Fantazisti shkodran, Erjon Vucaj, është shumë pranë kalimit te Vllaznia. Vucaj ka arritur në parim marrëveshjen me presidentin Alban Xhaferi dhe tashmë mbetet zyrtarizimi i kontratës.

31-vjeçari ka marrë dje letrat nga klubi kosovar i Dritës dhe është tashmë futbollist i lirë. Në këto kushte, pas bisedës që bëri me Xhaferin pak ditë më parë, Vucaj mësohet se dha fjalën për të firmosur me Vllazninë menjëherë pasi të zgjidhë kontratë me Dritën.

Vucaj në orët e fundit ka marrë një oferte joshëse nga klubi shqiptar i Superligës malazeze, Deçiç i Tuzit. Ai u largua nga Vllaznia në verën e vitit 2018, ku fillimisht luajti në Ligën e Europës me Luftëtarin, më pas u transferua te Drita e Gjilanit.

Për rreth 4 vite fantazisti fitoi gjithçka me klubin kosovar, duke u kthyer shumë shpejt në një prej lojtarëve më të rëndësishëm. Cilësitë e tij dhe për më tepër karakteristikat që ka në ndërtimin e lojës, përmbushin kërkesat e trajnerit Brdariç për një mesfushë sa më të fortë.

Ka lëvizje te Skënderbeu. Veç afrimeve të Frashërit dhe grekut Antoniadhis, duket se janë ende në fazë vlerësimi dy lojtarët e tjerë që janë bashkuar me ekipin. Si Klodian Gjino, ashtu edhe Skerdilajd Levendi kanë luajtur në testin miqësor me Dinamon, por trajneri Memmelli ka kërkuar më shumë kohë në dispozicion për të krijuar një ide më shumë se sa të vlefshëm mund të jenë për skuadrën dy lojtarët në fjalë.

Gjithsesi, “Panorama Sport” shkruan se Gjino dhe Levendi nuk pritet të vijojnë provën te Skënderbeu, pasi Memelli ka vërejtur se lojtarët nuk e bëjnë dot diferencën nga pjesa tjetër e skuadrës. Levendi aktivizohet si mesfushor qendre dhe ka luajtur me Apoloninë, ndërsa Gjino ishte pjesë e Hania në Greqi sezonin e shkuar dhe luan gjithashtu në mesfushë.

Silvio Zogaj nuk është më futbollist i Teutës. Ka qenë vetë klubi durrsak që ka njoftuar ndërprerjen e bashkëpunimit mes palëve, nëpërmjet një komunikate të shpërndarë në rrjetet sociale.

Futbollisti iu bashkua bregdetarëve në vjeshtën e 2020-ës dhe ishte pjesë e ekipit që fitoi titullin kampion sezonin e kaluar, por
nuk arriti të bëhet asnjëherë protagonist, pasi luajti pak dhe thuajse në të gjithë rastet, duke ardhur nga pankina.

Edhe këtë sezon Zogaj ka mbetur mbrapa në hierarkinë e formacionit të Edi Martinit dhe për këtë arsye palët kanë
vendosur “divorcin”, teksa mbetet të shihet ku do të transferohet futbollisti për pjesën e mbetur të sezonit.