LEXO PA REKLAMA!

SHKARKO APP

Sekretari Pompeo: Irani i dëshpëruar për rifillimin e negociatave

4 Dhjetor 2020, 22:17, Kosova & Bota CNA
Sekretari Pompeo: Irani i dëshpëruar për rifillimin e negociatave

Sekretari amerikan i Shtetit Mike Pompeo tha të premten se Irani po sugjeron në mënyrë të “dëshpëruar” se është i etur për të rifilluar negociatat për të arritur lehtësimin e sanksioneve.

Sekretari Pompeo, i cili nuk dha hollësi se si do t’i përgjigjeshin Shtetet e Bashkuara kthimit të Iranit në tryezën e bisedimeve, i bëri komentet virtualisht gjatë konferencës vjetore të Institutit Ndërkombëtar për Studime Strategjike (IISS) në Bahrein, që përqendrohet në sfidat e sigurisë rajonale.

SHBA-të kanë vendosur sanksione ekonomike të ashpra ndaj Iranit për t?i bërë presion që të negociojë kufizime më të rrepta të programit të tij bërthamor.

Sanksionet u vendosën pasi presidenti amerikan Donald Trump u tërhoq nga marrëveshja bërthamore në vitin 2018, duke shkaktuar përkeqësimin e marrëdhënieve midis dy palëve.

“Ne e dimë që fushata jonë po funksionon sepse tani iranianët po sinjalizojnë dëshpërimisht gatishmërinë e tyre për t’u kthyer në tryezën e bisedimeve për të lehtësuar sanksionet,” tha zoti Pompeo.

Irani nuk u përgjigj menjëherë deklaratave të zotit Pompeo.

Këshilli i Gardianëve, një organ kushtetues, miratoi një ligj në fillim të kësaj jave që do të ndalonte lejimin e inspektimeve të Kombeve të Bashkuara në objektet bërthamore të vendit nëse nuk lehtësohen sanksionet e naftës dhe bankave.

Ligji u jep vendeve evropiane, Rusisë dhe Kinës dy muaj kohë për të lehtësuar sanksionet mbi sektorin e saj të energjisë dhe për të rivendosur hyrjen e saj në sistemin bankar global.

Këshilli i Gardianëve e miratoi ligjin një javë pas vrasjes së shkencëtarit të lartë bërthamor të Iranit, Mohsen Fakhrizadeh./ VOA

Lajmet e fundit nga