Milani kalon edhe pengesën Kaljari! Kuqezinjtë e Stefano Piolit, triumfuan në transfertë me rezultatin 0-2, falë dopietës së Zllatan Ibrahimoviç. Rikthim i frikshëm i sulmuesit suedez, i cili e nisi ndeshjen si titullar, duke shënuar 2 herë dhe duke i dhuruar 3 pikë të arta skuadrës së tij, që kryeson kampionatin e vetme me 43 pikë në 18 ndeshje.

Edhe pse pa shumë titullarë si Teo Hernandez, Çalhanoglu, Rebiç si dhe Benaser, 7 herë fituesit e Championsit arritën të bindnin. I vetmi “pishman” në këtë sfidë ishte dalja me karton të kuq e Selemekers.

I rikthyer nga dëmtimi, belgu u aktivizua në minutën e 66-të të sfidës, duke zënë vendin e Hauge. Futbollisti i Milanit qëndroi vetëm 8 minuta në fushë, teksa u ndëshkua 2 herë me kartonë të verdhë në minutat 68 dhe 74, duke lënë skuadrën e Piolit me 10 lojtarë për afro 20 minuta.

Pavarësisht inferioritetit numerik, kryesuesit e Serisë A, arritën ta menaxhonin mjaft mirë rezultatin, duke mos e vënë për asnjë moment në dyshim suksesin. Sfidën e radhës Milani do e luajë më datën 23 janar ndaj Atalantës në shtëpi. Ndërkohë për Kaljarin kjo ishte humbja e 5-të radhazi në kampionat.

Tashmë është zyrtare. Marko Xhampaolo nuk do të jetë më në stolin e Torinos. Lajmi është konfirmuar nga vetë klubi “granata” nëpërmjet një komunikate për shtyp të publikuar në faqet zyrtare në rrjetet sociale.

53-vjeçari është liruar nga detyra, për shkak të rezultateve negative. Shkarkimi erdhi pas barazimit 0-0 në shtëpi ndaj Specias. Edhe pse skuadra kundërshtare luajti me 10 lojtarë për shumë minuta, Torino nuk arriti të triumfonte.

Skuadra ku aktivizohet mbrojtësi i Kosovës, Vojvoda, gjatë këtij sezoni ka zhvilluar 18 ndeshje, ku ka grumbulluar vetëm 13 pikë dhe gjendet në zonën e rrezikshme, duke mbajtur pozitën e 18-të.

Edhe pse me 8 mungesa, Milani i Stefano Piolit, do të kërkojë të triumfojë në sfidën e mbrëmjes së sotme në transfertë ndaj Kaljarit, për të kryesuar i vetëm me diferencë +3 nga ndjekësit e Interit.

Kuqezinjtë do të kenë përballë skuadrën e Antonio Di Françeskos, që po përjeton një krizë të thellë rezultatesh me 4 humbje në 5 ndeshjet e fundit, duke u pozicionuar në vendin e 17-të.

Leao, Selemekers, Benaser, Teo Hernandez, Çalhanoglu, Rebiç, janë 6 mungesat më të rëndësishme për kryesuesit e kampionatit, duke shtuar këtu edhe Kruniç dhe Gabia, që janë zgjedhje dytësore. Ndërkohë lajm pozitiv është fakti se nga minuta e parë, do të luajë Zllatan Ibrahimoviç, i cili do të jetë një pikë referimi në sulm, për të udhëhequr skuadrën drejt suksesit.

KALJARI – MILAN

FORMACIONET ZYRTARE:

Cagliari (4-3-2-1): Cragno; Zappa, Ceppitelli, Godin, Lykogiannis; Marin, Nainggolan, Duncan; Pereiro, Joao Pedro; Simeone

Milan (4-2-3-1): Donnarumma; Calabria, Kjaer, Romagnoli, Dalot; Kessie, Tonali; Castillejo, Brahim Diaz, Hauge; Ibrahimovic