe prokurorët e dorëhequr/ PD: Të përjashtohen nga Vettingu

Kryesuesja Bekteshi sqaroi gjatë shpalljes së vendimit, se gjyqtari Trashi nuk kishte arritur të kundërshtonte gjithë barrën e provës dhe për kete arsye ishte vendosur të mos pranohej kërkesa e tij për çeljen e hetimit administrativ për profesionalizmin.

Ervin Trashi përfundoi studimet në Shkollën e Magjistraturës në vitin 2008 dhe u emërua gjyqtar në Gjykatën e Gjirokastrës. Prej vitit 2011, ai e ushtron funksionin pranë Gjykatës së Rrethit Gjyqësor Vlorë./CNA.al

LEXO TE PLOTE