Në ndeshjet e javës së 13 të Kategorisë Superiore, Partizani do të kërkojë të rikthehet te fitorja pas dy barazimeve radhazi, teksa në Elbasan do të presë Skënderbeun. Të kuqtë janë të përfshirë në garën e titullit dhe një tre pikësh edhe mund t’i katapultojë në vend të parë, megjithatë të besuarit e trajnerit Ilir Daja, edhe pse konsiderohen favoritë në letër pasi luajnë me të fundit e klasifikimit, duhet të bëjnë llogaritë me faktin se korçarët e Migen Memellit pikët i kanë të domosdoshne për të qëndruar në garën e mbijetesës.

Sakaq, edhe Teuta është aty e përfshirë në garën e titullit, vetëm një pikë larg Vllaznisë ndërsa sot ka një transfertë të sikletshme në Ballsh, ndaj Bylysit. Në fazën e parë në stadiumin Adush Muça kjo sfidë është mbyllur në barazim pa gola, e vendasit do të kërkojnë të përsëriten apo të bëjnë më mirë për të konsoliduar pozitat në klasifikim. Ndërkohë, Tirana do të luajë në transfertë ndaj Kastriotit.

Bardheblutë e trajnerit Orges Shehi janë duke e marrë formën më të mirë dhe vijnë pas dy fitoreve radhazi, ndaj do të kërkojnë të tretën për të qenë edhe më pranë Europës, ndërsa vetëm nëse do të kenë vazhdimësi mund të mendojnë edhe për më tepër. Nga ana tjetër, krutanët janë në një pozicion komod në klasifikim, megjithatë pikët janë të mirëpritura për të arritur sa më shpejt objektivin e tyre që është mbijetesa.

Ndeshjet:

13:00 Kastrioti-Tirana

13:00 Bylis-Teuta

16:00 Partizani-Skënderbeu