Pas 16 sezonesh tek Real Madrid, mbrojtësi Serxhio Ramos me shumë mundësi do të largohet nga madrilenët këtë verë, teksa çështje për tu zgjidhur është dhe kontrata e 35 vjeçarit i cili deri tani nuk ka rinovuar ende.

Sipas mediave spanjolle, Ramos ka refuzuar rinovimin e kontratës me madrilenët dhe ka pasur dhe një debat të shkurtër me presidentin e klubit, Fiorentino Perez, i cili dyshohet se i është drejtuar spanjollit me fjalët ‘’Ne duhet të planifikojmë që sezonin e ardhëm të bëjmë pa ty’’.

Nuk mungojnë dhe ofertat e klubeve europiane për mbrojtësin spanjoll, ku ndër to dy klubet e mëdha PSG-ja me Liverpulin. Nuk dihet ende e ardhmja e tij, por një gjë është e sigurte se qendërmbrojtësi spanjoll nuk do të luajë për madrilenët sezonin tjetër.

Sulmuesi Alfred Mensah është njeriu gol i këtij sezoni për Skënderbeun, qoftë sa i përket kampionatit, ashtu edhe ndeshjeve në Kupën e Shqipërisë. Shtatlarti ganez po tregon një formë mjaft të mirë, teksa në sezonin e tij të dytë me fanellën e korçarëve po udhëheq sulmin me 6 gola në Superiore dhe 4 në kupë.

Mensah është një qendërsulmues tipik, i cili krahas golave, ka ndihmuar shumë skuadrën duke marrë disa penallti dhe dhënë asiste. Sa i përket Kupës, me 4 gola si Mensah janë këtë edicion edhe sulmuesit e Vllaznisë e Laçit, respektivisht Haris Dilaver dhe Kirian Nuabueze. Ndërsa në kuotën e 3 golave është një tjetër lojtar i Skënderbeut, Elvi Berisha, që shënoi në Durrës.

Pas qendërmbrojtësit Adolf Selmani, largimi i radhës nga Laçi është mesfushori i krahut, Klejdi Rapo. Në fakt, prej ditësh lojtari korçar nuk po stërvitet me ekipin, por nga ana e klubit nuk ka pasur ndonjë konfirmim zyrtar për prishjen e marrëveshjes.

Gjithsesi, “Panorama Sport” zbulon nga burime të sigurta në klub se Rapo nuk është më pjesë e Laçit. Mësohet se ai ka kërkuar letrat në klub dhe është larguar kësisoj para se të mbyllet ky sezon. Mesfushori erdhi si një përforcim që mund të shpërthente me kurbinasit në Superiore, pasi më parë kishte bërë mirë në Kategorinë e Parë me Devollin dhe Pogradecin.

26-vjeçari luajti vetëm 4 ndeshje këtë kampionat me fanellën bardhezi, nga të cilat dy herë si titullar në fitoren 1-0 kundër Teutës dhe barazimin 1-1 në javën e parë të kampionatit ndaj Bylisit. Ndërkohë, në ndeshjen e së dielës që kurbinasit kanë me ballshiotët, krahas largimeve të fundit dhe dënimit të Erhun Obanorit, trajneri Shpëtim Duro nuk do të ketë të gatshëm as mesfushorin Regi Lushkja, i cili mësohet se ka plotësuar numrin katër të kartonëve të verdhë.