Connect with Us

SHBA përqendrohet tek vaksinimi/ Vazhdojnë të bien rastet me COVID-19

Bota

SHBA përqendrohet tek vaksinimi/ Vazhdojnë të bien rastet me COVID-19

Publikuar

-

Ekipi i Shtëpisë së Bardhë për Përgjigjen ndaj COVID-19 tha të premten se është i përqendruar tek përmbushja e objektivit të ri të presidentit për të vaksinuar plotësisht 160 milionë amerikanë deri më 4 korrik, ndërkohë që vazhdon të ulet numri i infeksioneve, shtrimeve në spital dhe vdekjeve.

Në konferencën për shtyp të këtij ekipi, Koordinatori i Shtëpisë së Bardhë për COVID-19, Jeff Zients tha se në fund të ditës së premte, 110 milion Amerikanë do të jenë vaksinuar plotësisht dhe 150 milion Amerikanë, ose 57%, do të kenë marrë të paktën një dozë.

Zoti Zients tha se për të ndihmuar në përmbushjen e synimit të presidentit, qeveria do të vërë në dispozicion vaksina pa pasur nevojë për takim në 20,000 farmaci në të gjithë vendin. Agjencia Federale e Menaxhimit të Emergjencave (FEMA) gjithashtu do të dërgojë vaksina nga qendrat me kapacitet të lartë vaksinimi në të gjithë vendin në objekte më të nëpër komunitetet ku ka më shumë nevojë. Edhe mjekët e familjes dhe pediatrët do të jenë në gjendje të administrojnë vaksina.

Drejtorja e Qendrave për Kontrollin dhe Parandalimin e Sëmundjeve (CDC) Rochelle Walensky tha se mesatarja ditore kombëtare për infeksionet vazhdoi të binte gjatë dy javëve të fundit, duke u ulur 13% në 45,817 në ditë. Shtrimet në spital ranë me 8% dhe numri i vdekjeve me gati 4% gjatë së njëjtës periudhë.

LEXO EDHE:  Amerika bën prova lufte/ Koreja e Veriut bëhet gati të përgjigjet

Dr. Walensky foli edhe për një studim të fundit për vdekjet e shkaktuara nga ndërprerjet që shkaktoi pandemia në sistemet e kujdesit shëndetësor dhe komunitete, si dhe vdekjet e lidhura drejtpërdrejt me COVID-19.

Duke pasur parasysh këto të dhëna, studimi sugjeron që numri i vdekjeve globale nga pandemia është rreth 6.9 milion – më shumë se dyfishi i numrit të raportuar prej afro 3.2 milion. Në SHBA, nëse llogariten sipas këtij studimi, vdekjet nga pandemia janë mbi 905,000, në krahasim me 580,000 që janë njoftuar.

Dr. Walensky tha që CDC-ja ka qenë prej kohësh e vetëdijshme se vdekjet nga pandemia nuk janë vetëm ato për shkak të virusit, por edhe ato të personave që nuk ishin në gjendje ose nuk dëshironin të merrnin kujdes mjekësor ose vdiqën nga sëmundje të tjera sepse pandemia e bënte të pamundur marrjen e shërbimeve të zakonshme të kujdesit shëndetësor.

Ajo tha se CDC-ja po i analizon me kujdes ato vdekje dhe do të vendosë nëse do t’i llogarisë ato si specifike për COVID-19 ose si vdekje që kanë ndodhur si pasojë e tij. Zonja Walensky tha se sido që të analizohen këto shifra, ato janë një arsye më shumë për t’u vaksinuar./VOA

Për të rejat më të fundit behuni pjesë e grupit tonë në facebook : City News Albania

Komentoni

Your email address will not be published. Required fields are marked *

Bota

Qasja ndryshe e Presidentit Biden ndaj udhëheqësit rus

Publikuar

-

Nga

Qasja ndryshe e Presidentit Biden ndaj udhëheqësit rus

Presidenti Joe Biden flet shpesh për atë që ai e sheh si thelbësore në zbatimin e një politike të jashtme efektive: ndërtimin e marrëdhënieve personale. Por ndryshe nga katër paraardhësit e tij më të fundit në Shtëpinë e Bardhë, të cilët bënë përpjekje për të ndërtuar një lloj marrëdhënieje me Vladimir Putinin, Presidenti Biden e ka bërë të qartë se krijimi i një raporti personal mund të ketë kufij kur bëhet fjalë për udhëheqësin rus.

Presidenti amerikan, i cili pritet të takohet me Presidentin rus ballë për ballë të mërkurën në Gjenevë, është i vetëdijshëm rreth aftësive të zotit Putin për të mbijetuar edhe pse vendi i tij nuk është më një fuqi ekonomike botërore.

Presidenti Biden ka përsëritur shpesh një episod nga takimi i tij i fundit me zotin Putin 10 vjet më parë kur ai ishte nënpresident dhe zoti Putin në detyrën e kryeministrit. Udhëheqësi rus ishte shkëputur nuk ishte president në atë kohë, pasi kushtetuta e vendit ndalonte një mandat të tretë radhazi, megjithatë ai ende shihej si udhëheqësi më i fuqishëm i Rusisë.

Zoti Biden i tha biografit Evan Osnos se gjatë takimit mes tyre në vitin 2011, zoti Putin i kishte treguar zyrën e tij luksoze në Moskë. Zoti Biden kujton se e kishte thumbuar zotin Putin, një ish-oficer i KGB-së, duke i thënë: “Është e mahnitshme se çfarë mund të arrijë të bëjë kapitalizmi“.

Zoti Biden tha se më pas ndërsa qëndronte shumë pranë zotit Putin, i kishte thënë: “Zoti Kryeministër po ju shoh në sy dhe nuk mendoj se ju keni shpirt. Zoti Biden thotë se zoti Putin kishte buzëqeshur dhe i ishte përgjigjur: “Ne e kuptojmë njëri-tjetrin”.

Nga ana e tij Presidenti Putin, në një intervistë për rrjetin televiziv NBC, të transmetuar të hënën, tha se nuk e mbante mend një bisedë të tillë. “Nuk e mbaj mend këtë bisedë mes nesh“, tha zoti Putin.

Komenti i zotit Biden ishte pjesërisht një shpotitje ndaj ish-Presidentit George W. Bush, i cili u përball me kritika pas takimit të tij të parë me udhëheqësin rus, kur tha se e “ka parë atë (Putinin) në sy” dhe “kishte qenë në gjendje t’i kuptonte shpirtin”.

Por duke rikujtuar këtë bisedë të disa dekada më parë me zotin Putin, Presidenti Biden gjithashtu është përpjekur të tregojë se ai nuk ka asnjë iluzion rreth asaj që përfaqëson udhëheqësi rus, ndryshe nga paraardhësit e tij.

Tashmë Presidenti Biden dhe ai rus Putin do të takohen sërish, në një moment kur marrëdhëniet mes Shteteve të Bashkuara dhe Rusisë duket sikur ndërlikohen çdo ditë. Presidenti Biden në mënyrë të përsëritur e ka kritikuar udhëheqësin rus dhe ka vendosur sanksione kundër subjekteve ruse dhe individëve të lidhur me të, mbi akuza për ndërhyrje në zgjedhjet e vitit 2020 dhe sulmin kibernetik ndaj agjencive federale.

Pavarësisht sanksioneve zoti Putin nuk është tutur. Javët e fundit hakera rusë me bazë në Rusi kanë zhvilluar sulmeve kibernetike ndaj një tubacioni kryesor të naftës në SHBA si dhe furnizuesit më të madh të mishit në botë. Zoti Putin ka hedhur poshtë dyshimet për përfshirje të Kremlinit në këto akte.

LEXO EDHE:  Protesta e opozitës/ Reagon ashpër Ambasada e SHBA

LEXO EDHE:  Shifrat e fundit/ Mbi 2.5 milion të infektuar nga Covid-19, ja sa kanë humbur jetën

Michael McFaul, ish-ambasador i SHBA-së në Rusi, i cili shoqëronte zotin Biden në takimin e vitit 2011 me zotin Putin, tha në një intervistë se zoti Biden mund të ketë një skepticizëm më të thellë dhe ndoshta një pikëpamje më të informuar mbi zotin Putin sesa çdo paraardhës i tij në Shtëpinë e Bardhë.

Njohuritë e zotit Biden mbi rajonin mund të jenë më të mira se të kujtdo që ka mbajtur këtë detyrë“, thotë zoti McFaul. “Biden ka shpenzuar kohë në Gjeorgji. Ai ka kaluar një periudhë të madhe kohe në Ukrainë. Kam udhëtuar me të në Moldavi dhe ai ka qëndruar për shumë kohë në pjesën lindore të vendeve aleate të NATO-s. Ai ka qenë në ato vende dhe ka dëgjuar nga afër lidhur me agresionin dhe kërcënimin rus. Kjo ka krijuar një përbërës unik të analizës së tij mbi zotin Putin, të cilin presidentët e tjerë nuk e kanë pasur“.

Zoti Biden ka thënë se si president, ai do të zbatonte një qasje ndryshe në marrëdhëniet e tij me zotin Putin krahasuar me ish-Presidentit Donald Trump, i cili tregoi një respekt të pazakontë ndaj udhëheqësit rus. Qasja do të ishte ndryshe edhe në raport me qëndrimin e tre presidentëve të tjerë të SHBA-së të cilët kanë mbajtur këtë detyrë ndërsa zoti Putin ishte në pushtet në Rusi.

Në muajin shkurt gjatë vizitës së tij të parë në Departamentin e Shtetit në detyrën e presidentit, zotit Biden u tha punonjësve të agjencisë se ditët e “nënshtrimit” ndaj zotit Putin kanë përfunduar, çka u pa hapur si një goditje ndaj zotit Trump. Më vonë gjatë një interviste për rrjetin televiziv ABC News, zoti Biden iu përgjigj pozitivisht pyetjes nëse mendonte se zoti Putin ishte “një vrasës”.

Prirja e zotit Trump për t’u përulur ndaj zotit Putin bëri që shumë në Uashington të ngrinin hapur dyshime se rusët mund të dispononin të dhëna problematike rreth manjatit të pasurive të patundshme. Si zoti Trump ashtu edhe zoti Putin i kanë hedhur publikisht poshtë spekulimet.

Në mënyrë të përsëritur ish-Presidenti Trump është përpjekur ta shuajë akuzën e fortë, nënvizuar nga komuniteti amerikan i zbulimit se Rusia ka ndërhyrë në zgjedhjet amerikane të vitit 2016. I pyetur në konferencën e tyre të përbashkët për shtyp në fund të takimit mes tyre në 2018 në Helsinki të Finlandës, së cilin besonte zbulimin amerikan apo zotin Putin, zoti Trump ngriti pikëpyetje ndaj gjetjeve të inteligjencës amerikane.

Shtëpia e Bardhë njoftoi se Presidenti Biden nuk do të mbajë një konferencë të përbashkët për shtyp me zotin Putin, por do të flasë për mediat më vete pas takimit të së mërkurës. Zyrtarët e administratës thonë se zoti Biden nuk dëshiron t’i japë fuqi zotin Putin. I pyetur të dielën rreth arsyeve se pse vite të tëra sanksionesh amerikane nuk e kanë ndryshuar sjelljen e zotit Putin, Presidentit Biden qeshi dhe u përgjigj: “Ai është Vladimir Putin“./ VOA

LEXO TE PLOTE

Bota

Britania e Madhe shtyn heqjen e plotë të kufizimeve

Publikuar

-

Nga

Britania e Madhe shtyn heqjen e plotë të kufizimeve

Britania e Madhe ka shtyrë heqjen përfundimtare të të gjitha kufizimeve kundër pandemisë deri më 19 korrik 2021.

Kryeministri britanik, Boris Johnson, tha se shtyrja po ndodh për shkak të një rritjeje të numrit të të infektuarve me variantin Delta të koronavirusit.

Planet e qeverisë britanike kanë qenë që me 21 qershor të rihapet plotësisht ekonomia e vendit.

Në Angli, shumica e rregullave aktuale – përfshirë kufizimet në numrin e njerëzve që mund të takohen në bare dhe restorante do të vazhdojnë të mbesin në fuqi, megjithëse kufizimet në numrin e mysafirëve të lejuar në dasma do të hiqen.

“Nës, pas dy javësh, kemi arritur në përfundimin se rreziku është zvogëluar, atëherë ekziston mundësia që të marrim vendim për një hapje të plotë”, tha Johnson.

“Në një periudhë të caktuar, ne do të duhet të mesohemi të jetojmë me virusin dhe ta menaxhojmë atë sa më mirë që të mundemi”, tha kryeministri.

LEXO EDHE:  Shifrat e fundit/ Mbi 2.5 milion të infektuar nga Covid-19, ja sa kanë humbur jetën

LEXO EDHE:  Britani, studim mbi efektivitetin e kombinimit të vaksinave kundër COVID-it

PE miraton vendimin për certifikatat COVID-19

Varianti Delta i koronavirusit të ri, që është më i transmetueshëm, u identifikua së pari në Indi. Rreth 96 për qind të rasteve në Mbretërinë e Bashkuar janë me këtë variant të virusit.

Rastet pozitive janër rritur për 50 për qind javën e kaluar.

Varianti Delta besohet të jetë rreth 60 për qind më i transmetueshëm se varianti Alpha i identifikuar për herë të parë në Britaninë e Madhe.

Sidoqoftë, hospitalizimet dhe numri i viktimave mbeten të ulëta, falë fushatës së vaksinimit të zhvilluar në Britaninë e Madhe.

Më shumë se 55 për qind e të rriturve në Mbretërinë e Bashkuar kanë marrë dy dozat e vaksinës./Rel

LEXO TE PLOTE

Bota

Pranimi i studentëve në Harvard/ Gjykata e Lartë kërkon mendimin e administratës Biden

Publikuar

-

Nga

Gjykata e Lartë e Shteteve të Bashkuara të hënën i kërkoi administratës së Presidentit Joe Biden të jepte pikëpamjet e saj mbi çështjen nëse anëtarët e saj duhet të shqyrtojnë një sfidë ndaj procesit të pranimit të studentëve në Universitetin e Harvardit.

Kjo çështje, nëse shqyrtohet nga gjykata, do t’i jepte shumicës konservatore të saj një shans për t’i dhënë fund politikës së veprimit afirmativ, e cila i jep përparësi rritjes së numrit të studentëve afrikano-amerikanë dhe hispanikë në universitetet amerikane.

Veprimi nga gjykata sinjalizon interesin e të paktën disa prej nëntë anëtarëve të saj për të shqyrtuar një apel të sjellë nga një grup i quajtur Studentët për Pranime të Drejta, i themeluar nga aktivisti kundër politikës për veprime afirmative për rritjen e numrit të studentëve të komuniteteve pakicë në universitete, Edward Blum, të vendimit të një gjykate më të ulët që mbështeti programin e Harvardit. Padia akuzon Harvardin për diskriminim të aplikantëve aziatiko-amerikanë në shkelje të një ligji historik të të drejtave civile të vitit 1964.

Gjykata e Lartë ka një shumicë konservatore 6-3.

Edward Blum tha në një deklaratë se grupi i tij “mbetet me shpresë se pavarësisht nga pikëpamjet e prokurorittë përgjithshëm (të administratës së Presidentit Biden), gjyqtarët do të marrin në shqyrtim çështjen tonë dhe do t’i japin fund programit që favorizon pakicat në konkurrencën për pranimet në kolegje”.

Harvard nuk pranoi të komentonte çështjen.

Përdorimi i veprimit afirmativ i ka rezistuar shqyrtimit në Gjykatën e Lartë për dekada, përfshirë rastin e një vendimi të vitit 2016 që përfshinte një student të bardhë të mbështetur nga zoti Blum, i cili sfidoi një politikë të ngjashme të Universitetit të Teksasit, megjithëse gjykatësit ngushtuan fushën e zbatimit të saj.

LEXO EDHE:  Britani, studim mbi efektivitetin e kombinimit të vaksinave kundër COVID-it

LEXO EDHE:  Pasojat e fushatës zgjedhore/ Brataj: Në 15 maj pritet të ketë rritje të rasteve me Covid-19

Gjykata e Parë e Apelit me bazë në Boston në nëntor vendosi që marrja në konsideratë e racës nga Harvardi nuk ishte “gjerësisht e palejueshme” dhe ishte “kuptimplotë” sepse parandalonte rënien e nivelit të larmisë racore në komunitetin e studentëve. Një gjykatës federal në vitin 2019 vendosi gjithashtu në favor të Universitetit të Harvardit pas një gjyqi tre-javor.

Harvardi, një nga universitetet më prestigjioze të botës, ka thënë se numri i studentëve afrikano-amerikanë dhe hispanikë do të ulej me gati gjysmën e shifrës aktuale nëse do të eliminohej programi i tij i veprimit afirmativ. Avokatët e Harvardit thanë se ajo e konsideron garën “vetëm në një mënyrë fleksibile dhe jo-mekanike” dhe nuk favorizon automatikisht konkurrenca të caktuara për të vendosur se cilët studentë do të pranojnë.

Grupi i aktivistit Edward Blum paraqiti një padi në vitin 2014, duke akuzuar Harvardin për shkeljen e Nenit të VI të Aktit për të Drejtat Civile të vitit 1964, i cili ndalon diskriminimin bazuar në racë, ngjyrë ose origjinë kombëtare të studentëve nga një program ose aktivitet që merr ndihmë financiare federale. Harvardi është një universitet privat me seli në Kembrixh të Masaçusetsit, që merr fonde federale.

Grupi Studentët për Pranimet e Drejta ka thënë se anëtarët e saj përfshijnë aplikantë Aziatiko-Amerikanë të refuzuar nga Harvardi. Identitetet e këtyre aziatiko-amerikanëve nuk janë publikuiar gjatë gjithë procesit gjyqësor. Zoti Blum ka thënë se të gjithë ata shënuan rezultate të larta në teste dhe morën pjesë në aktivitete jashtëshkollore në shkollat e tyre të mesme dhe se avokatët e Harvardit morën në pyetje shumë prej tyre gjatë procesit gjyqësor./ VOA

LEXO TE PLOTE