Connect with Us

Përse Spanja bëhet sërish vatër e COVID-19?

Bota

Përse Spanja bëhet sërish vatër e COVID-19?

Publikuar

-

Spanja bëhet këtë javë vendi i parë evropian që raporton një milion raste me koronavirus që nga fillimi i pandemisë.

Pavarësisht se imponoi njërin nga bllokimet më të rrepta në botë, ekspertët thonë se Spanja ka arritur këtë moment të zymtë historik sepse pandemia ka nxjerrë në pah një sërë të metash të thella në sistemin e saj shëndetësor dhe në modelin e qeverisjes.

Në fillim të javës, numri i rasteve të raportuara me COVID-19 arriti në 974,449 në të gjithë vendin dhe shifra pritet të kapë shifrën një milion deri në fundjavë.

Rreth gjashtë milionë spanjollë – rreth 13% e popullsisë prej 47 milionë banorësh – tani jetojnë nën një lloj kufizimi në përpjekje për të frenuar një valë të dytë.

Pavarësisht kësaj, ministri i shëndetësisë i Spanjës, Salvador Illa, tha se qeveria po sheh mundësinë e vendosjen së një ore policore në Madrid, rajoni me numrin më të lartë të rasteve në vend, për të frenuar numrin e infektimeve në rritje.

Ekspertët e shëndetit e vënë theksin te mënyra se si Spanja hoqi qysh në qershor, pra tepër herët, kufizimet e forta, nën presionin e qeverive të djathta rajonale, miqësore ndaj biznesit.

Faktorë të tjerë të përmendur ishin mungesa e mekanizmave të gjurmimit, mosmarrja e masave për të garantuar se popullsia migrante nuk do ta përhapte sëmundjen gjatë lëvizjes nga një provincë në tjetrën për mbledhjen e frutave. Ndërkohë, spanjollët, të cilët nga natyra janë njerëz mjaft të shoqërueshëm dhe të dhënë pas festave, menduan se kërcënimi kishte marrë fund kur gjendja e emergjencës përfundoi.

Megjithatë, analistët thonë se ka patur edhe një faktor tjetër i cili ka qenë thelbësor: Polarizimi i ashpër politik i Spanjës dhe modeli i saj i decentralizuar shtetëror.

Spanja është një nga shtetet më të decentralizuara në Evropë. Në qershor, kur u hoqën bllokimet, të 17 rajonet e saj morën përsipër administrimin e pandemisë, pasi shëndeti i popullatës normalisht është një nga përgjegjësitë e tyre.

Mirëpo shumë shpejt u ndezën tensionet midis dëshirës së kryeministrit socialist Pedro Sánchez për të kryesuar përpjekjet kundër pandemisë dhe disa rajoneve të drejtuara nga konservatorët, përparësia e të cilëve ishte mbajtja në këmbë e ekonomisë dhe shmangia e një bllokimi të dytë, pavarësisht rritjes së ritmeve të infeksionit.

Kjo arriti kulmin kur qeveria qendrore dhe qeveria rajonale e djathtë e Madridit për javë të tëra u grindën mbi mënyrën e frenimit të infeksioneve në kryeqytetin spanjoll.

Zoti Sánchez këmbëngulte që të ndiqeshin këshillat e ekspertëve të shëndetësisë, të cilët rekomanduan një bllokim të pjesshëm të të gjithë qytetit dhe tetë qyteteve periferike, ndërsa Isabel Díaz Ayuso, udhëheqësja rajonale e Madridit, e cila i përket partisë konservatore të Popullit, thoshte se masat do të shkatërronin ekonominë.

Ndërsa mosmarrëveshjet vazhdonin, ritmet e infektimeve në Madrid u rritën në mbi 730 raste për 100,000 në dy javët e mëparshme, të dytat më të larta në Evropë pas shtetit të vogël të Andorrës, sipas të dhënave të Organizatës Botërore të Shëndetësisë.

LEXO EDHE:  Shkon në 117 numri i viktimave nga Covid-19/ Humbin jetën 4 pacientë të tjerë

Përfundimisht, durimi i Kryeministrit Sanchez mori fund dhe qeveria vendosi një bllokim të pjesshëm. Zonja Ayuso e sfidoi këtë masë në Gjykatën Kushtetuese, ku dështoi dhe u detyrua të pranojë humbjen.

Që kur bllokimi hyri në fuqi më 9 tetor, infektimet në Madrid kanë rënë në 509 raste për 100,000, por gjithsesi përbëjnë një të tretën e të gjitha infektimeve në Spanjë.

Vendosja e orës policore në Madrid do të varet nga arritja e një marrëveshjeje me opozitën, por në mjedisin e përçarë politik të Spanjës, Partia Popullore dhe partia e së djathtës së skajshme Vox, që kontrollojnë 140 vende në parlament, ka të ngjarë ta kundërshtojë një masë të tillë.

“Kriza shëndetësore ka nxjerrë në pah dobësitë e sistemit tonë të decentralizuar,” i tha Zërit të Amerikës Lluis Orriols, profesor i politikës në Universitetin Carlos III në Madrid.

“Ka vende ku rajonet kanë një zë të fortë dhe janë më të decentralizuara. Problemi këtu është ai i përplasjes dhe se nuk ka mekanizma bashkëpunimi midis institucioneve.”

Manuel Fernández, pronar i restorantit “Braseria Los Olivos” në Malgrat de Mar, një qytet 56 kilometra në veri të Barcelonës, është gjobitur me 70,839 dollarë për refuzimin e respektimit të kufizimeve të vendosura nga autoritetet në Katalonjë, në të cilat baret dhe restorantet mund të shërbejnë vetëm për ta marrë ushqimin me vete.

Protesta e tij është një shembull i zhgënjimit në rritje ndaj një klase politike që nuk është e përqëndruar në zbatimin e masave të sakta për të luftuar COVID-19.

“Nuk janë restorantet që po e përhapin këtë sëmundje. Ne kemi respektuar të gjitha kufizimet në të kaluarën dhe do të falimentojmë. Unë nuk jam komunist, por dikush duhet të flasë për diçka: janë politikanët ata që duhet të zgjedhin përparësitë e tyre, jo të shtypin njerëzit normalë,” tha ai për Zërin e Amerikës.

Alex Arenas, ekspert për shëndetin publik në Universitetin “Rovira i Virgili” në Tarragona, pranë Barcelonës, i cili shërben si këshilltar për qeverinë rajonale katalonase, fajëson masat e Spanjës për heqjen e hershme të bllokimit, mungesën e sistemeve gjurmuese, presionin mbi sistemin e dobësuar shëndetësor dhe perceptimin e rremë se kriza u vu nën kontroll gjatë verës.

“Polarizimi politik ka qenë i tmerrshëm siç kemi parë, për shembull, midis qeverisë dhe Madridit. Këto beteja partiake përfaqësojnë një humbje të kohës së çmuar në drejtim të parashikimit dhe ndërmarrjes së veprimeve kundër pandemisë,” tha ai për VOA.

“Kjo rezulton në një mungesë besimi te publiku për masat që ne duhet të marrim”.

Për të rejat më të fundit behuni pjesë e grupit tonë në facebook : City News Albania

Komentoni

Your email address will not be published. Required fields are marked *

Bota

Sulme me bomba/ Së paku vriten 11 civilë afganë

Publikuar

-

Nga

Katër sulme të ndara me bomba në Afganistan vranë së paku 11 civilë dhe plagosën 13 të tjerë. Sulmet ndodhën vetëm disa orë pas hyrjes në fuqi të një armëpushimi treditor, të shpallur nga talibanët, me rastin e Festës së Bajramit.

Pesë civilë, përfshirë një grua dhe fëmijë, u vranë nga shpërthimi i një bombe në anë të rrugës, në qarkun Panxhuai të provincës Kandahar, tha zëdhënësi i policisë provinciale, Jamal Naser Barekzai. Ai shtoi se dy fëmijë u vranë dhe tre të rritur u plagosën në një shpërthim tjetër të bombës, që goditi një taksi, në rrethin Maivand të së njëjtës provincë.

Në provincën qendrore të Gaznit, dy civilë u vranë gjithashtu nga një bombë në anë të rrugës, thanë zyrtarët. Në provincën veriore të Kunduzit, shpërthimi i një bombe të ngjitur për një automjet civil vrau dy civilë dhe plagosi 10 të tjerë, tha Enhamuddin Rahmani, zëdhënës i shefit të policisë provinciale.
Përgjegjësinë për sulmet me bomba nuk e mori asnjë grup. Raporte për luftime të drejtpërdrejta midis militantëve talibanë dhe forcave qeveritare po ashtu nuk ka pasur.

LEXO EDHE:  46 raste të reja me koronavirus në Maqedoninë e Veriut/ Humbin jetën 2 të infektuar

LEXO EDHE:  Vetëdorëzohet ish kreu i ALUIZNI-t në Durrës/ Koronavirusi e shpëton nga burgu

Në fillim të këtij muaji, Shtetet e Bashkuara kanë nisur t’i tërheqin trupat e veta nga Afganistani, pas 20 vjetësh luftë. Deri më 11 shtator pritet të tërhiqen të gjitha trupat amerikane, ashtu si edhe forcat e tjera të NATO-s, të pranishme në Afganistan.
Kjo ka rritur shqetësimet e vëzhguesve nëse Qeveria afgane mund t’ia dalë e vetme në luftën kundër talibanëve dhe grupeve të tjera militante. REL

LEXO TE PLOTE

Bota

Për herë të parë/ Italia emëron grua në krye të shërbimeve sekrete

Publikuar

-

Nga

Elisabetta Belloni është bërë gruaja e parë që do të udhëheqë shërbimet sekrete të Italisë. Kryeministri italian, Mario Draghi, njoftoi se ish-ambasadorja Belloni është zgjedhur në krye të Departamentit të Sigurisë së Informacionit.

Departamenti mbikëqyr shërbimet e huaja dhe të brendshme të inteligjencës së vendit dhe i raporton drejtpërdrejt Qeverisë italiane.

E lindur në vitin 1958, Belloni ka qenë një nga vajzat e para që i është bashkuar Institutit prestigjioz – dhe dikur ekskluzivisht vetëm për meshkuj – Massimiliano Massimo në Romë, ku ka studiuar edhe kryeministri Draghi.

Pasi ka shërbyer si diplomate në Vjenë dhe Bratislavë, ajo ka drejtuar njësinë e krizës në Ministrinë e Jashtme italiane nga viti 2004 deri më 2008. Gjatë asaj kohe, ajo është marrë me shtetasit italianë të vrarë ose të plagosur jashtë vendit, përfshirë kidnapimet në Afganistan dhe Irak, dhe ka mbikëqyrur operacionet e shpëtimit të italianëve të prekur nga cunami shkatërrues në Oqeanin Indian, në vitin 2004.

LEXO EDHE:  46 raste të reja me koronavirus në Maqedoninë e Veriut/ Humbin jetën 2 të infektuar

LEXO EDHE:  Do mbyllemi sërish?/ Rakacolli paralajmëron: Jemi afër vijës së kuqe!

Emërimi i saj në pozitën e re u mirëprit nga politikanët italianë. “Një grua e guximshme”, tha kryetari i partisë Lega Nord, Matteo Salvini. REL

LEXO TE PLOTE

Bota

Colonial paguan hakerat/ Zhbllokohen operacionet e benzinës

Publikuar

-

Nga

Kompania e tubacionit të karburanteve Colonial, u ka paguar gati 5 milion dollarë hakerave nga Evropa Lindore për të zhbllokuar operacionet e saj, njofton Bloomberg News, që u referohej dy burimeve të cilat kishin dijeni për transaksionin.

Njoftimi vjen pas një sulmi kibernetik që paralizoi rrjetin më të madh të tubacioneve të karburantit në SHBA.

Sipas njoftimit, kompania e bëri pagesën me kriptomonedha të pagjurmueshme të premten, vetëm disa orë pas sulmit.

Kompania Colonial nuk ka komentuar.

Pasi morën pagesën, hakerat i përcollën kompanisë një instrument dekriptimi për të rikuperuar rrjetin kompjuterik të paralizuar. Megjithatë, kompania përdori programet e veta kompjuterike që e ndihmuan të rikuperonte sistemin, pasi instrumenti i dekriptimit ishte i ngadaltë, njofton Bloomberg News.

Pas një ndërprerjeje gjashtë ditore, tubacioni Colonial, më i rëndësishmi i këtij lloji në SHBA, rifilloi të enjten punën për transportimin e miliona litrave të parë të karburantit.

Administrata Biden në veprim

Administrata e presidentit Biden është hedhur në veprim pas sulmit kibernetik në tubacionin kryesor të benzinës për Bregun Lindor të Shteteve të Bashkuara duke kuptuar se situata paraqet një seri rreziqesh të mundshme politike dhe ekonomike.

Paralizimi i tubacionit ishte një situatë emergjente për një presidencë të re të cilës i është dashur gjithashtu të merret me pandeminë, recesionin, një fluks të fëmijëve të pashoqëruar në kufirin SHBA-Meksikë, tërheqjen e trupave nga Afganistani dhe tensionet në Lindjen e Mesme.

Administrata ka shpalosur gjatë kësaj kohe hapat që po ndërmerrte për të rikthyer furnizimin me benzinë në stacionet e karburantit në zonat e prekura. Ajo u vu në veprim pasi hakerat që kërkonin shpërblim të premten mbyllën tubacionin, i cili furnizon me rreth 45% të benzinës Bregun Lindor të Shteteve të Bashkuara. Mbyllja shkaktoi një krizë furnizimi dhe rritje të çmimeve.

Presidenti Joe Biden pritet të flasë mbi incidentin e tubacionit, një provë tjetër e ndërgjegjësimit të administratës së tij për rreziqet politike të lidhura me tubacionin dhe një përpjekje e Shtëpisë së Bardhë për ta shfrytëzuar situatën si një arsye më shumë për të miratuar paketën e tij të infrastrukturës.

Disa orë para se tubacioni Colonial të rifillonte punën të mërkurën, presidenti Biden kishte sinjalizuar se kishte arsye për optimizëm.

Presidenti nënshkroi një urdhër ekzekutiv për të përmirësuar sigurinë kibernetike. Ekipi i tij e përdori paralizimin e tubacionit si një argument për të miratuar paketën prej 2.3 trilionë dollarësh për infrastrukturën.

LEXO EDHE:  Infektimi i Veliajt me Covid/ Rama: Ishallah s’ma ka lënë mua stafetën

LEXO EDHE:  Trotuaret plot me mbetje spitalore/ Këlliçi nxjerr fotot: Burim i rrezikshëm infeksioni

Sekretari i Transportit Pete Buttigieg tha se sulmi kibernetik ishte një kujtesë se infrastruktura është çështje e sigurisë kombëtare dhe nevojiten investime për një fuqizim të saj.

“Kjo nuk është diçka ekstra, nuk është një luks, nuk është një opsion,” tha zoti Buttigieg. “Kjo duhet të jetë thelbësore për mënyrën se si ne sigurojmë infrastrukturën kritike.”

Departamenti i Sigurisë Kombëtare hoqi disa kufizime për tregtinë detare me kompani individuale, të pa identifikuara nga qeveria, për të lejuar transportimin e karburantit midis Bregut të Gjirit dhe porteve të Bregut Lindor, që është me rëndësi jetike.

Departamenti i Transportit po studion se sa anije mund të transportojnë lëndë djegëse fosile në Gjirin e Meksikës dhe Bregun Lindor. U hoqën gjithashtu kufizimet në orarin kur karburanti mund të transportohet nga kamionët çisternë. Agjencia për Mbrojtjen e Mjedisit bëri disa lëshime në rregulloret për përzierjet e gazit.

Firma teknologjike Gasbuddy.com thotë se 28% e stacioneve ishin pa karburant në Karolinën e Veriut. Në Xhorxhia, Karolinën e Jugut dhe Virxhinia, më shumë se 16% e pikave të karburantit ishin pa benzinë.

Kriza e papritur e furnizimit pas sulmit të javës së kaluar tregoi sfidat që mund të shfaqen për Shtëpinë e Bardhë e cila duhet t’u përgjigjet ndërkohë edhe ngjarjeve botërore.

Çmimet e benzinës dhe zgjedhjet

Ligjvënësit republikanë kritikuan administratën për anulimin e mëparshëm të planeve për të ndërtuar tubacionin e naftës Keystone XL nga Kanadaja. Presidenti Biden kishte anuluar lejen e tij për shkak të rreziqeve të derdhjeve dhe shqetësimeve të ndryshimit të klimës.

Çmimet më të larta të energjisë shpesh kanë pasoja politike, duke komplikuar fushatat e rizgjedhjes për presidentët në detyrë jashtë rajoneve prodhuese të naftës. Mungesa e karburantit në vitin 1979 dëmtoi përpjekjet presidenciale të Jimmy Carter për rizgjedhje dhe ndihmoi në fillimin e epokës së Reaganit.

Një studim i botuar vitin e kaluar nga Banka Botërore mori në shqyrtim 207 zgjedhje në 50 demokraci dhe zbuloi se një rritje e çmimit të naftës një vit para zgjedhjeve “në mënyrë sistematike ul shanset e personave në detyrë që të rizgjidhen”. Gjetjet ishin të vlefshme si për konservatorët ashtu edhe për liberalët, duke treguar një shkallë të lartë pragmatizmi nga votuesit. VOA

 

LEXO TE PLOTE