Edi Reja është gati të ulet në pankinën e Napolit deri në fundin e këtij sezoni. Lajmi vjen nga përtej Adriatikut ku prej disa ditësh po diskutohet e ardhmja e Rino Gatuzos në pankinën e ekipit.

Humbja në Superkupë ndaj Juventusit dhe më pas ajo në kampionat përballë Veronës, ka tronditur rëndë pankinën e ish-mesfushorit italian me presidentin De Laurentis që raportohet se ka nisur kërkimin për teknikun e të ardhmes. Plani i tij fillestar përfshinte Rafa Benitez, por tashmë ka dalë në skenë emri i Edi Rejas.

Trajneri i përfaqësueses shqiptare ka lidhje të ngushtë me De Laurentis, i cili pak vite më parë e punësoi që t’i ndërtonte komplet sistemin e akademisë, pasi i kishte lënë mbresa puna që kishte bërë me ekipin e parë. Të dy vazhdojnë të kenë kontakte të shpeshta dhe sipas mediave italiane, De Laurentis po e projekton Rejan si trajnerin që do të mbyllë sezonin nëse shkarkohet Gatuzo. Edhe tekniku raportohet se është i gatshëm ta bëjë një gjë të tillë, paralelisht me drejtimin e Shqipërisë, të cilën në muajin mars do ta udhëheqë në ndeshjet e para të kualifikueseve të Botërorit.

Sigurisht, nuk është një situatë që zgjidhet lehtë pasi ky variant nuk pëlqehet nga FSHF me të cilën Reja është nën kontratë, pasi do të shpërqendronte trajnerin në detyrën e tij. Kështu, ka vështirësi reale në konkretizimin e kësaj marrëveshje, por në Itali insistojnë se ajo vazhdon të jetë një hipotezë reale dhe po diskutohet mes aktorëve pjesëmarrës.

Marash Kumbulla bëri një kalim të madh në radhët e Romës verën e shkuar, pas shkëlqimit që pati me fanellën e Hellas Veronës. Verdhekuqtë e afruan me huazim me detyrim blerje, ndërsa në total operacioni i këtij transferimi do të kapte shifrën e 27 milionë eurove, aq sa edhe vlera që mbart tani në treg.

Një shumë kjo që e rendit mbrojtësin shqiptar në listën e 30 lojtarëve të huazuar më të shtrenjtë në Europë. Futbollisti i Kombëtares kuqezi renditet i 10-i, ndërsa bashkë me të përfshihen edhe emra të njohur si Alvaro Morata apo edhe Frederiko Kieza të Juventusit.

Lista me 10 lojtarët më të shtrenjtë të huazuar:

10. Marash Kumbulla- Në huazim nga Verona për 3 milionë euro (e drejtë blerje për 22 milionë euro plus 3.5 milionë të tjera bonus). Vlera aktuale në treg i shkon 27 milionë euro.

9. Lukas Torreira- I huazuar falas nga Arsenali te Atletiko Madrid. Vlera aktuale në treg është 28 milionë euro.

8. Timu Bakajoko- Në huazim për 2 milionë euro nga Çelsi drejt Napolit. Vlera aktuale në treg: 30 milionë euro.

7. Musa Dembele- Në huazim nga Lioni drejt Atletiko Madridit për 1.5 milionë. Vlera aktuale në treg: 30 milionë euro.

6. Moise Kin- Ne huazim falas nga Evertoni drejt PSG-së. Vlera aktuale në treg: 30 milionë euro.

5. Dani Sebajos- I huazuar falas nga Reali i Madridit te Arsenali. Vlera aktuale në treg: 32 milionë euro.

4. Mateo Guenduzi- Në huazim nga Arsenali drejt Hertës së Berlinit për 1 milionë. Vlera aktuale në treg është 32 milionë euro.

3. Sandro Tonali- Në huazim nga Breshia drejt Milanit për 10 milionë (e drejta e blerjes për 15 milionë euro plus 10 të tjera bonus). Vlera aktuale në treg: 32 milionë euro.

2. Federiko Kieza- Në huazim nga Fiorentina drejt Juventusit për 10 milionë (me detyrim blerje për 40 milionë plus 10 të tjera bonus). Vlera aktuale në treg: 48 milionë euro.

1. Alvaro Morata- Në huazim nga Atletiko Madridi te Juventusi për 10 milionë (e drejta e blerjes për 45 milionë euro ose rinovim huazimi për 10 milionë dhe blerje për 35 milionë euro). Vlera aktuale në treg është 50 milionë euro.

Nevil Dede ka qenë trajner i Tiranës në tri periudha të ndryshme, fillimisht në sezonin 2010-2011, më pas në vitin 2013 dhe për herë të fundit nga nëntor 2020 deri në janar 2021. Në dhjetor të vitit 2013 Dede u largua nga bardheblutë duke polemizuar me presidentin Refik Halili.

“Te Tirana ka një menaxhim mizerabël. Përgjegjësi për këtë ka sidomos stafi teknik sepse më duket e pabesueshme që pranoi të afroheshin lojtarë pa nivel. Kjo ishte shkatërrimtare për Tiranën”, pat thënë Halili për Deden 8 vite më parë kur ishte në rolin e donatorit. Ndërsa trajneri replikoi me Halilin, duke i dhënë një përgjigje ironike:

“Sa u përket emocioneve të momentit që ka shprehur Halili, më vjen vërtet keq për të… Unë s’kam të drejtë t’i them çfarë të flasë, pasi nuk është ‘i vogël’, ndaj nuk e mësoj dot. Megjithatë, do të mundohem t’i bëj ‘dhuratë’ një mikrofon të artë”.