LEXO PA REKLAMA!

SHKARKO APP

"Shqipëria ka nevojë për ndryshim"/ Krah Rudinës edhe i vëllai

2 Prill 2021, 12:46, Politikë CNA
"Shqipëria ka nevojë për ndryshim"/ Krah Rudinës

Djali i Azem Hajdarit, Kiri Hajdari ka bërë me dije se i është bashkuar nismës së motrës së tij, Rudina Hajdari.

Në statusin e tij në rrjetet sociale ai shkruan se Shqipëria ka nevojë për një ndryshim rrënjësor dhe mbi të gjitha për një mentalitet të ri në hedhjen e votës.

Ai shprehet se zgjedhjet e 25 prillit janë një mundësi e madhe për shoqërinë shqiptare.

Më tej Hajdari thotë se janë bërë bashkë me Rudinën për një qëllim: ” Të kontribuojmë, të punojmë për të çuar përpara idealet dhe bindjet e Dhjetorit 90, Dhjetorit të Azemit, Dhjetorit te studentëve të lirisë dhe demokracisë që shembën diktaturën më të egër të Evropës”.

Deklarata e plotë e Kiri Hajdarit

Miq. Mbështetës, dashamirës të familjes sime

Duke ju uruar mbi të gjitha shëndet në këto kohë pandemie dhe mbarësi në familjet tuaja, më lejoni tju bëj me dije se këto kohë jam angazhuar në fushatën e Rudinës, si kandidate # Nisma Thurje Nr 7, në Qarkun e Elbasanit.

Kjo është një fushatë e veçantë, jo vetëm për kushtet ku zhvillohet, por mbi të gjitha për frymën politike dhe shoqërore. Shqiptarët kanë nevojë për një ndryshim rrënjësor dhe mbi të gjitha për një mentalitet të ri në hedhjen e votës. Vota është e shenjtë, e paçmueshme , dhe peshon me rëndësi, sa e tashmja dhe e ardhmja e çdo njeriu.

Kanë kaluar 30 vite tranzicion demokratik dhe Parlamenti, arena politike, hapësirat publike  kanë nevojë më shumë se kurrë për zëra qëndrime dhe ide të reja. Këto zgjedhje janë një mundësi e madhe për shoqërinë shqiptare.

Përtej të qënurit vëlla i Rudinës, familje e saj, bijtë e Azemit,  ne të dy ndihemi sot më shumë se kurrë bashkë në një thelb të vetëm, ndihemi miq, bashkëpunëtorë. Ne ndihemi sot, një zemër- një mendje, për një qëllim:

” Të kontribuojmë, të punojmë për të çuar përpara idealet dhe bindjet e Dhjetorit 90, Dhjetorit të Azemit, Dhjetorit te studentëve të lirisë dhe demokracisë që shembën diktaturën më të egër të Evropës”.

30 vite pas, ne jetojmë në një Shqipëri që është shumë mbrapa me atë cfarë brezi i prindërve tanë dhe i mijëra shqiptarëve të rinj të viteve 90, synuan që Atdheu të shndërrohej..pikërisht në një fole të paqtë dhe me prosperitet.

Pas 30 vitesh fitore të lirisë dhe vendosjes së pluralizmit, sot Shqipëria është shumë e varfër, me plot vuajtje halle, me qindra mijëra të rinj që janë larguar të dëshpëruar dhe plot mall në emigracion, me papunësi të lartë  dhe me shpresën që duket e fikur.

Cfarë po ndodh.. amanetet e Azemit, heronjve  të 2 Prillit, studentëve dhe të rinjve, atyre mijëra shqiptarëve të burgosur, pushkatuar e të persekutuar na këmbojnë në vesh..na tundin shpirtin për të çuar deri në fund kauzën e Shqipërisë si gjithë Europa, e Shqipërisë shtet i së drejtës dhe me institucione të forta.

Rinisë, të gjithëve ne, pamvarësisht bindjeve dhe moshës  na del shumëçka për të bërë. Nuk duhet të rrijmë duarkryq, indiferentë. Çdokush është  një zë shumë i fuqishëm në këtë rrugë që ka nisur për ndryshim rrënjësor. Varfëria dhe prapambetja është e patolerueshme më dhe shkulja e të keqes fillon me zgjedhjen e kandidatëve që duhet të përfaqësojnë me dinjitet dhe pa kompromis, shqiptarët.

Patriotizmi dhe dobia për të bërë dicka për këtë vend duhet të jetë vetë qëllimi.

Prej javësh me Rudinën, edhe si nip e mbesë Librazhdi, trokasim në shumë shtëpi e  fshatra të Qarkut të Elbasanit. Jo rastësisht kthimi në këto treva, lidhet  dhe me një fakt tjetër të jetës politike të Azemit, përfaqësimi si deputet i qarkut të Elbasanit në mandatin e tretë te Parlamentit te Shqiperise.

Rrënjët e origjinës nga këto treva nga ana e nënës sonë, familjes se saj  të dhembsur dhe me shumë mikpritje, na motivojnë fort  dhe na japin besim se gjërat do ti ndryshojmë bashkë.

Shoh kaq shum dashuri dhe mirësi në sytë e të moshuarve këtyre burrave dhe grave që me aq shumë dinjitet dhe sakrificë ushqejnë familjet, paguajnë arsimin dhe shkollat e fëmijve. Cdo ditë është një mësim dhe frymëzim i madh për mua dhe Rudinën të jetoj dhe të ndiej Shqipërinë e vërtet, atë të mundit dhe lodhjes së përditshme, shpirtin e madh të Atdheut tonë që mëshirohet tek familja.

E nisim dhe e mbyllim ditën me bisedat më të hapura, pa hipokrizi dhe komplimente, me mesazhe zemre e fjalë të thjeshta shpirti, sepse këta janë shqiptarët e thjeshtë, të stërmunduar nga premtimet e pambajtura të politikës dhe nga moszgjidhja e halleve.

Miq, rruga dhe porta e kauzës  sonë është e çelur. Mbështetja dhe përkrahja e gjithësecilit është shumë e rëndësishme. Jetët tona do ti jetojmë në Shqipëri, prandaj ndërtimi i së ardhmes duhet të drejtohet nga vetë ne./ CNA.al

Lajmet e fundit nga