Kosova & Rajoni
Ndërroi jetë nga koronavirusi/ I jepet lamtumira kreut të Kishës Ortodokse
Kreu i Kishës Ortodokse Serbe në Mal të Zi, mitropoliti Amfilohije, u varros të dielën në kriptën e Katedrales së Ringjalljes së Krishtit në Podgoricë.
Metropoliti Amfilohije ndërroi jetë të premten, më 30 Tetor, në Qendrën Klinike të Malit të Zi (KCCG) për shkak të ndërlikimeve të shkaktuara nga koronavirusi.
Në varrimin dhe liturgjinë disaorëshe morën pjesë patriarku i Kishës Ortodokse Serbe, Irinej, peshkopët e dioqezave të tjera të kishës, si dhe përfaqësues të kishave të tjera ortodokse.
Të pranishëm ishin gjithashtu përfaqësues të Kishës Katolike dhe Komunitetit fetar Islamik, zyrtarë shtetërorë, përfshirë kryetarin e Parlamentit të Malit të Zi, Aleksa Beqiq, kryeministrin Zdravko Krivokapiq, përfaqësuesit e partive politike të shumicës së re parlamentare.
Po ashtu në varrim mori pjesë edhe presidenti i Serbisë, Aleksandar Vuçiq dhe udhëheqësi i Republikës Srpska, Millorad Dodik.
Patriarku Irinej iu drejtua të mbledhurve, duke thënë se mitropoliti Amfilohije la për amanet “dashurinë për Kosovën dhe Metohinë dhe rinovimin e kishës në Lovqen”.
Klerikët dhe qytetarët e pranishëm të dielën nuk i respektuan masat e Trupit Kombëtar të Koordinimit për Sëmundjet Infektive (NKT), ku për shkak të pandemisë së koronavirusit ndalohet mbledhja e më shumë se 100 personave, si qytetarët obligohen të mbajnë maska dhe të respektojnë distancën fizike.
Por, masat kundër koronavirusit janë shkelur në mënyrë masive këto dy ditët e fundit.
Një numër shumë i vogël i priftërinjve dhe besimtarëve kishin maska, distanca fizike nuk respektohej, të pranishmit iu afruan arkivolit dhe puthën dorën e të ndjerit si dhe duke u kunguar me të njëjtën lugë.
Mitropoliti i Kishës Ortodokse Serbe Amfilohije ka qenë kreu i Metropolitatës në Malin e Zi në 30 vjetët e fundit.
Në Mal të Zi, vetëm gjatë ditës së shtunë u regjistruan 275 raste të reja me koronavirus dhe shtatë viktima.
Në total, që prej fillimit të pandemisë e deri më tani, Mali i Zi ka regjistruar 18,341 raste me koronavirus. Prej tyre, 301 pacientë kanë vdekur dhe 3,957 janë ende aktive./rel
Kosova & Rajoni
Covid-19 në Kosovë/ Dy viktima dhe 49 raste të reja me koronavirus
Në Kosovë u konfirmuan të premten dy viktima nga koronavirusi dhe 49 raste të reja të të infektuarve. Instituti Kombëtar i Shëndetësisë Publike të Kosovës tha se një rast i vdekjes u regjistrua në Mitrovicë dhe një në Vushtrri.
Sipas tij, rastet e reja pozitive rezultuan pas testimit të 1,835 mostrave. Shifra prej 49 i bie që dy për qind e të testuarve kanë dalë pozitivë.
IKSHPK-ja po ashtu njoftoi se në 24-orëshin paraprak, 310 pacientë janë shëruar nga koronavirusi. Me këto shifra, numri i përgjithshëm i të infektuarve në Kosovë arrin në 106,803, i viktimave në 2,220 dhe i të shëruarve në 99,097.
Raste aktive aktualisht janë 5,486. Në Kosovë është në zhvillim e sipër faza e dytë e vaksinimit, ku bëjnë pjesë personat e moshës 65-79 vjeç.
Në fazën e parë që ka nisur në fund të marsit, përparësi u është dhënë punonjësve shëndetësorë dhe personave mbi 80 vjeç.
Në fazën e tretë, ndërkaq është thënë se do të vaksinohen 50 për qind e qytetarëve. Kosova po zhvillon fushatën e imunizimit me vaksina të dhuruara nga Organizata Botërore e Shëndetësisë dhe Bashkimi Evropian.
Vendi nuk ka të nënshkruar asnjë kontratë për blerje vaksinash nga ndonjë kompani farmaceutike. REL
Kosova & Rajoni
Menaxhimi i vaksinimit/ Opozita kritikon Qeverinë
Partitë opozitare në Kosovë kritikuan Qeverinë e Kosovës për, siç thanë, dështimin për ta menaxhuar procesin e vaksinimit të qytetarëve kundër koronavirusit.
Reagimet e dy partive opozitare, Partisë Demokratike të Kosovës dhe Lidhjes Demokratike të Kosovës, vijnë pasi në mëngjesin e së premtes, Policia e Kosovës u desh të ndërhyjë për të vënë rend pranë sallës “1 Tetori” në Prishtinë, ku ishin mbledhur një numër i madh qytetarësh, për t’u vaksinuar kundër koronavirusit.
Në sallën “1 Tetori”, prej 12 majit, ka nisur vaksinimi i personave mbi 65 vjeç. Ushtruesi i detyrës së kryetarit të PDK-së, Enver Hoxhaj, tha në një konferencë për media se Qeveria e kryeministrit Albin Kurti duhet të mbajë përgjegjësi morale dhe penale, pasi, sipas tij, shteti ka bërë “krim ndaj qytetarëve”.
“Sot ishim dëshmitarë të skenave tronditëse, ku të moshuarit shtyheshin me njëri-tjetrin, pa fajin e tyre, për ta marrë një vaksinë, ndërsa Qeveria, kryeministri Kurti, ministri [i Shëndetësisë, Arben] Vitia i kishin braktisur ata dhe po i braktisin çdo ditë qytetarët në një betejë të vështirë me pandeminë”.
“Sot ishim dëshmitarë se mungoi shteti, mungoi kryeministri dhe mungoi ministri i Shëndetësisë. Kjo për ne, si PDK, është e papranueshme dhe është e patolerueshme”, tha Hoxhaj.
Deputeti i LDK-së, njëherësh ish-ministër i Shëndetësisë, Armend Zemaj, tha se pamjet e sotme pranë sallës “1 Tetori” janë pasojë e neglizhencës së ekzekutivit.
“Qeveria, e udhëhequr nga Albin Kurti, dhe ministri Vitia sot kanë rrezikuar qytetarët, duke u bërë shpërndarës të infeksionit, por edhe duke rrezikuar drejtpërdrejt jetën e tyre”, tha Zemaj.
Zemaj tha se Qeveria Kurti nuk po e respekton as planin e imunizimit kundër sëmundjes që e shkakton koronavirusi, COVID-19, dhe ftoi organet kompetente që të hetojnë këtë gjë.
Ministria e Shëndetësisë e Kosovës tha të premten se në sallën “1 Tetori” mund të vaksinohen vetëm qytetarët e Prishtinës.
Ministria tha se grumbullimi i një numri të madh të personave në qendrën e vaksinimit në Prishtinë është rezultat i shkuarjes së qytetarëve të komunave të tjera atje.
“Qytetarët e komunave të tjera të Republikës së Kosovës luten që t’u drejtohen qendrave të vaksinimit në komunat e tyre, me qëllim që të marrin informatat e duhura dhe të vaksinohen”, tha Ministria e Shëndetësisë.
Në Kosovë, imunizimi i qytetarëve kundër COVID-19 bëhet përmes një plani të ndarë në tri faza.
Në fazën e parë janë vaksinuar të moshuarit mbi 80 vjeç, punëtorët shëndetësorë dhe personat me sëmundje kronike.
Në fazën e dytë është paraparë që të vaksinohen personat 65-79 vjeç, mësuesit dhe forcat e sigurisë, të përfshira në menaxhimin e pandemisë.
Ndërkaq, në fazën e fundit është thënë se do të vaksinohen 50 për qind e popullatës.REL
Kosova & Rajoni
Situata në Kosovë/ Vazhdon procesi i vaksinimit kundër COVID-19
Ministria e Shëndetësisë në Kosovë ka bërë të ditur se të premten është duke vazhduar procesi i vaksinimit të qytetarëve kundër COVID-19, sëmundjes që shkakton koronavirusi.
Në njoftim është thënë se në Sallën 1 Tetori në Prishtinë do të mund të vaksinohen vetëm qytetarët e Prishtinës.
Aty është thënë edhe se grumbullimi i një numri të madh të personave në qendrën e vaksinimit në Prishtinë është rezultat i shkuarjes së qytetarëve të komunave tjera aty.
“Qytetarët e komunave të tjera të Republikës së Kosovës luten që t’u drejtohen qendrave të vaksinimit në komunat e tyre, me qëllim që të marrin informatat e duhura dhe të vaksinohen”, ka thënë Ministria e Shëndetësisë.
Në orët e hershme të së premtes, pranë Sallës 1 Tetori u krijuar radhë të gjata dhe tollovi të njerëzve. Më pas Policia e Kosovës ndërhyri për të vënë rend.
Më 12 maj, Kosova ka nisur fazën e dytë të vaksinimit të popullatës kundër koronavirusit, ku bëjnë pjesë personat e moshës 65-79 vjeç.
Vaksinimi në Kosovë ka nisur në fund të muajit mars, me 24,000 doza të vaksinës AstraZeneca, të siguruara nga programi Covax i Organizatës Botërore të Shëndetësisë.
Këtë javë, Kosova ka marrë edhe mbi 38,000 doza të tjera vaksinash nga Covax, ndërkohë mbi 7,000 doza të tjera i ka siguruar si donacion nga Bashkimi Evropian. REL
