Kryeministri italian, Giuseppe Conte thotë se vonesa në furnizimin me vaksina nga Pfizer dhe AstraZeneca është “e papranueshme”. Të dyja kompanitë kanë paralajmëruar se nuk do të jenë në gjendje të dorëzojnë vaksinat në BE siç kishin rënë dakord për shkak të çështjeve që lidhen me prodhimin.

Conte i akuzoi ato për shkelje serioze të kontratës, ndërsa një tjetër zyrtar i shëndetësisë në Itali, paralajmëroi se vendi do të rishohë programin e vaksinimit nëse do të vijojnë problemet me furnizimin. Vaksina e AstraZeneca, e zhvilluar nga Universiteti i Oxford-it, nuk e ka marrë ende aprovimin e BE, megjithatë rregullatori i ilaçeve i bllokut, pritet që t’i japë dritën jeshile në fund të këtij muaji.

Sipas asaj që shkruan BBC, një zyrtar i AstraZeneca tha të premten se “volumi fillestar do të jetë më i ulët nga sa ishte parashikuar “, pa dhënë detaje të mëtejshme.

Zyrtarët nuk e kanë konfirmuar ende publikisht sesa e ulët do të jetë sasia e vaksinave, por një zyrtar i BE, emri i të cilit nuk bëhet publik, i tha Reuters se sasia do të ulej në 31 milionë, një shkurtim prej 60 përqind, në tre mujorin e parë të këtij viti. Sipas po të njëjtit burim, kompania pritej që të dorëzonte rreth 80 milionë doza në 27 vendet e unionit brenda Marsit.

Javën e shkuar, Pfizer njoftoi se do të ngadalësonte procesin e shpërndarjes në Europë, në mënyrë që të bënte ndryshime në prodhim, që do të rrisnin kapacitetin. Bashkimi Europian ka porositur 600 milionë doza nga Pfizer.

Të shtunën, në një postim në rrjetet Kryeministri italian shkruajti se plani i vaksinimit në këtë vend ishte ndërtuar në bazë të kontratave të bëra lirshëm nga BE me kompanitë farmaceutike, por ai theksoi se vonesa të tilla “përfaqësojnë shkelje të rënda kontraktuale, që shkaktojnë dëme të mëdha në Itali dhe në shtete të tjera”. Conte u zotua se do të përdorte të gjitha mjetet ligjore që kishte në dispozicion.

Ndërsa Ministri italian i Shëndetësisë, Franco Locatelli, tha se këtë javë Pfizer kishte dërguar 29 përqind më pak vaksina nga sa ishte parashikuar dhe se pritej që dërgesat të jenë sipas asaj që ishte rënë dakord duke nisur nga 1 Shkurti./CNA.al

Maqedonia e Veriut ka regjistruar të shtunën 11 viktima nga koronavirusi i ri, që shkakton sëmundjen COVID-19, duke e çuar numrin e përgjithshëm të viktimave në 2,799.

Shumica e viktimave janë regjistruar në Shkup.

Viktima e reja janë, pesë në Shkup (35,65,74,75,81 vjeç) ndërsa nga një viktimë është regjistruar në qytetet e Shtipit (80), Velesit (82), Strumicës (78), Kavadarit (55) dhe Pehçevës (93).

Të dhënat e publikuara nga Ministria e Shëndetësisë njoftojnë edhe për 347 raste të reja të të infektuarve si dhe për 378 të shëruar, numri më i madh i të cilëve është në qytetin e Shkupit.

Raporti i Ministrisë i referohet testimit të 2,013 mostrave në laboratorët shtetërorë dhe privatë të këtij vendi.

Që nga paraqitja e rastit të parë të infektimit me koronavirus në Maqedoninë e Veriut, me COVID-19 janë diagnostikuar 90,471 persona.

Prej tyre 11,269 raste janë ende aktive ndërsa 76,423 persona janë shëruar.

Ulja e numrit të të sëmurëve me COVID-19 ka bërë që qeveria të vazhdojë me masat lehtësuese, përfshirë edhe punën e administratës, e cila nga 1 shkurti do t’i rikthehet normalitetit, përkatësisht të gjithë punonjësit e saj do të kthehen në vendet e punës.

“Duke qenë se numri i të infektuarve ka rënë, nga 1 shkurt 2021 të gjithë punonjësit e administratës do të kthehen në vendet e tyre të punës, me orar të plotë”, thuhet në njoftimin e qeverisë, e cila kërkon mendim nga Komisioni i Sëmundjeve Infektive nëse nga ky vendim mund të lirohen kategoritë e rrezikuara, të sëmurët kronikë dhe të moshuarit.

Në kuadër të masave lehtësuese, objektet e gastronomisë, restorantet e objektet tjera shërbyese kanë zgjatur orarin e punës deri në orën 21:00 ndërsa nga 28 janari ato do të mund të punojnë deri në orën 23:00.

Presidentja në detyrë e Kosovës, Vjosa Osmani komentoi të shtunën përmes një video-mesazhi në Facebook vendimin e Komisionit Qendror të Zgjedhjeve për të mos-certifikuar listat e kandidatëve për deputetë të disa prej partive kryesore të vendit.

Teksa u bëri thirrje qytetarëve për të ruajtur qetësinë, Osmani foli për “agjenda partiake” nga ana e anëtarëve të KQZ-së dhe u kërkoi këtyre të fundit “të mos abuzojnë” me Komisionin pasi në të kundërtën do të detyrohet të ndërmarrë masa.

“Në rast se përballemi me situata të tilla ku abuzohet me KQZ-në për të shtyrë përpara agjenda partiake nga ana e anëtarëve të KQZ-së do të detyrohem që të ndërmarr të gjitha masat për integritetin e KQZ-së dhe procesit zgjedhor,” – tha Osmani gjatë konferencës, ku në tërësi vëmendjen kryesore e pati për punën vjetore të prokurorëve.

Presidentja në detyrë e Kosovës e konsideroi të papranueshme vendimin e KQZ-së për të mos-certifikuar disa prej listave të kandidatëve duke shtuar se paralelisht ka pasur presione politike.

“Ajo çfarë kemi parë dje në KQZ ka qene paprecedentë, e pahijshme dhe e papranueshme për një institucion që duhet të bëj çmos që ta mbrojë integritetin. Në transmetime të drejtpërdrejte u bë presion marramendës nga Drejtorit të Zyrës për Certifikimin e Subjekte Politike si dhe u tolerua dhe u ushtrua presion ndaj drejtorit të kësaj zyre,”  – u shpreh Osmani duke kujtuar se anëtarët e KQZ-së janë betuar të kryejnë detyrat në mënyrë të paanshme.

KQZ vendosi të premten të mos miratonte listat zgjedhore të Vetëvendosjes, Nismës Socialdemokrate dhe Aleancës për Ardhmërinë e Kosovës kjo me argumentin se në to përfshiheshin persona të dënuar me vendim të prerë tre vitet e fundit./euronews