Kronika
Shefi i antikrimit në arrati/ SPAK kërkon 8 vite burg për ish zyrtarin e lartë të Policisë
12 vite burg ka kërkuar sot SPAK për Gjergji Kohilën, ish-zyrtarin e Policisë së Vlorës.
Por, për shkak të gjykimit të shkurtuar dënimi përfundimtar i kërkuar është me 8 vite burg për akuzat e “trafikut të narkotikëve” dhe “grupit të strukturuar kriminal”.
Ndërkohë që SPAK ka kërkuar dënimin e tij, Kohila ndodhet në arrati.
Gjergji Kohila, ish shefi i sektorit të luftës kundër krimit të organizuar në drejtorinë e Qarkut Vlorë, ka filluar përballjen me drejtësinë nga arratia në Nëntor të vitit 2017, kur prokuroria lëshoi një urdhër-arresti, pasi dyshohej si i përfshirë në dosjen ‘Habilaj’ për trafikun e kanabisit./CNA.al
Kronika
Tentuan të vrasin efektivët e policisë/ Shkatërrohet grupi kriminal
5 persona janë arrestuar nga operacioni ‘Storm’, dhe dy të tjerë janë nën hetim dhe një është shpallur në kërkim.
Bëhet fjalë për personat që kanë tentuar të vrasin efektivët e policisë në Qafë Kashar dhe Fushë Krujë.
Në pranga janë vënë Ibrahim Difaj, Damian Lleshaj(Besmir Prelaj), Rober Laci, Ilirjan Peci, Erion Mulaj. Nën hetime janë shtetasit
M.M dhe E.V. Ndërsa është shpallur në kërkim Shëtim Kraja.
Ata akuzohen për vrasje të mbetur në tentativë, vjedhje./CNA.al
Kronika
“Zero tolerancë ndaj krimit”/ Gledis Nano “ultimatum” punonjësve të policisë
Drejtori i Përgjithshëm i Policisë së Shtetit, Gledis Nano gjatë një takimi me punonjës të policisë vendore të Shkodrës, ka kërkuar zero tolerancë ndaj krimit dhe goditjen e çdo grupi dhe individi kriminal.
Po ashtu ai kërkoi dhe parandalimin e kultivimit të kanabisit.
Ndërkohë, drejtori i policisë vendore të Shkodrës, Hamdi Fjora, tha gjatë analizës njëvjeçare se viti 2021 ka njohur një rritje të kriminalitetit krahasuar me vitin 2020.
Drejtori i policisë së Shkodrës veçoi zbardhjen e vrasjes së Endri Mustafës në fund ta majit të vitit të kaluar (2021), duke thënë se në ngarkim të autorit ka të dhëna se ka kryer disa vrasje në tri vitet e fundit në Shkodër, duke iu referuar Ibrahim Licit, i cili është ende një person i shpallur në kërkim.
Sipas tij, në vitin që lamë pas shqetësuese për policinë e Shkodrës është edhe rritja e rasteve të kultivimit të bimëve narkotike krahasuar me 2020-ën. Kreu i policisë së Shkodrës tregoi edhe prioritetet e këtij viti.
Më tej, ai theksoi se një rritje kanë pësuar rastet e trafiqeve të paligjshme dhe krimi ekonomik financiar, ndërsa kanë pësuar ulje krimet kundër pronës dhe mjedisit. Prefektja e Qarkut Shkodër, Majlinda Angoni, u shpreh se qeveria shqiptare ka mundësuar të gjitha kushtet për policinë, që të luftojë krimin. Edhe ajo kërkoi zero tolerancë ndaj krimit. Drejtori i Policisë së Shtetit, Gledis Nano, ka qëndruar për rreth dy orë në takimin e zhvilluar në Shkodër./CNA.al
Kronika
Magazina ishte kthyer në laborator droge/ Arrestohen dy punonjës të OSHEE-së në Sarandë
Seksioni për Hetimin e Trafiqeve dhe Narkotikëve në DVP Vlorë, në bashkëpunim me Komisariatet e Policisë Himarë dhe Sarandë, bazuar në informacionet e marra në rrugë operative se në vendin e quajtur “Volloder” pranë fshatit Nivicë, Sarandë, një shtetas kishte përshtatur në një magazinë, një ambient për kultivimin në kushte laboratorike të bimëve narkotike cannabis sativa, organizuan dhe finalizuan operacionin policor të koduar “Volloder”.
Në kuadër të këtij operacioni u arrestuan për veprën penale “Shpërdorimi i detyrës”, shtetasit V. S., 57 vjeç, me detyrë elektricist pranë OSHEE-së dhe G. H., 61 vjeç, banues në Sarandë, me detyrë faturist pranë OSHEE-së, pasi nuk kanë konstatuar lidhjet e paligjshme të energjisë elektrike në ambientet që ishin përshtatur për kultivimin e bimëve narkotike me anë të llambave, në zonën që ata kishin në monitorim.
Në vijim të veprimeve u shpallën në kërkim për veprat penale “Kultivimi i bimëve narkotike” kryer në bashkëpunim, “Prodhimi dhe shitja e narkotikëve” kryer në bashkëpunim dhe “Vjedhja e energjisë elektrike”, shtetasit: K. O. pronari i magazinës dhe K. M., i cili kishte marrë më qira ambientet që ishin përshtatur për kultivimin e bimëve narkotike.
Gjatë zhvillimit të operacionit janë sekuestruar një sasi lënde e dyshuar narkotike cannabis sativa, 100 bimë të dyshuara narkotike cannabis sativa të kultivuara në kubikë dhe 50 llamba elektrike.
