Politikë
“Nuk është korrupsion, është grabitje me dhunë”/ Deklarata e fortë e Shehit: Duhen vënë prangat
Kreu i LZHK-së, Dashamir Shehi është shprehur sot se skandalet e qeverisë së kryeministrit Edi Rama janë të njëpasnjëshme.
I ftuar në A2 CNN, Dashamir Shehi tha se “Këtu skandalet janë mbivendosur, ka skandal pas skandali. Mjafton të shohim buxhetin e këtij viti, mënyra si është formuluar është një skandal me vete.”
Ndërsa duke u ndalur tek çështja e koncesionit të inceneratorëve, Dashamir Shehi theksoi se nuk kemi të bëjmë thjeshtë me korrupsion, por është vjedhje me dhunë e parave të taksapaguesve shqiptarë.
“Vetë fjala incinerator, është një fjalë e zhdukur në Europë. Jemi kthyer në fillim të viteve 90. Që në princip është gabim le pastaj mënyra e financimit.
Nuk është as korrupsion, është vjedhje, është grabitje me dhunë. Ai po thotë “unë do ti marr këto para, e do tia jap filanit, do t’ia jap të tre të njëjtit person”.
Nuk do të them më shumë detaje, unë nuk jam as prokuror, por në çdo vend të botës do i ishin vënë prangat”-tha Shehi.
Më tej, ai bëri edhe një apel të fortë për politikën, ku theksoi se duhet lënë drejtësia të bëjë punën e saj.
“SPAK, jo i mirë jo i keq, le ta lëmë të bëjë punën e vet, sapo ka filluar.
Politika bën keq, me të mirat e të këqiat e kësaj drejtësie, duhet ta lëmë të bëjë punën e vet. Edhe unë kam të gjitha dyshimet e mia për institucionet e drejtësisë, por deri kur të verifikohet nëse punojnë apo jo, duhet ta lëmë të bëjë punën e saj. Detyra jonë është që ta dorëzojmë këtë dosje para drejtësisë”-tha Dashamir Shehi./ CNA.al
Politikë
Belind Këlliçi uron mësuesit/ Shpalos disa pika të programit të PD për arsimin
Kreu i FRPD Belind Këlliçi ka uruar mësuesit dhe pedagogët me rastin e festës së 7 marsit.
Përmes një postimi në rrjetin social Facebook, ku ka ndarë edhe disa foto nga takimi me banorët në zonën e Kombinatit, Këlliçi shpalosi edhe pikat e programit të PD për arsimin, mes të cilave renditi rritjen e pagës për mësuesit dhe pedagogët dhe miratimin e një ligji të ri për arsimin.
“Duke i uruar përulësisht 7 marsin të gjithë mësuesve shqiptarë, më lejoni të ndaj me ju disa nga pikat e programit të PD për arsimin, të cilat ishin pjesë e diskutimit me mësues e pedagogë në Kombinat.
Rritje me 60% e pagave të mësuesve dhe as edhe një mësues nuk do të marrë më pak se 700 Euro në muaj rrogë.
Miratimi i një ligji të ri për Arsimin e Lartë.
Paga 900 euro në muaj për pedagogët dhe 1300 euro në muaj për profesorët.
Grante për Institucionet Publike të Arsimit të Lartë, për modernizimin e infrastrukturës fizike e pedagogjike.
Më shumë para për arsimin, arsimtarët dhe arsimdashësit, dhe JO për PPP korruptive!
Ndryshimi po vjen! Jemi bashkë e do t’ia dalim!”, shkruan Këlliçi./CNA.al
Politikë
Emrat/ CNA.al zbulon kandidatët e listës së LSI
Një ditë përpara dorëzimit të emrave zyrtarisht në KQZ, CNA.al ka zbuluar emrat e kandidatëve të LSI-së që do kryesojnë listat e qarqeve.
LSI e drejtuar nga Monika Kryemadhi do jetë në koalicion më vete, jo me PD-në e Bashës, një skemë kjo për të rritur numrin e mandateve, apo për të marrë sa më shumë vota majtas LSI, që mund të dëmtonin socialistët.
CNA.al sjell më poshtë kandidatët kryesorë, pra ata që LSI i quan të sigurt. Sipas votave të marra në tre palë zgjedhje me sistemin proporcional rajonal LSI ka pasur një rritje të vazhdueshme.
Në vitin 2009, LSI dhe koalicioni i saj morrën 84 mijë vota dhe 4 mandate deputetësh, të cilat i përdorën për tu bashkuar në qeveri me ish-kryeministrin Sali Berisha.
Në vitin 2013 në koalicion me socialistët, LSI morri 180 mijë vota dhe 16 mandate deputetësh.
Në vitin 2017 e vetme përballë aleancës Rama-Basha, LSI e drejtuar nga Ilir Meta për herë të tretë njohu rritje, duke shkuar 225 mijë vota dhe 19 mandate.
Zgjedhjet e 25 prillit janë të parat nën drejtimin e Monika Kryemadhit, e cila ka larguar nga partia shumë nga themeluesit, drejtuesit dhe ish-deputetët e saj. LSI vjen më emra të rinj në disa qarqe por shumica e emrave janë besnikët e mbetur të Kryemadhit dhe Metës.
Lista e LSI:
Tiranë
-Petrit Vasili
-Klajda Gjosha
-Floida Kërpaci
-Vojo Bregu
-Erisa Xhixho
Elbasan
-Monika Kryemadhi
-Edmond Haxhinasto
Durrës
-Elona Guri
-Bahri Shaqiri
Berat
-Ardit Çela
-Aurela Agalliu
Vlorë
-Luan Rama
Fier
-Monika Kryemadhi
-Kejdi Mehmetaj
Gjirokastër
-Vangjel Tavo
Korçë
-Endrit Braimllari
Shkodër
-Agron Çela
Lezhë
-Viktor Tushaj
Kukës, Dibër mbështeten listat e PD./CNA.al
Politikë
“Në Kuvend mos ketë më biznesmenë”/ Meta: Personat me integritet të jenë pjesë e listës
Presidenti Ilir Meta foli nga Korça për zgjedhjet e 25 prillit, teksa iu bëri thirrje krerëve të partive politike që të fusin në lista figura të pastra dhe me integritet.
I pyetur nga gazetarët lidhur me largimin e disa figurave të PS dhe zëvendësimin e tyre me inxhinieren Luljeta Bozo apo shefen e Infektivit, Najada Çomo, Meta u përgjigj se nuk ka asnjë koment, ndërsa bëri thirrje që qytetarët të përfaqësohen nga ësues e pedagog dhe jo nga biznesmenë në Kuvendin e ardhshëm.
“Nuk kam asnjë koment për asnjë parti vetëm kam një lutje, ju lutem sa më shumë pedagoge e pedagogë, sa më shumë të rinj të arsimuar, sa më shumë figura të pastra dhe ju lutem shumë sa më pak biznesmenë në Kuvendin e Shqipërisë.
Jo se kam diçka me biznesmenët, por është e rëndësishme të kemi në Kuvend njerëz me integritet. Nuk dua të hyj në emra, s’më intereson asnjë parti. Sa më shumë figura të ndritura dhe me integritet, në mënyrë që gjithë shoqëria të përfaqësohet siç e meriton në Kuvendin e ardhshëm të Shqipërisë. Janë zgjedhje shumë të rëndësishme për 100 vitet e ardhshme, sepse janë kryekushti për integrimin. Do ta kalojmë me hir a me pahir në kuptimin më të mirë të kësaj fjale”, tha Meta./CNA.al
