Politikë
Berisha “non grata” nga DASH/ Palmer: SHBA e ka shumë seriozisht çështjen e korrupsionit!
Zëvendës Ndihmës Sekretari i Shtetit për Evropën Matthew Palmer i tha Zërit të Amerikës se përcaktimi i figurave të huaja publikisht nga Sekretari i Shtetit për përfshirje në korrupsion është një prej mjeteve që përdorin Shtetet e Bashkuara për të luftuar korrupsonin. I pyetur në lidhje me kohën e daljes së njoftimit për ish Presidentin Sali Berisha, zoti Palmer tha se koha nuk ka ndonjë rëndësi të veçantë.
“Nuk do t’i kushtoja rëndësi momentit kohor, por ajo që ka rëndësi është serioziteti me të cilin e marrin Shtetet e Bashkuara çështjen e korrupsionit publik. Kjo është një dëshmi e angazhimit tonë për të përdorur ato instrumenta që kemi të disponueshme, përfshirë sanksione sipas nevojës, me qëllim forcimin e luftës ndaj korrupsionit publik dhe për t’u siguruar se ka llogaridhënie për ata që abuzojnë me besimin e publikut”, tha zoti Palmer.
“Ky është një ndër instrumentat që ne kemi për të luftuar korrupsionin publik. Ne i qëndrojmë në krah popullit shqiptar kundër korrupsionit publik dhe përcaktimi i zotit Berisha, që e bën atë të pakualifikuar për një vizë për në Shtetet e Bashkuara, i bën anëtarët e afërm të familjes së tij të pakualifikuar për viza drejt Shteteve të Bashkuara, është një dëshmi e këtij angazhimi”, tha Zëvendës Ndihmës Sekretari i Shtetit./VOA
Politikë
Akuzat për fshehje të pasurisë/ Murrizi flet pa dorashka: Përpjekje për të më mbyllur gojën
Ish deputeti Myslim Murrizi ka folur për hetimin ndaj tij për fshehje të pasurisë, ku tha se kjo është një përpjekje për t’i mbyllur gojën pas denoncimit të bërë për tenderin me uniformat e policies.
Murrizi shprehet se është krenar që është i pasur pasi ka punuar për të aritur pasurinë e tij, duke theksuar se turp i vinte kur ishte i varfër dhe jo pse është i pasur kur nuk ka prekur asnjë para nga fondet publike.
“Gjithë Toninët e sigurimit të shtetit nuk më kanë trembur as në 90 dhe as në 30 vite rresht. Kështu që nuk më intimidon asnjë vemje që vegjeton në Policinë e Shtetit, që vjen nga sigurimi i shtetit. Kjo është dobësi e qeverisjes së PD-së që duhet të kishte vullnetin që kjo armatë të mos ktheheshin në drejtim. Nuk më tremb asnjë shpikje bolshevike nga cilido grup Toninash që bëhet.
Nuk i kam kujt borxh. Nuk kam një lekë nga paratë publike në 30 vite. Kam aktivitetin tim. Po ke biznes, pasuri, po je mbi të tjerët je hajdut. Nuk kam turp të kem biznes. Përkundrazi jam i lumtur të kem pasuri pa futur duart në paratë publike. Mua turp më ka ardhur kur isha fukara. Kam bërë 4 vite shkollë të mesme me një triko, dy vite në një krah, dhe dy vite në krahun tjetër.”/CNA.al
Politikë
Demokratët të zhgënjyer nga Basha/ Bumçi: Mori vendime që shkatërruan opozitën
Aldo Bumçi ka deklaruar se, demokratët e kanë mbështetur ish kryeministrin Sali Berisha, pasi nga Lulzim Basha nuk panë asnjë lloj shprese.
I ftuar në emisionin Arnautistan, Bumçi tha se Basha mori vendime që e shkatërruan opozitën ndaj dhe ishte një zhgënjim për demokratët.
“Berisha i thirri demokratët dhe ata iu përgjigjën me shpejtësinë e dritës. Pse u përgjigjën kaq shpejt demokratët? Pse u mbushën foltoret? Kjo histori është 3 mujore. Se u mërzitën me Bashën. Ai mori vendime për të shkatërruar opozitën. Non grata e Berishës nuk fitoi legjitimitetin tek demokratët dhe as tek pjesa tjetër. Ai s’ka asnjë pushtet, ndërkohë që Rama ka 1000 të zeza dhe Berisha ka 8 vite që është larguar. Ky vendim nuk e fitoi legjitimitetin tek qytetarët. Ai duhet të ishte votëbesuar, kjo nuk u bë dhe ne thirrëm kuvendin. Demokratët nuk e kanë mbështetur Berishën vetëm se duan Berishën. Në stadium kanë qenë mbi 10 mijë demokratë sepse janë të zhgënjyer me Bashën dhe nuk shohin asnjë dritë shprese. Ata shohin tek Berisha një njeri të veprave”, tha Bumçi./ CNA.al
Politikë
I shpallur “non grata”/ Berisha: Të më kërkojnë ndjesë ose të paraqesin faktet
Ish kryeministri Sali Berisha ka deklaruar se shpallja “non grata” e tij është rast unik në botë pasi nuk gjen në listën e atyre që janë shpallur “non grata” një që është shpallur “non grata” 8 vite pasi është larguar nga lidershipi.
Në një intervistë për RTK 21 në Kosovë, Berisha tha se SHBA janë vendi më i admiruar nga Sali Berisha dhe se asgjë nuk mund ta shtyjë kunër tyre, por shpalljen e tij non grata e quan gabim.
Ndaj ish kryeministri është shprehur se ka dy rrugë: ose t’i kërkojnë falje për shpalljen non grata ose të paraqesin fakte për korruspionin për të cilin akuzohet.
“Shpallja e Sali Berishës non grata është rast unik në botë. Në gjithë listën e atyre që janë shpallur non grata nuk gjen asnjë që është shpallur non grata 8 vite pasi është larguar nga lidershipi i vendit. Duke mos pasur akuzë për korrupsion ndaj tij apo familjarëve të tij. Shpallet non grata pasi humbet zgjedhjet partia që ai mbështeti. Unë nuk kam lobuar për të ma hequr këtë. Kam zgjedhur një rrugë. Gjykatën dhe transparencën. Kur shumë miq më kanë sugjeruar të merrem.
Në atë kohë atë betejë e kam bërë veten me veten time. Edhe këtë betejë e bëj vetëm. Nuk po e përdor këtë. SHBA janë vendi më i admiruar nga Sali Berisha. SHBA janë vend i madh dhe vend i lirë. Ato kanë një meritë. Ata njohin gabimin. Ata korrigjojnë gabimet. Kjo është një nga faktorët që i mban ato institucione afër realitetit. Nuk ka asgjë të më shtyjë kundër SHBA. Por e konsideroj këtë gabim. Ka vetëm një rrugë. Të më kërkojnë ndjesë ose të paraqesin një fakt të vetëm të korrupsionit dhe pasurimit tim të paligjshëm. Sali Berisha në këtë rast do ishte i gatshëm të marrë çdo vendim kundër vetes së tij. SHBA janë vendi më i madh por nuk janë më të mëdhenj se e vërteta”, u shpreh Berisha./ CNA.al
