Ambasadori i ri amerikan në Prishtinë, Jeff Hovenier, tha të hënën se Shtetet e Bashkuara janë dhe do të vazhdojnë të mbeten partner i palëkundshëm i Kosovës.

Ai i bëri këto komente pas pasi i dorëzoi letrat kredenciale presidentes së Kosovës, Vjosa Osmani.

“Shtetet e Bashkuara janë partneri i palëkundshëm i Kosovës dhe kjo do të vazhdojë. Një përkushtim që dua të ndaj me ju, është përkushtim nga ambasada e Shteteve të Bashkuara; para se gjithash dhe mbi të gjitha ne jemi miqtë tuaj, ne jemi në anën tuaj, ne do të punojmë me ju, qeverinë tuaj, njerëzit tuaj, shoqërinë civile, qytetarët, për të çuar përpara përparësitë që përfshijnë promovimin e demokracisë, që përfshijnë mbështetjen e mëtejshme për zhvillimin e institucioneve të pavarura, gjyqësorit dhe sundimit të ligjit, që janë aq të rëndësishme sikurse janë përpjekjet tona të vazhdueshme globale për të luftuar korrupsionin dhe për të vendosur drejtësi dhe në këtë rast drejtësi për të gjithë qytetarët e Kosovës”, tha ai duke nënvizuar se do të vazhdojë të mbështesë përpjekjet e qeverisë së Kosovës për t’u afruar me institucionet evropiane dhe euroatlantike.

Ambasadori Hovenier tha se populli i Kosovës ka bërë atë që duhet, për t’i shërbyer me të drejtë vendit të tij në skenën ndërkombëtare dhe për të krijuar një shtet të suksesshëm demokratik dhe shumë etnik.

“Jam krenar për rolin që luajtën Shtetet e Bashkuara në mbështetje të popullit të Kosovës teksa e arritën këtë. Kam pasur mundësinë disa herë në karrierën time të jem pjesë e atij procesi dhe përsëri është nder i karrierës sime”, tha ai.

Presidentja, Vjosa Osmani, tha se Kosova beson dhe promovon vlerat të cilat i përfaqësojnë Shtetet e Bashkuara, që mbështeten në liritë demokratike.

“Kosova sot është shumë ndryshe nga Kosova të cilën e kujton ambasadori Hovenier sepse ka ecur përpara, mirëpo një gjë ka qëndruar konsistente gjatë gjithë kësaj kohe, kjo është marrëdhënia dhe partneriteti e miqësia jonë me Shtetet e Bashkuara të Amerikës. Ne jemi rritur dhe zhvilluar si vend si dhe do të vazhdojmë ta bëjmë këtë sepse jemi të bekuar të kemi SHBA-të pranë nesh në çdo hap të rrugëtimit tonë. Roli i ambasadorit të Shteteve ë Bashkuara të Amerikës në Kosovë është thelbësor për të garantuar që marrëdhënia jonë të vazhdojë të lulëzoj”, tha ajo.

Presidentja Vjosa Osmani dhe ambasadori amerikan në Prishtinë, Jeffrey Hovenier vendosen kurora lulesh te shtatorja e ish presidentit të Kosovës, Ibrahim Rugova, në nderim të kontributit të tij.

“Këtë doja ta bëja që në ditën time të parë si ambasador i Shteteve të Bashkuara në Kosovë për respektin që kam për presidentin Rugova dhe atë që ai përfaqësonte në atë kohë. Unë pata nderin ta njoh atë në procesin e Rambouilletit në atë kohë, dhe e di se çfarë ai përfaqëson dhe besoj se është shumë e rëndësishme që ta kujtojmë e nderojmë”, tha ambasadori Hovenier.

Jeffrey Hovenier, arriti të dielën në Prishtinë, pak ditë pasi u betua si ambasadori i gjashtë amerikan në Kosovë. Ai pason ambasadorin, Phillip Kosnett, i cili drejtoi misionin diplomatik amerikan që nga viti 2018.

Zoti Hovenier një diplomat karriere ka shërbyer së fundmi si zëvendës ambasador në Turqi, ndërsa më herët ishte zëvendës shef në detyrë i Misionit dhe ministër këshilltar për Çështjet Politike në Ambasadën amerikane në Berlin. Ai ka shërbyer gjithashtu në misionet amerikane në Kroaci, Greqi, Panama, Paraguai dhe Peru si dhe në Organizatën për Siguri dhe Bashkëpunim në Evropë (OSBE).

Zoti Hovenier ka përvojë në Kosovë. Ai ishte pjesë e ekipit të të dërguarit të posaçëm të Kombeve të Bashkuara për statusin e Kosovës, Martti Ahtisaari dhe në vitin 2018 ishte nderuar nga ish presidenti i Kosovës, Hashim Thaçi, me Medaljen Presidenciale Jubilare për 10 vjetorin e pavarësisë së Kosovës, “për kontributin e tij për lirinë dhe pavarësinë e Kosovës”.

Ambasadori Hovenier merr detyrën në Kosovë në një periudhë kur janë shtuar thirrjet për një angazhim më të fuqishëm amerikan në procesin e normalizimit të marrëdhënieve me Serbinë, por edhe ruajtjen e paqes në Ballkanin Perëndimor.

Pas emërimit të zotit Hovenier në Prishtinë, administrata amerikane emëroi zotin Christopher Hill, për postin e ambasadorit të ardhshëm amerikan në Serbi.

Vëzhguesit e shohin me sy të mirë faktin se administrata amerikane vendosi emërimin diplomatëve me përvojë të gjatë në vendet e rajonit për të shërbyer si ambasadorë dhe vlerësojnë se emërimet e tilla do të jenë në funksion të zgjidhjes së çështjeve të hapura./voa

Ministria e Shëndetësisë njoftoi më 10 dhjetor se janë regjistruar 236 raste të reja me koronavirus.

Rastet e reja dalin pas testimit të 8,460 mostrave.

Në raportin për 24 orët paraprake bëhet e ditur se janë shëruar edhe tetë pacientë, ndërkaq raste aktive janë 1,780.

Ndërkaq, sa i përket vaksinimit kundër koronavirusit, autoritetet shëndetësore kanë administruar edhe 904 doza kundër sëmundjes COVID-19.

Që prej fillimit të procesit të imunizimit, në Kosovë me dy doza të vaksinës janë imunizuar 790,175 persona.

Në Kosovë, të drejtë vaksinimi kanë të gjithë personat mbi 12 vjeç. Ndërkaq, personat mbi 18 vjeç, që janë imunizuar me dy doza para tre muajsh, mund të marrin dozën përforcuese apo dozën e tretë.

Të hënën, Instituti Kombëtar i Shëndetësisë Publike (IKSHPK) paralajmëroi se në Kosovë mund të përkeqësohet situata epidemiologjike, për shkak të përhapjes së variantit Omicron të koronavrisut. Ky variant besohet se është më i transmetueshëm sesa variantet paraprake.

“Është i domosdoshëm kujdesi i shtuar i të gjithëve që në mënyrë strikte të respektohet distanca fizike, të përdoren maskat, të bëhet dezinfektimi dhe ajrosja e hapësirave, duke pamundësuar dhe shmangur përhapjen eventuale të mëtejme të infeksionit të COVID-19”, është thënë në një postim të këtij Instituti në rrjetin social, Facebook.

IKSHPK po ashtu ka thënë se vaksinimi është mënyra më e mirë për t’u mbrojtur nga virusi, dhe u ka rikujtuar qytetarëve se mund të imunizohen çdo ditë në të gjitha institucionet e kujdesit parësor nëpër komuna./rel

Victor Escobar është kolumbiani i parë që vdes nga eutanazia pa pasur një sëmundje vdekjeprurëse.

Lajmi u bë me dije nga avokati i tij Luis Giraldo, i cili konfirmoi gjithashtu se eutanazia ishte tërësisht ligjore.

“Ne arritëm qëllimin që pacientët si unë, të cilët nuk janë me sëmundje vdekjeprurëse, por degjeneruese, të fitojnë këtë betejë, një betejë që hap dyert për pacientët e tjerë që vijnë pas meje dhe që tani duan një vdekje dinjitoze,” – tha 60-vjeçari në një video për mediat.

Escobar vuajti nga një sëmundje pulmonare kronike në fazën përfundimtare, e cila nuk është domosdoshmërisht vdekjeprurëse, por ul ndjshëm cilësinë e jetës dhe pacienti fatkeqësisht vuan shumë.

Procedura u zhvillua në një klinikë në Cali, kryeqyteti i provincës Valle del Cauca të Kolumbisë.

Escobar kishte luftuar dy vjet për të drejtën e tij për eutanazi përballë kundërshtimit nga mjekët, klinikat dhe gjykatat, edhe pse Gjykata Kushtetuese vitin e kaluar pranoi se procedura nuk duhej të ishte e disponueshme vetëm për personat me sëmundje vdekjeprurëse./euronews