Kandidatja për deputete e Bindjes Demokratike në qarkun e Korçës, Denata Toçe, ka shigjetuar partitë e vjetra politike, teksa ka folur për fushatat e tyre elektorale, ku grumbullohen njerëz pa maska dhe distancë sociale.

Toçe tha për CNA.al se kjo është politikë babëzie dhe primitive, ndërsa vuri në dukje papërgjegjshmërinë e partive që synojnë të drejtojnë vendin.

“Nëse ka papërgjegjshmëri kaq të madhe për të mbrojtur dhe kujdesur për jetën e tjetrit, duke thirrur tubime masive në këto kohë dramatike pandemie, si mund të premtosh një të ardhme kujdesi ndaj qytetarëve prej politikanëve që na drejtojnë ose që mund të na drejtojnë, pjesë e këtyre partive të mëdha? Kjo është politikë babëzie dhe primitive. Kjo nuk është politika e një vendi që aspiron për të qenë kandidat në vendet europiane. E çfarë ka ndyshuar prej viteve 90? Më vjen turp prej tyre dhe keq për qytetarët që pa dashur antuziazmohen dhe kapen në valën e turmës, për të brohoritur për parti si këto duke menduar se hallet e tyre u zgjidhën.

Në psikologjinë e edukimit të fëmijës, një nga sukseset e prindërimit është të vendosësh rregulla dhe t’i mbash ato. Fëmija fiton shumë siguri dhe rritet në besim dhe në marrëdhënie. Kështu do të duhet të jetë edhe marrëdhënia e politikanëve me popullin se ata i kanë zgjedhur për t’i shërbyer atyre. T’i drejtojë në rregulla dhe disiplinë për mbrojtjen e tyre. Por kur këta i shkelin të parët, për më tepër duke cënuar edhe jetën e individit, çfarë sigurie dhe besimi do të ndërtojnë? Mendoni se është menduar sadopak për mbrotjen e qytetarëve në këto grumbullime? Ndjehen kaq të pamposhtur sa mendojnë se s’ka “murtajë” që i ndalon. Vetëm një i pamend nuk ka frikë nga Ligji dhe nga Zoti!”, u shpreh ajo.

Në një prononcim për CNA.al, Toçe dha edhe një mesazh të fortë për qytetarët e Korçës në prag të zgjedhjeve të 25 prillit.

“Të dalin të votojnë dhe të marrin guxim të zgjedhin alternativën që u ngjason atyre. U bë kohë tashmë që thuajse gjysma e tyre e kanë braktisur votën, sepse ndjehen të tradhëtuar dhe pa shpresë. 30 vjet bëhen shumë shpejt 50 vjet për të vazhduar të kemi të njëjtat figura politike në skenë. Është koha të decentralizojmë pushtetet. Është koha të dalin të votojnë kandidatin që meritojnë. Mos kenë frikë të zgjedhin alternativën. Unë do të jem me ta që prej fillimit të kandidimit e deri në fund të mandatit dhe uroj të jem e denjë për votëbesimin e tyre”, theksoi kandidatja për deputete./ CNA.al

Kandidate për deputete në listat Bindjes Demokratike/ Rrëfehet Denata Toçe: Nuk kemi si qëllim numra mandatesh

“LSI drejt shkrirjes”/ Denata Toçe: Një kasë e tërë politikanësh po del jashtë loje

Kryedemokrati Lulzim Basha u shpreh se shumë persona që janë anëtarë të Partisë Socialiste do të votojnë për Partinë Demokratike. Më tej, ai shprehet se për 8 vite qeveria e ka pllakosur rininë, arsimin dhe shëndetësinë.

“ Ky është  ndryshimi themelor. Unë po zhvilloj një fushatë normale që do të sjellë në qendër të vëmendjes shqiptarët. Problemet e këtyre 8 viteve po kërkojnë zgjidhje, 25 prilli do të jetë një ditë ku shqiptaret do të votojnë për hallet që kanë pllakosur, rininë, shëndetësinë, arsimin. A vazhdohet ,më si këto 8 vite, me tullumbace elektoralë para zgjedhjeve apo ka ardhur kohë për të ndryshuar”, u shpreh Basha.

Basha në një intervistë për Report Tv, ka komentuar mbi akuzat e Ramës që ai është një kukull në duart e Berishës dhe Metës.

 “Kjo është një pyetje që përgjigjen e ka marrë. Kryetari jam unë një dhe vetëm një. Ke qeverisur për 8 vite dhe ke pasur aq pushet si askush që nga Enver Hoxha dhe çfarë bëre këto 8 vite. Përgjigjja është pothuajse asgjë. Shqiptarët do të dinë të votojnë me votën për ndryshimin dhe do  të dinë të vlerësojnë edhe këtë kulturë të re politike, ku në fushate shkohet më program.”, u shpreh Basha/ CNA.al

Në një fushatë aspak të zakonshme, për shkak të pandemisë së covid 19 dhe ndalimit të grumbullimeve, kandidatët nga të gjitha subjektet politike, kanë gjetur mënyra të ndryshme për t’i kërkuar qytetarëve votën e 25 prillit.

Stafi i kandidates së PS Ermonela Felaj, e cila nga qarku i Beratit këtë herë kandidon në Tiranë, ka shpërndarë derë më derë disa fletëpalosje ku qytetarët kanë mundësi të njihen me formimin e saj, si dhe backgroundin politik.

Ajo fton qytetarët të votojnë numrin 12 për partinë dhe 13 për kandidatin, pozicion në të cilin është vendosur në listë.

Më fto për kafe është nisma e kandidatit të Partisë Demokratike për Tiranën, Agron Shehaj me të cilën synon  të takohet me qytetarët për të njohur nga afër problemet por edhe idetë e tyre.

Nga nisja e fushatës, telefonatat nga zyrat e subjekteve të ndryshme zgjedhore janë bërë të shpeshta. Telefonuesit, kërkojnë pak kohë për të njohur me kandidatin e tyre dhe për të marrë informacion nëse jeni mbështetës i tij .

Përdorimi i rrjeteve sociale është një tjetër mënyrë për të shpërndarë ofertën politike.

Eduart Shalsi, është i 18 në listën e kandidatëve të partisë socialiste për zgjedhjet e 25 prillit. Përmes një mesazhi në facebook ai kërkon mbështetjen për numrin 18,  madje në fund kërkon që qytetarët t`i lënë edhe numrin e telefonit.  

Të rinj të partisë demokratike, janë parë gjatë këtyre ditëve të trokasin në dyert e banesave të qytetarëve, duke u prezantuar nga vijnë dhe duke kërkuar informacion mbi numrin e votuesve, qendrën e votimit , sipas dëshirës edhe prirjen e votës.

Të tjerë kandidat po aplikojnë dërgimin e mesazheve në telefon.

I tillë është rasti i kandidatit Xhemal Qefalia, por edhe kandidatëve nga forca të tjera politike.

Përpara nisjes së fushatës elektorale, Zyra e Komisionerit për të Drejtën e Informimit dhe Mbrojtjen e të Dhënave Personale, përmes një njoftimi për shtyp, deklaroi se po ndjek me vëmendje veprimtaritë në kuadër të zgjedhjeve të përgjithshme parlamentare të 25 prillit 2021.

Në njoftim thuhet se zyra e Komisionerit, po e monitoron situatën në vijimësi dhe do të vlerësojë çdo rast të cenimit të të drejtave të subjekteve të të dhënave personale si dhe nxit të gjithë qytetarët të jenë të ndërgjegjësuar për ushtrimin në praktikë të të drejtave të tyre, që garantohen nga legjislacioni për mbrojtjen e të dhënave personale, duke denoncuar çdo rast të keqpërdorimit të tyre./euronews