Gazetari Neritan Sejamini solli në vëmendjen e kryeministrit Rama se një nga taktikat më të përdorura të investimeve të qeverisë socialiste në tetë vite, Partneritet Publike Private po shiten nga qeveria si investime të pakushtueshme, në një kohë që mbartin një kosto mjaft të lartë për shtetin dhe qytetarët.

“Do ishte mrekulli të investonim kudo, të merrnim borxh kudo dhe gjithçka të ecte shumë mirë në ekonomi,” u shpreh Sejamini, ndërsa kryeministri Rama saktësoi se bëhet fjalë për investime private.

“Po privati nga i nxjerr paratë? Nuk i ka të garantuara? Do të falimentojë aeroporti nëse s’do ketë mjaftueshëm turistë në Vlorë? Ju po e bëni sikur çdo gjë është falas, ‘shteti nuk harxhon asgjë por bën çdo gjë’” – tha Sejamini.

“Investimet private janë private dhe shteti nuk paguan asgjë. Shteti merr përsipër një garanci të arsyeshme të trafikut…” replikoi kryeministri Rama, duke marrë shembull investimet private në shëndetësi në Turqi.

Sejamini tha se parimi i investimeve me paratë ‘e privatit’ nuk është një realitet i zakonshëm në Shqipëri, duke përmendur pagesat e qeverisë ndaj koncensionarëve të inceneratorëve.

Kryeministri Rama kundërshtoi ashpër argumentet e gazetarit, ndërsa shtoi se investimet në inceneratorë dhe shëndetësi i kishin ‘parapaguar’ qytetarëve shërbime të domosdoshme, edhe duke mbrojtur mjedisin.

“Kjo histori është sikur të marrësh para borxh, të blesh një Ferrari dhe të lavdërosh Ferrarin. Çështja është sa ka kushtuar dhe sa janë paguar,” tha Sejamini.

“Unë jam i lumtur që i kemi dhënë njerëzve “Ferrari” në këto shërbime në vend të karrocave që kishim. Për mua janë njerëzit, ajo që njerëzit kanë përfituar nga këto partneritete është e jashtëzakonshme në krahasim me tmerrin e të gjithë këtyre shërbimeve në kohë kur ne ndërhymë në to.

Mendoj që janë absolutisht me kosto të arsyeshme, nuk janë absolutisht borxhe që rëndojnë borxhin e përgjithshëm të Shqipërisë, janë detyrime që lahen vit pas viti…” kundërshtoi Rama.

Bënë shumë bujë përfshirja jashtë listës fituesve të Partisë Socialiste, emra si Mimi Kodheli, Pandeli Majko dhe Fatmir Xhafaj, emra këto, të cilësuar dhe si senatorë të PS.

Erion Veliaj, drejtuesi politik i Qarkut të Tiranës dhe hartuesi i kësaj liste, tha se lënia jashtë listës fituese e këtyre emrave, tregoi se PS në këto zgjedhje po vjen me një skuadër dhe strategji të re.

Veliaj u shpreh i bindur se 5 ose 6 emra të pozicionuar në listën jo fituese do të thyejnë herësin, e pjesë e tyre sipas tij, janë dhe tre senatorët e sipërpërmendur.

“Ne ndryshuam skuadër dhe strategji, thamë që Reforma në Drejtësi është diamanti i kurorës, edhe rindërtimi dhe vaksinimi do të mbahen mend gjatë. Ndryshuam skuadër edhe strategji. Kur prodhon të njëjtën gjë, merr po të njëjtin rezultat. Strategjia është e thjeshtë, Mimi Kodheli, Fatmir Xhafaj, Pandeli Majko, është një brand. Kjo tregon që në çdo rrethanë mbijetojnë.

Flasim për tre personalitete që kanë një logo, emër, që është dhe përtej logos së PS. Si njerëz me personalitet dhe i kanë dhënë vulën këtyre reformave. Kemi një sistem të fortë. Ne me partitë kemi garë proporcionale, ndërsa brenda vetes kemi mazhoritare. 5 a 6 veta do e thyejnë herësin, vë bast, këtu përfshij edhe senatorët.

Në sulm kimia ta që po mbajnë peshën e betejave, ministren e Shëndetësisë, ministrin e Rindërtimit, në mesfushë disa ministra, ndërsa në mbrojtje emrat e dalë nga platofrma “Deputei që duam”. Kemi dy botëkuptime të ndryshme”, tha Veliaj.

Kreu i Partisë Republikane Fatmir Mediu ka folur për përdorimin e database të E-Albania ku deklaroi se tashmë nga një server shtetëror që ruan të dhënat, janë kthyer në një server partiak. Ai shtoi se ligji i vitit 2008 përcakton të dhënat personale dhe është i bazuar në mbrojtjen e lirive.

“Nuk është thjesht çështje telefonatash, por baza e të dhënave. Ligji i vitit 2008 kur përcakton mbrojtjen e të dhënave personale është bazuar në mbrojtjen e lirive dhe të drejtave. Këto nga serveri shtetëror ka kaluar në një server partiak”, u shpreh Mediu.

Gjithashtu Mediu në emisionin “Log” tha se për këtë çështje ka një shkelje të ligjit me qëllim.

“Pra në këtë mënyrë të targeton për të blerë votën, i është marrë karta e identitetit atij që t’i nuk e blen dot me para”, shtoi ai./ CNA.al