Myrto Uzuni bën heroin në Hungari duke shpëtuar ekipin e tij, Ferencvarosh nga humbja ndaj Akademisë Pushkash. 25-vjeçari barazoi sfidën 8 minuta nga fundi i ndeshjes me një goditje elegante nga faulli në distancë 17 metra.

Ish-sulmuesi i Lokomotivës së Zagrebit goditi lehtësisht topin duke fluturuar mjaft bukur brenda në rrjetë. Pas kësaj jave, Ferencvaroshi kryeson kampionatin hungarez me 10 pikë diferencë nga vendi i dytë që mbahet prej Fehervarit.

Ferhan Hasani ka pranuar ofertën e Partizanit dhe ka nënshkruar për 18 muaj. Ky është lajmi i fundit që vjen nga Maqedonia e Veriut, konkretisht nga një media shqiptare, Inforsport.mk.

Fantazisti shqiptar një ditë më parë pati një takim me drejtorin e Partizanit, Olsi Ramën, dhe sa duket gjithçka ka shkuar si duhet. Gjithsesi duhet pritur që kjo lëvizje të konfirmohet nga klubi i kuq, apo nga vetë lojtari.

Hasani kishte oferta të ndryshme, mes tyre edhe nga Tirana e Shkëndija e Tetovës. Shifrat e ofruara për të kanë qenë të larta, mbi 10 mijë euro në muaj. Zyrtarizimi i tij me siguri do e bënte Hasanin lojtarin më të paguar në Superiore.

Skuadra e Varazhdinit, ku aktivizohet ish-mbrojtësi i Skënderbeut, Jorgo Pëllumbi mori sot një fitore të rëndësishme në kampionatin kroat kundër Rijekës me rezultatin 2-1.

Mbrojtësi 20-vjeçar ishte i pakalueshëm ndaj lojtarët kundërshtarë duke i dhënë siguri skuadrës në prapavijë. Pëllumbi dhe Agon Elezi u transferuan gjatë shtatorit të vitit të kaluar nga Skënderbeu te Varazhdini. Pavarësisht fillimit të vështirë, qendërmbrojtësi korçar arriti të përshtatet me ekipin duke zhvilluar deri tani 10 ndeshje.