Tre vite pas këtij skandali, i vetmi “përgjegjës” për arratisjen është vetëm një punonjës i thjeshtë policie, baba i 4 fëmijëve. Ndaj të tjerëve, prokurorë, gjyqtarë apo drejtues të Policisë së Kukësit, asnjë hetim apo dënim.

Në redaksinë e emisionit investigativ Fiks Fare u ankua Xhevair Nërguti, i cili ka qenë punonjës i policisë i rolit bazë, i stacionuar për ruajtjen në dhomat e shoqërimit në Policinë e Kukësit. Por, prej muajit nëntor 2019, në momentin e arrestimit të shtetasit Sebastian Viljamov, ai u “urdhërua” nga eprorët që ta ruante në mjediset e një hoteli, ku i arrestuari ishte lënë në “arrest shtëpie”. “Kam qenë punonjës policie dhe jemi urdhëruar që ta ruajmë në ambiente hoteli. Hoteli ‘Gjallica’ ku ishte vendosur kishte 7 dyer. Gjykata shkruante në vendim se urdhërohej policia gjyqësore vetëm të ekzekutonte vendimin.

Por, gjyqtari nuk kishte shkruar nëse duhet apo jo të ruhej. Apo kush duhet ta ruante. Shkruante vetëm që i arrestuari mos të largohej nga hoteli. Ne na urdhëruan drejtuesit e Policisë së Kukësit. Njëherë ta ruanim, njëherë mos t’i merrnim sendet personale. Ai kishte telefona dhe gjithçka tjetër. U vendos në qendër të qytetit” tregon denoncuesi, ish-punonjës policie. Më tej pohon se shqiptaro-serbi është arratisur nga hoteli në datën 1 janar 2019. “Kanë ardhur 3 persona dhe e kanë kërkuar. Ishte dita e parë e vitit. Policia ishte në gadishmëri, dhe përveç meje dhe kolegut brenda hotelit, kishte edhe patrulla jashtë. I arrestuari zbret në kafenenë me këta persona. Unë shkoj që ti marr ushqimet në dhomë, pasi atë ditë s’kishte guzhinë. Te lokali qendroi kolegu im. Kur erdha, ai kishte ikur” thotë Xhevairi, ndërsa pohon se kanë shoqëruar 3 shtetasit që e ndihmua, madje u paraqitën edhe vetë vullnetarisht në komisariat.

Por, në vendim shkruhej se “arrestohen në flagrancë” dy punonjësit e policisë. “Ne shkuam vetë” thotë ai, teksa pas dy ditësh gjykata i liroi me masën detyrim paraqitje. Ndërkohë, që unë ika në Itali, e kisha 4 fëmijë për të mbajtur, plus që më përjashtuan nga Policia e Shtetit. Vijoi procedimi dhe gjykimi dhe përfundimisht më dënojnë me 18 muaj me kusht. Ndërkohë, kolegut tim i ndahet çështja dhe ai merr pafajësi. “I vetmi zyrtar që jam dënuar, isha unë. Askush tjetër. As gjyqtari që e la në hotel. As përfaqësuesit e akuzës që ndryshuan qendrim, njëherë në burg dhe njëherë në arrest shtëpie. As drejtuesit e policisë që ndryshonin urdhrat e kontrollit. Vetëm unë” përfundon ai.

Fiks Fare ka siguruar vendimin e gjykatës, që e la në arrest shtëpie në hotel Sebastjan Viljamov. Vendimi është dhënë në datën 12 nëntor 2018, nga gjyqtari Erjon Çela.

Në të thuhet se në datën 9 nëntor 2018, në Doganën e Morinës është arrestuar shtetasi Sebastjan Villjamov, lindur në Prizren Kosovë dhe banues në Beograd, Serbi, pasi në sistem rezultonte “kërkohet nga autoritetet kroate. Gjykata e Rijekës e kishte dënuar dy herë me nga 3 vite burg, me akuzat e plagosjes, evazionit, falsifikimit etj.

Pas arrestimit, Prokuroria e Kukësit ka paraqitur në gjykatë kërkesën për vleftësimin si të ligjshëm të arrestimit dhe caktimin si masë “arrest me burg”. Në vendim, shkruhet se “gjatë gjykimit të çështjes, organi i akuzës, i kërkoi gjykatës që ndaj të arrestuarit të caktohet masa e sigurimit “arrest në shtëpi” dhe jo ajo e kërkuar fillimisht. Shkak u bë një deklaratë noteriale, ku pronarja e një hoteli ka deklaruar se mund të qëndrojë te hoteli “Gjallica”. Ndërkohë, në seancë, edhe mbrojtja ka kërkuar që të lihet në arrest shtëpie, siç kërkoi prokuroria!

Më tej, në vendim thuhet se “gjykata vlerëson se masa e sigurimit arrest me burg e kërkuar fillimisht nga organi i prokurorisë do të ishte masa e sigurimit më e përshtatshme, deri në pritjen e ekstradimit. Por, shkruan se, “gjykata nuk mund të caktojë një masë sigurimi më të rënda se ajo e kërkuar nga prokurori”. Sipas vendimit, “masa që duhet caktuar është ajo e arrestit shtëpiak. I arrestuari urdhërohet që të qëndrojë dhe të mos largohet nga adresa: “Hotel Gjallica”, në lagjen nr.2 në Kukës. Në pikën 3 të vendimit, shkruhet; urdhërohet Policia Gjyqësore pranë Komisariatit të Policisë Kukës që të bëjë ekzekutimin e këtij vendimi. Pra, në asnjë rast në vendimin 11 faqesh, gjykata nuk ka urdhëruar ruajtjen e të arrestuarit me policë në hotel!!

Ndërkohë, në nenin 237 të Kodit të Procedurës Penal shkruhet “gjykata urdhëron të pandehurin të mos largohet nga banesa e tij…”. Në pikën dy shkruan se “kur cakton këtë masë, gjykata përcakton edhe mënyrën e ekzekutimit dhe të mbikëqyrjes së saj”. Por, në asnjë rast, gjykata nuk ka përcaktuar mënyrën e ekzekutimit dhe mbikëqyrjes të të arrestuarit, duke e lënë në një hotel në mes të Kukësit! Çka solli më pas, arratisjen, jo nga qelia, por nga dhoma e hotelit!

***

Bisedë mes denoncuesit dhe drejtuesve të Policisë së Kukësit

Shefi i Rendit – Ju e dini shumë mirë, unë kam lënë 11 detyra me të shkrume, te procesverbali i marrjes dhe dorëzimit të shërbimit. Ndër të tjera unë kam thënë që kur e merr, kur e dorëzon, fizikisht duhet të jetë aty. Mbasandej, se çfarë erdhi pas kësaj, ju jeni përgjigj, është pjesë e sistemit të drejtësisë. Nuk ka drejtues që të thotë mos e ruaj Tahirin, s’ka ndonjë lidhje me mu.

Denoncuesi – Gjykata nuk e ka të shkrume që të ruhet me patrullë dhe atje thuhet që….

Shefi i Rendit – Ëëëë

Denoncuesi – Dhe Gjykata e Apelit…

Shefi i Rendit – Dëgjo, dëgjo. Aty thotë një rresht e shkruajtur bash me tre gërma që thotë “ka rrezik ikje”. Nuk e thotë që të ruhet me shërbimet e rendit!

Denoncuesi – Se këtë urdhrin tonë…

Shefi i Rendit – Shko merrja atyne… Unë kur kam marrë vendimin që Sebastiani, ku është mo Rita Gjati, moj aaa ëëëë. Ku është Rita Gjati (prokurorja e çështjes) oooho. Ja fleta e fundit.

Denoncuesi – Unë du me e marrë me firmë që kam qenë planizu te vendi i paraburgimit në organikë.

Shefi i Rendit – Po. Po mirë ne të kena urdhëru. Ne s’të kena çuar privatisht, ne të kena çuar zyrtarisht. I planizu me shërbim

Denoncuesi – S’ka të drejtë patrulla të ruaj personat me arrest shtëpie…

Shefi i Rendit – E din ai! E dinë ata që e gjykojnë, jo unë (drejtuesit dhe ish-drejtuesit e Policisë së Kuksit).

Denoncuesi – Atëherë ti na ke thënë që me shku me shërbim atje.

Shefi i Rendit – Po, mo, këtë s’ta mohon kush. Këtë s’ta mohoj.

Denoncuesi – Kush e ka dhënë urdhrin?

Shefi i Rendit – Atëherë, nëpërmjet avokatit do të bësh një kërkesë zyrtare komisariatit, të protokollume.

Denoncuesi – Normal, të protokollume. Po drejtorit apo shefit të komisariatit?

Shefi i Rendit – Shefit të komisariatit. Ka qenë e protokollume (urdhri), ka qenë Agim Basha Shefi i Komisariatit, unë kam qenë Shef Rendi. Unë kam qenë autori që kam lënë detyra. (Kërkesa) duhet të jetë e protokollume në sekretari.

Denoncuesi – Jam djegur vetëm unë për këtë punë, ai që ka qenë me mua mori pafajësi.

Shefi i Rendit – Ok, në vendimin e Sebastianit, aty ka pas të shkrime në një faqe mbrapa thotë “ka rrezik ikje”.

Denoncuesi – S’ka pas siguri me e lënë atje, unë të kuptoj, Hotel “Gjallica” e di sa hektarë është.

Shefi i Rendit – Kurse tjetra, një shtetas i huaj me legjislacionin shqiptar, nuk duhet të ruhet me ambient privat. Ja kam thënë unë aty. Se keni qenë neglizhentë, është puna juaj.

Denoncuesi – Kemi qenë me komandantin e grupit tonë ditë e natë. Kanë qenë edhe dy policë para hotelit, ti e di shumë mirë.

Shefi i Rendit – Ku shkoi oficeri, Muharrem Kolaveri? A u përjashtua?!

Denoncuesi – Po.

Shefi i Rendit – Bëri shënimin pas ikjes së Sebastianit, te libri i planizimit të shërbimit, kush është ai që..

Denoncuesi – Po dhe Gani Gega, i ka kërkuar me heq telefonin (të arrestuarit). I ka thënë Drejtori i Policisë, lërë mos u merr me të, të merren policët e shërbimit…

Shefi i Rendit – Vetëm në sekretari e gjen…

Denoncuesi shkon të takojë oficerin Gani Gega

Denoncuesi – Për atë problemin tim, vetëm për atë fjalën që është shprehur, të ka thënë Drejtori i Policisë, lërë ta ruajnë shërbimet atje, ti s’ke punë aktualisht.

Oficeri Gani Gega –  Më ka thënë mua ai, s’të ka thënë ty!

Denoncuesi – E kuptoj që të ka thënë ty.

Oficeri Gani Gega – E kam bërë të madhe (telefonin e Sebastianit), edhe drejtori të merret patrulla s’ke punë… Mos u konflikto me të. Kaq!/tch

Sistemi i ri i drejtësisë, që u ngjiz për të qenë i pavarur nga politika dhe për të luftuar korrupsionin në nivelet e larta të qeverisjes, po shfaq simptomat e së njëjtës sëmundje, nga i cili vuante sistemi i vjetër.

Për të kuptuar fijet që luhen në prapaskenë shërben denoncimi i prokurores Sonila Muhametaj, e cila ka dërguar në gjykatë trupën e Këshillit të Lartë të Prokurorisë, të cilën e akuzon për manipulim të emërimeve në SPAK. Sipas lajmit të gazetares Anila Hoxha, prokurorja pretendon se pikët në garën për të qenë pjesë e SPAK, u manipuluan.

Emri që ngre dyshime të forta për ndërhyrjen e politikës është ai i prokurorit Alfred Shehu. I famshëm për konferencën me gazetarët pas vrasjes së Pjerin Xhuvanit në Elbasan, prokurori Shehu u bë protagonist i një manipulimi të pastër për interesa politike.

Duke mohuar publikisht që në vendin ku u vra Pjerin Xhuvani nuk u gjetën materiale zgjedhore, prokurori Alfred Shehu i kreu një shërbim të çmuar Partisë Socialiste pak ditë para 25 Prillit.

Më pas në sallën e gjyqit, ai pranoi të kundërtën e asaj që kishte pohuar në konferencën me gazetarët. Rezultoi se bashkëpuntorë të Pjerin Xhuvanit kishin në makina materiale zgjedhore dhe ata ishin ndaluar nga militantë të Partisë Demokratike, sepse po blinin vota në lagjet më të varfra të Elbasanit, përmes disa listave që përdornin patronazhistët e PS.

Pasi Rama fitoi mandatin e tretë, karriera e Alfred Shehut njohu vetëm ngjitje. Nga Elbasani ai u katapultua si drejtues i prokurorisë së Sarandës. Nga Saranda u propozua si prokuror i SPAK dhe brenda pak javësh fitoi garën me ish prokuroren e Krimeve të Rënda, Sonila Muhametajn.

Por kjo e fundit nuk e ka lënë me kaq. Në ankimimin që i ka bërë procedurave të përzgjedhjes së prokurorëve të tjerë në SPAK, Muhametaj arsyeton se Alfred Shehu u emërua padrejtësisht në këtë post.

Për Shehun, shprehet prokurorja, KLP nuk u thellua dhe nuk mori informacion pranë Prokurorisë së Elbasanit se si kishte hetuar përderisa “prokurori fitues i SPAK pati disa qëndrime jo korrekte pasi u pyet nga media për prova mbi vrasjen e Pjerin Xhuvanit”.

Padia ngre dyshime të forta për kapjen e SPAK nga Partia Socialiste dhe implikimin në të njëjtën skemë edhe të Këshillit të Lartë të Prokurorisë.

Në padinë e saj, Sonila Muhametaj thotë se procesi i emërimeve në SPAK duhet të jete i hapur, ndërkohë që dy anëtarë të KLP sipas paditëses gjenden në konflikt interesi dhe duhet të kishin dhënë dorëheqjen . Sepse Sonila Muhametaj këmbëngul se i ka pasur nën hetim ata apo të afërmit e tyre. Duke u krahasuar me kolegët Shehu dhe Gokaj ajo kujton jo vetëm volumin e dosjeve që ka hetuar, por edhe parametrat që kërkohen për t’u ngritur në karrierë në SPAK./LAPSI

Një njoftim nga zëdhënësi i Policisë së Shtetit: “Finalizohet operacioni policor i koduar “KRIPTOFARM”, i zhvilluar nga Njësia C për Hetimin e Krimeve Kibernetike në Departamentin e Policisë Kriminale në Policinë e Shtetit në bashkëpunim me Drejtorinë Vendore të Policisë Durrës. Evidentohen dy laboratorë për prodhimin e kriptovalutës. Sekuestrohen qindra pajisje që shërbenin për prodhimin e kriptovalutës, të cilat ishin në gjendje pune në dy struktura. Vihen në pranga 3 shtetas dhe shpallen në kërkim 4 të tjerë.”

Njoftim që mediat e marrin dhe thonë bravo policia, bravo thonë edhe qytetarët që marrin lajmin nga portalet me shpejtësi apo me vonë në edicionet informative televizive. Deri këtu gjithçka duket një sukses i madh i uniformave blu që paskan bërë namin e kanë zbuluar një krim të madh kibernetik.

Në njoftim thuhet janë kryer hetime të shpejta në lidhje me verifikimin e një aktiviteti kriminal në fushën e prodhimit të kriptovalutave si dhe ndjekjen penale të disa shtetasve për veprat penale të “Mashtrimit Kompjuterik”, “Ushtrimi pa liçencë i veprimtarive financiare”, “Fshehja e të ardhurave” dhe  “Pastrimit të produkteve të veprës penale” .

Policia i fut disa nene kur thotë verifikim, pra nuk ka siguri të plotë se ka kapur në flagrancë një person apo ka zhbuluar një krim. Edhe verifikim edhe krim, pra ende pa hetuar duke verifikuar i futim një njoftim për mediat sikur është bërë nami.

Por dardha e ka bishtin mbrapa.

Më tej e gjithë historia bëhet edhe më qesharake.

“Nga hetimet e kryera nga “Njësia C – për  Hetimin e  krimeve kibernetike në bashkëpunim me Drejtorinë Vendore të Policisë Durrës rezultoi se këta shtetas në bashkëpunim me njëri tjetrin kanë kryer veprime me qëllim ngritjen e dy strukturave për prodhimin e kriptovalutave të cilat krijohen me anë të futjes dhe ndryshimit të të dhënave kompjuterike në pajisje elektronike duke krijuar përfitime monetare si dhe shmangien e procedurave ligjore në lidhje me detyrimet ndaj shtetit por dhe funksionimin e rregullt të këtij aktiviteti përsa i përket të ardhurave duke shfrytëzuar, keqinterpretuar dhe keqpërdorur hapësirat ligjore”,

Një gënjeshtër e madhe sepse strukturat janë regjistruar sipas ligjeve të shtetit shqiptar në QKB dhe pranë çdo autoriteti tjetër duke paguar taksat rregullisht.

Kriptomonedhat pas krijimit rregjistrohen në momentin e transaksioneve ato taksohen pas kalimit të shumave në bankë.

Në rast se pseudo ekspertët nuk e kuptojnë procedurën, duhet që policia të largojë injorantët dhe militantët, duke thirrur profesionistë të fushës, jo kriça.

Për ta justifikuar “bombën” që ju plasi në dorë dhe shpërdorimin e pastër të detyrës për të mos thënë më tej një gjobë kriminale ndaj biznesit, në njoftim thuhet se “Nga verifikimet dhe hetimet e kryera ka rezultuar se këta shtetas megjithëse nuk kanë marrë një përgjigjie pozitive  nga Autoriteti i Mbikqyrjes Financiare  për krijimin e këtij aktiviteti kanë  zhvilluar aktivitetin e tyre i cili bie ndesh dhe me ligjin Nr. 66/2020 “Për tregjet financiare të bazuara në teknologjinë e regjistrave të shpërndarë’ duke qenë se nuk plotëson asnjë nga kriteret e vendosura në këtë ligj”.

Çfarë përgjigje?

AMF i ka thënë zyrtarisht policisë se ky aktivitet është legal dhe nuk ka kompetencë ligjore për liçensim nga AMF.

Po ashtu asnjë aspekt i veprimtarisë së këtyre shtetasve nuk është i qartë përsa i përket aseteve të kompanisë, zhvillimit të aktivitetit, deklarimit të fitimit, futjes së të dhënave kompjuterike me qëllim përfitimin monetar etj.

Së pari, AMF nuk ka çfarë përgjigjë të japë, kur një subjekt rregjistrohet në QKB, qartazi ai ska nevojë për liçensë specifike të kërkuar.

Nuk ka asnjë ligj në Shqipëri që ndalon kriptomonedhat legale apo që të detyron për liçensë të veçantë.

Sërish policia dhe strukturat e përfshira rreken që të justifikojnë zhurmen mediatike dhe nga një grup “kriminal”, na doli tek disa njerëz që skanë pritur përgjigjen për liçensë, kur ligji nuk thotë që duhet liçensë.

Më tej bëhen edhe më qesharakë kur thonë se “Me cilësinë e provës materiale u sekuestruan:

631 copë pajisje elektronike për prodhimin e kriptovalutave, 630 copë panele diellore, 360 copë pajisje elektronike për sigurimin e vazhdueshëm të energjisë elektrike, 71 copë pajisje kompjuterike për procesimin  e të dhënave, 71 copë pajisje kompjuterike për ruajtjen e përkohshme të të dhënave, 71 copë Hard disqe të jashtme, 71 copë pajisje elektronike për stabilizimin e temperaturave, pajisje elektronike për shpërndarjen e internetit, pajisje kompjuterike të lëvizshme  dhe dokumenta të ndryshme të subjekteve, fatura financiare, shënime të ndryshme etj.”.

Policia bëhet edhe më banale pasi të gjitha paisjet janë futur në doganë, janë paguar taksat nga subjekti dhe nuk ka asgjë për t’u fshehur.

Për herë të parë policia shkon të kapë “hajdutin” dhe del “hajduti vetë”, sepse  përballet me një rast ku priste të gjente vjedhje energjie por gjeti kontratë me OSHE dhe energji të paguar miliona lekë, priste evazion fiskal gjeti fatura dhe taksa të paguara, priste fshehje të ardhurash i gjeti të gjitha paratë në bankë, pristë paisje kondrabandë i gjeti të gjitha me fatura zhdoganimi, priste subjekt pa liçensë e gjeti të rregjistruar ne QKB, me administrator dhe krejtësisht legal.

Ky është rasti kur lajthit Policia e Shtetit dhe faktet e tjera mund t’i lexoni këtu.

Ky është rasti kur jo vetëm uniformat blu por edhe disa struktura të tjera shtetërore duke ndjekur nga pas policinë, të paqartë, kaotikë, të paaftë përfshihen në një shpërdorim të pastër detyre.

Ky është rasti kur “mbarset mali e pjell një mi” nga bodrumet e policisë./CNA.al

Bitcoin në Shijak/ Pesë faktet që rrëzojnë pseudo-operacionin policor

Zbulohen dy laboratorë për prodhimin e kriptomonedhave/ Arrestohen tre persona, në kërkim katër të tjerë

Zbulohet një laborator “Bitcoin”/ Sekuestrohen 210 aparatura, një në pranga