Zhozef Minala zuri faqet e para të gazetave në vitin 2014, kur bëri debutimin e tij në Seria A me Lacion, prej dyshimeve që të gjithë kishin për moshën e tij. Në atë kohë, ai ishte 19 vjeç, por tifozët dhe ambienti sportiv, kishte dyshime duke parë paraqitjen e tij të jashtme. Gjithsesi, edhe pse flitej shumë për talentin e kamerunasit, ai kurrë nuk arriti që të kishte shpërthimin e pritur.

Tani në moshën 25-vjeçare, Zhozef Minala ka përfunduar huazimin e tij tek skuadra kineze e Kindong Huangai për tu rikthyer në dhjetor tek Lacio. Ai në një intervistë për mediat italiane ka deklaruar: “Më vjen keq se çfarë po ndodh tek ju, është një situatë që nuk pritej. Virusi ka ardhur nga Kina, por këtu i kanë bërë tampon të gjithë popullsisë.

Tani kanë filluar të mbushen dhe stadiumet në Kinë, ku jeta ka rinisur normalisht. Stadiumet mbushen me 25 mijë persona. Ndërsa në Itali kam frikë të rikthehem pasi njësoj si çdo shtet në botë kanë menduar përsëri karantinën si opsion mbylljeje dhe kriza ekonomike do të jetë e paprecedentë. Ndihem gjithashtu edhe i frikësuar pasi nuk e di saktësisht se çfarë do të gjej tek Lacio. Tani jeta ime në Kinë përfundoi, do të rikthehem tek Lacio. Do të vendos me drejtuesit bardhekaltër cila do të jetë zgjedhja e duhur.”, përfundon Minala.

Futbolli shqiptar, pas angazhimeve të ekipeve kombëtare, sot u rikthehet “halleve” të brendshme, ku do të luhen javët e treta të kategorive respektive. Kjo javë e Superiores është një provë e vërtetë force, thuajse për të gjitha skuadrat, peshë të cilën e shton më shumë edhe ngjeshja e kalendarit, ku në kuadrin e tetë ditëve do të luhen tri javë kampionat.

Kalendar “ferri”, por klubet e kanë marrë parasysh këtë gjë, gjersa pranuan të bojkotojnë për afro dy muaj fillimin e sezonit. Thuajse të pesë çiftet e kësaj jave të tretë shikohen si duele “të zjarrta” dhe përfundimi i takimeve mund të jetë edhe si busull orientimi për vazhdimësinë e skuadrave.

Tri ndeshjet që do të luhen në kuadrin e tetë ditëve pa dyshim do të jetë një “kampion” për të gjitha klubet e Superiores për të parë se çfarë gjendje kanë; çfarë programi stërvitor kanë kryer; cilësinë dhe gatishmërinë e kontingjentit që kanë krijuar në merkaton e verës, si dhe do të plotësohet edhe pjesa e parë e grafikut të rezultateve nga ku mund të nisin të nxirren edhe konkluzionet fillestare për çdo ekip.

Kjo periudhë tetë-ditore mund të shërbejë për të matur edhe pulsin e presidentëve, pasi që pas javës së dytë ka nisur operacioni i “ prerjes së kokave” të trajnerëve. Emanule Egbo është “kurbani” i parë i Superiores për këtë edicion, por nuk është çudi që gjatë këtyre tetë ditëve të kemi edhe ndonjë tjetër që do të ndjekë gjurmët e ish-trajnerit të Tiranës. Madje sinjalet janë dhënë që pas përfundimit të javës së dytë, ku kemi ultimatume presidentësh për skuadrat dhe stafet për të bërë kthesën e detyrueshme. Në klasiken ndaj Tiranës, Tirana vjen me risi, pasi do të debutojë trajneri i ri Nevil Dede, i cili do të kërkojë që në start të kthejë trajektoren e bardhebluve.

JAVA E 3-të E KATEGORISË SUPERIORE

BYLISI-SKËNDERBEU 13:45

KASTRIOTI-APOLONIA 13:45
(luhet në Kamzë)

TEUTA-KUKËSI 16:45

VLLAZNIA-TIRANA 16:45

PARTIZANI-LAÇI 16:45
(luhet në “Elbasan Arena”)

Shtohen rastet me “COVID-19” te Lushnja. Pas kapitenit Dionis Musaku dhe mbrojtësit Adriatik Basha, pozitiv del edhe mesfushori Aldo Qoshku. Lajmi i vetëm i mirë vjen për mesfushorin Fabian Blakçori, i cili ka rezultuar negativ dhe do të jetë gati për derbin që luhet sot në “Roza Haxhiu” me Tomorin.

Është vetë Ardi Prifti, mjeku fizioterapist që qartëson situatën para derbit për “Panorama Sport”: “Erdhi mbrëmë përgjigjja e tamponit për dy futbollistët e tjerë. Aldo Qoshku ka dalë pozitiv, ndërsa Fabian Blakçori ka rezultuar negativ”.

E megjithatë, frikë ka edhe për trajnerin. Ilir Gjyla nuk e ka drejtuar stërvitjen e djeshme dhe ka gjasë që të mos jetë sot në pankinë kundër Tomorit. Tekniku ka pasur probleme shëndetësore, por në vazhdim do të mësohet më shumë. Gjatë këtyre ditëve ai është ndihmuar prej trajnerit të U-19, Judmir Gazheli, i cili për gazetën qartëson se kanë kërkuar edhe shtyrjen e javës së 3-të.

“Ne kërkuam dhe tentuam për ta spostuar ndeshjen, duke parë që kemi shumë mungesa edhe nga traumat, siç janë dëmtimet e Luis da Silvës dhe Arbër Mones, por edhe nga problemi i pandemisë. Kjo me Tomorin është përballje e rëndësishme dhe që duhet vlerësuar në maksimum. Duke pasur parasysh që një pjesë e mirë e kontingjentit të kundërshtarëve janë ish-lojtarët tanë, do vigjilencë.

Gjithsesi, ne do të bëjmë maksimumin për të rrëmbyer pikët e plota. Unë kam punuar me skuadrën gjatë kësaj jave të dytë të përgatitjeve, në bashkëpunim me planin e profesor Ilir Gjylës. Shpresojmë që çunat të japin më të mirën, pavarësisht situatës ku ndodhemi”, përfundoi trajneri i U-19, i cili pritet të drejtojë ekipin e madh sot.