Connect with Us

Koha e Llukashenkos ka mbaruar/ Çfarë po kurdis në prapaskenë Putini

Blog

Koha e Llukashenkos ka mbaruar/ Çfarë po kurdis në prapaskenë Putini

Publikuar

-

/
Koha e Llukashenkos ka mbaruar/ Çfarë po kurdis në prapaskenë Putini

Nga Dmitry Trenin “The Moscow Times”

* Një model i asaj që po ndodh sot në Bjellorusi, ishte parashikuar muaj më parë. Përpara zgjedhjeve, presidenti Aleksandër Llukashenko eliminoi nga gara çdo sfidant serioz, duke lënë vetëm ata që mund t’i mundë pa shumë probleme.

Vetë procesi do të manipulohej; dhe shpallja e fitores së Llukashenkos do të shkaktonte protesta. Presidenti do t’i shtypte ato, duke përdorur forcën brutale të policisë; më pas do t’i cilësonte kritikat e ndërkombëtarëve si ndërhyrje në punët e brendshme të Bjellorusisë, dhe në fund do të mbetej sërish në pushtet.

Pra, një përsëritje e skenarit të zgjedhjeve të vitit 2010. Megjithatë, përkundër pritshmërive disa elementë kanë ndryshuar në mënyrë thelbësore panoramën. Një prej tyre ishte incidenti me kompaninë “Vagner”:një operacion i çuditshëm në të cilin BGB-ja bjelloruse arrestoi 33 mercenarë të dyshuar rus 11 ditë para zgjedhjeve, duke i akuzuar ata se kishin ardhur në Minsk për të organizuar trazira gjatë zgjedhjeve.

Dhjetra mijëra bjellorusë marshojnë për lirinë

Arrestimet i dhanë mundësinë Llukashenkos të shtojë retorikën e tij anti-ruse. Kremlini, i hutuar, e pa këtë qasje si një përpjekje të sundimtarit bjellorus për t’u afruar me Perëndimin, për ta detyruar këtë të fundit të pranonte rizgjedhjen e tij në detyrë, si një shpërblim ndaj qasjes së tij sovraniste anti-ruse.

Çfarëdolloj besimi që në Moskë kishte mbetur ende tek Llukashenko, u zhduk plotësisht.

Elementi i dytë ishte këmbëngulja e protestuesve në Minsk dhe në të gjithë Bjellorusinë, të cilët nuk u dorëzuan veëm pas disa ditë protesta, edhe pse në shumë raste u dhunuan egërsisht nga policia. Brutaliteti që Llukashenko kishte shpresuar që ashtu si më parë të shuante protestat, prodhoi rezultatin e kundërt, përhapjen e indinjatës dhe zemërimit popullor.

Dhe kjo gjë nga ana tjetër çoi në rezultatin e tretë të papritur:zgjerimin e protestave përtej turmës së zakonshme të urbanistëve të rinj të orientuar nga Evropa, për të përfshirë njerëz të moshuar, madje edhe ata që disa ditë më parë mund të kenë votuar në fakt për Llukashenkon.

Situata po zhvillohet me shpejtësi, dhe rrugës do të ketë më shumë surpriza. Por që tani mund të arrihet në disa përfundime paraprake. Regjimi i Llukashenkos, e ka humbur përfundimisht Bjellorusinë. Ai mund ta mbajë ende pushtetin: grupi qeverisës i përbërë nga burokratë të manipuluar vazhdimisht nga Llukashenko, nuk ka pësuar ndonjë përçarje të dukshme, dhe besnikëria e policisë dhe e shërbimeve të sigurisë është riafirmuar.

Skenari klasik i një revolucioni me ngjyra, nuk do të shihet të ndodhë as këtë herë në Bjellorusi. Sidoqoftë, presidenti e ka humbur mbështetjen e popullit. Me gjithë shifrën zyrtare të 80 për qind të votave pro Llukashenkos, nuk pati asnjë reagim popullor kundër protestuesve që dolën në rrugë.

Kjo do të thotë se Bjellorusia nuk e tha fjalën e saj të vërtetë ditën e zgjedhjeve, por në ditët që pasuan. Llukashenko, autokrati që pretendon se e ka ndërtuar i vetëm Bjellorusinë e sotme, mund të kishte hyrë në histori si babai i Bjellorusisë moderne, nëse do të kishte zgjedhur këtë vit të tërhiqej nga posti që mban prej kohësh.

Tani ai është drejt një dalje të pashmangshme dhe të pandershme nga politika. Kjo mund të zgjasë për disa javë apo më gjatë, por një fakt është kokëfortë:legjitimiteti i tij është zhdukur njëherë e përgjithmonë. Ky është rezultati më i rëndësishëm i zhvillimeve të fundit.

LEXO EDHE:  Pse BE gaboi me bllokimin e negociatave për Maqedoninë e Veriut dhe Shqipërinë

Dhe ky rezultat po sjell në skenë edhe aktorë të tjerë, përkrah popullit bjellorus. Është gati nisja e një akti të ri të dramës. Pozicioni strategjik që zë Bjellorusia në boshtin qendror midis Bashkimit Evropian dhe Rusisë, e bën jashtëzakonisht i rëndësishëm për Moskën dhe Perëndimin emrin e pasuesit të njeriut që e ka qeverisur këtë vend me grusht të hekurt për 26 vite me radhë.

Kremlinit nuk ka më asnjë simpati për Llukashenkon. Sidoqoftë, ai nuk mund të lejojë që Bjellorusia të ndjekë rrugën e Ukrainës, dhe të bëhet një forcë tjetër anti-ruse, e mbështetur nga NATO në kufijtë e saj, dhe shumë pranë Moskës. Dhe as nuk mund të lejojë një rebelim që do të çonte në një tjetër kasaphanë.

Atëherë, ç’duhet bërë? Ekzistojnë 4 skenarë kryesorë. Së pari, një ndërhyrje ushtarake ruse në Bjellorusi për të stabilizuar aleaten e saj, duhet të shmanget me çdo kusht, për shkak të pasojave katastrofike të pashmangshme.

Skenari i dytë, është të mos bëhet asgjë dhe të lejohet rënia e Llukashenkos, duke shpresuar se cilido që vjen pas tij do të marrë parasysh lidhjet e ngushta të Bjellorusisë me Rusinë, përfshirë ato në sferën ekonomike. Por kjo do të ishte shumë e rrezikshme për Moskën. Një trazirë mund të shndërrohet shpejt në gjakderdhje, duke e detyruar Moskën t’i drejtohet opsionit të parë.

Lukashenko: Nuk ka zgjedhje të reja derisa të më vrisni

Skenari i tretë është të shfrytëzohen marrëdhëniet e këqija të Lukashenkos me Perëndimin, për ta ri-afruar atë me Moskën. Edhe do të ishte kundër-produktive. Pasi do ta bënte Rusinë një bashkëpunëtore të regjimit aktual, dhe do të krijonte urrejtje për Rusinë në mesin e popullit bjellorus.

Skenari i katërt është të shihet përtej Llukashenkos, dhe që Kremlini të ndërhyjë për të menaxhuar një transferim të pushtetit në Minsk. Ky opsion do të nënkuptonte lehtësimin e tranzicionit politik të Bjellorusisë, përmes bindjes së Llukashenkos se në rrethanat aktuale, dalja në pension dhe mërgimi jashtë vendit, është për të alternativa më pak e keqe.

Kjo do të nënkuptonte njëkohësisht angazhimin e një spektri të gjerë personazhesh publikë në Bjellorusi, dhe ndihmën ndaj një udhëheqje të re kujdestare, që do të mbajë në kohën e duhur zgjedhjet e reja. Por gjithashtu edhe sqarimin e bjellorusëve mbi problemet në marrëdhëniet dypalëshe, përfshirë natyrën e bashkimit mes 2 vendeve.

Kjo do të përfshijë parametrat e ardhshëm të marrëdhënieve ekonomike dhe të sigurisë midis dy vendeve. Biseda do të duhet të jetë e sinqertë, dhe angazhimet reciproke të riafirmohen ose përshtaten sipas nevojës. Menaxhimi i krizës në Bjellorusi nga Moska, në një mënyrë që e mban atë vend një fqinj të mirë dhe partner të besueshëm për Rusinë, mund të tingëllojë shumë modest në krahasim me vizionin e qëndrueshëm të një bashkimi shtetëror.

Por është më mirë të hiqet dorë nga iluzionet, dhe të kursehen jetë njerëzore dhe para, sesa të lejohet një vend fqinj të shndërrohet në një armik të paepur. Shembulli i Ukrainës, nuk duhet të përsëritet./ Përshtatur nga CNA.al

Për të rejat më të fundit behuni pjesë e grupit tonë në facebook : City News Albania

Komentoni

Your email address will not be published. Required fields are marked *

Blog

Deutschland, Alemania/ Pse Gjermania ka kaq shumë emra?

Publikuar

-

Nga

cna lajme blog

Të gjitha vendet kanë zakonisht emra shumë të ngjashëm në gjuhët e gjithë botës. Për shembull Franca. Në frëngjisht quhet “France”, në spanjisht “Francia”, në gjuhën çeke “Francie”, në suedisht “Frankrike”. Pra një listë e gjatë emrash, që sigurisht bazohet mbi
një temë të përbashkët.
Në fakt gjermanisht, Franca quhet “Frankreich” që do të thotë “Perandoria e Frankëve”. Shumica e vendeve thirren me shumë emra. Por tani shihni se çfarë ndodh me Gjermaninë. Ajo quhet “Deutschland” në gjermanisht, “Alemania” në spanjisht, “Niemcy” në polonisht dhe “Germania” në italisht. Pse kaq shumë emra të ndryshëm? Duke parë shembullin e Francës, shumëkush mund të pyesë veten se çfarë fshihet pas gjithë atyre emrave.

Populli gjermanik

“Germania” ishte në fakt ishte emri që i vunë romakët territorit në lindje të lumit Rin, dhe në veri të lumit Donau. Rreth vitit 50 Pas Krishtit Gaius Julius Çezari, e pushtoi territorin në anën lindore të Rinit, dhe ishte ai që i emërtoi si gjermanikë njerëzit, territorin e të cilëve ende nuk e kishte pushtuar.
Por gjermanët nuk kanë qenë kurrë një popull i vetëm, dhe nuk e kanë parë asnjëherë veten si të tillë. Në fakt, ai është vetëm një emërtim i huaj i vendosur nga pushtuesi. Rreth vitit 5 Pas Krishtit Romakët pushtuan territoret deri në lumin Elba, i cili ndodhet në atë që ata e quajtën “Germania”.

Teutonët

Teutonët ishin një fis gjermanik. Siç e përmendëm më lart, popujt gjermanikë nuk e panë kurrë veten si një të vetëm. Kjo ishte thjesht një etiketë që romakët vunë mbi fiset e mbetura. Dhe një nga ato fise quhej Teutonë. Shumëkush mendon sot se ishte pikërisht ky fis që i dha Gjermanisë emrin gjerman “Deutschland”.
Por nuk është kështu. Ky fis specifik jetonte në veri, afër vendit ku ndodhet sot Danimarka. Prandaj nuk ka shumë kuptim që Gjermania të merrte emrin e tyre, nëse ata nuk do të jetonin në Gjermani. Por ndoshta është ende e njëjta gjë, që u dha emrin të dyve.

Gjuha gjermane

Ndërsa romakët e quanin atë fis si populli gjermanik, dhe po kështu u referoheshin të gjithëve fiseve të tjera, vetë gjermanët i referoheshin ndonjëherë vetes si “diu-tisc”, që në gjermanishten e vjetër do të thotë “i përkasin popullit”.
Ata e përdorën këtë emër jo sepse ishin një fis, por me të vetmin qëllim për t’u dalluar nga fiset që ishin nën sundimin romak, dhe që adoptuan gjuhën e tyre latine. Duke përdorur atë fjalë ata u bashkuan kundër një armiku të përbashkët. Pra, kushdo që fliste gjuhën e tij ishte “diu-tisc”, dhe kushdo që fliste latinisht ishte armik. Dhe me sa duket nga këtu buron edhe fjala gjermane për “deutsch” për “gjerman”.

LEXO EDHE:  Legjenda e Marshimit të Gjatë të Mao Ce Dunit, ja cila ishte e vërteta

LEXO EDHE:  Pse dashurojmë?/ Origjina dhe evolucioni i ndjenjës kryesore në këtë botë



Niemcy

Edhe në këtë rast gjuha ka luajtur një rol të madh. Në zonën e Polonisë së sotme jetonin popujt sllavë, dhe në gjuhën sllave “niemcy” do të thotë memec. Sepse njerëzit që flisnin një gjuhë tjetër, nuk ishin të kuptueshëm për ta. Pra për ta, gjermanët ata ishin “memecë”, sepse nuk mund të komunikonin dot me sllavët.

Alemanët

Alemanët ishin njerëz që jetonin në atë që sot do të ishte Jugu i Gjermanisë dhe një pjesë e Zvicrës. Kultura e popullit aleman ka mbijetuar deri në ditët tona. Për shembull, banorët në jug të Gjermanisë, festojnë ende Fastnacht Sëabio-Alemannic, që është një lloj
karnavali.
Njerëzit vishen me kostume shumëngjyrëshe të qepura me kujdes, dhe mbajnë në fytyrë maska përgjithësisht të frikshme, dhe ecin në paradë nëpër fshat për të trembur dimrin. Këta njerëz dukej se ishin ata që frëngjisht-folësit dhe spanjisht-folësit u dhanë emrin “Alemania”. Alemanët ishin ndoshta ata që takuan të parët kur kalonin kufirin.

Përfundim

Gjermania mori emrat e saj nga fiset e saj të shumta, nga pushtuesit, si dhe nga gjuha e vështirë por shumë e bukur gjermane. Ata nuk e panë kurrë veten si të tillë, përveç ndoshta një periudhe të shkurtër, kur e panë të nevojshme të bashkoheshin kundër një armiku të përbashkët.

Përkthyer dhe përshtatur nga CNA.al

LEXO TE PLOTE

Blog

Historitë më të çuditshme dhe misterioze të mbijetesës

Publikuar

-

Nga

(Pjesa e dytë)

Trupi i njeriut është një gjë e çuditshme dhe e mrekullueshme. Ndonjëherë ne dukemi më

të brishtë në krahasim me të gjitha krijesat e tjera në botë. Por nuk jemi të projektuar për të jetuar në botën e egër dhe të vegjlit tanë nuk mund të kujdesen për veten e tyre për vite të tëra, në krahasim me disa kafshë që mund të ngrihen në këmbë dhe vrapojnë brenda disa orëve nga lindja. Por pavarësisht brishtësisë sonë të dukshme, ka raste kur njerëzit mund të mbijetojnë në mënyra shumë të çuditshme, duke sfiduar të gjithë probabilitet e mundshme …

Adrian De Viart

Me vetëm një sy dhe një dorë, De Viart mori pjesë në Luftën Boere, Luftën e Parë Botërore dhe Luftën e Dytë Botërore. Ai u plagos në fytyrë, në kokë, në ije, në këmbë, në kyçin e këmbës dhe në vesh. Dhe i mbijetoi të gjithave plagëve.

Vetëm gjatë Luftës së Parë Botërore, De Viart u plagos rëndë 8 herë. Kjo ndodhi pas pjesëmarrjes së tij në Luftën Boere, kur u qëllua në bark dhe ije. Edhe pse kishte vetëm një dorë ai mbante granata me vete, dhe përdorte dhëmbët për t’u hequr siguresën.

Gjatë Luftës së Dytë Botërore ai u plagos nga një avion luftarak që fluturonte mbi Detin Mesdhe. Ai arriti të dilte me not deri në breg ku u kap nga italianët. Në atë kohë ishte në të 60-at e tij, e megjithatë ia doli të arratisej nga kampi i të burgosurve pavarësisht se ishte me një dorë dhe kishte vetëm një sy. Pas luftës, shërbeu si përfaqësues personal i Uinston Çërçillit në Kinë dhe vdiq në moshën 83-vjeçare.

Aleksandër Sellkirk

Historia e Robinson Kruzo është përralla fantastike e një njeriu të humbur në një ishull të largët. Por pak njerëz e dinë se ajo bazohet mbi një histori të vërtetë, ajo e Aleksandër Sellkirk. Marinari skocez ishte një tip gjaknxehtë, ndaj ai u përlesh me kapitenin e tij në vitin 1704, i cili e dëboi të riun nga anija duke e lënë në një ishull aty pranë.

Në ishull Sellkirk ushqehej me mishin dhe qumështin e dhive të egra, rrepa dhe bimë të tjera. Natën kur flinte e sulmonin qindra minj, por ai arriti të zbusë disa mace të egra, duke e shpëtuar veten nga ai problem. Duke iu përshtatur jetës si një i humbur, Sellkirk ndërtoi dy kasolle, një për gatim dhe një tjetër për të fjetur.

Marinari në 2 raste gati u kap nga marinarët spanjollë, të cilët me siguri do ta kishin vrarë. Por ai arriti të fshihej në një pemë. Ai u shpëtua vetëm në vitin 1709, 4 vjet pasi ishte braktisur në atë ishull.

Familja Robertson

Në vitin 1971, familja Robertson, që përbëhej nga bashkëshortët Dugal dhe Lin dhe3 fëmijët e tyre Dagllas, Sendi dhe Neill, së bashku me një mikun e familjes të quajtur Robin, planifikuan të lundronin nëpër botë. Por 200 milje larg nga ishujt Galapagos një grup balenash vrasëse ua përmbysi varkën.

Familja u strehua në një gomone. Ata kishin ushqim të mjaftueshëm për 10 ditë, që përbëhej nga një qese me qepë, një tenxhere me biskota, 10 portokalle, 6 limonë dhe gjysmë kilogram karamele. Ndërkohë uji ishte plot me peshkaqenë.

LEXO EDHE:  Përhapja aktuale e vaksinave, tregon se kombësia dikton ende jetët tona

LEXO EDHE:  Dhjetë shpikjet më të mira që e ndryshuan botën



Familja mbijetoi për 38 ditë në det, pjesërisht për shkak të optimizmit të Lin Robertson. Një infermiere në profesion, Lin e dinte se pirja e ujit të detit ishte një dënim me vdekje për të gjithë. Ndaj familja u përpoq të qëndronte gjallë duke pirë gjakun e breshkave të detit. Por kjo nuk mjaftonte.

Ndaj Lin përdori disa shkallë të vogla, dhe krijoi disa tuba të improvizuar në formën e një klizme. Uji në fund të gomones, i cili ishte një përzierje e ujit të shiut, gjakut dhe zorrëve të breshkave, kishte të ngjarë të vriste cilindo që përpiqej ta pinte.

Por nëse e merr me klizmë, mund ta thithësh atë ujë pa tretur asnjë nga elementët e rrezikshëm. Dhe kështu vepruan. Kur një anije peshkimi japoneze i shpëtoi, asnjë prej tyre nuk kishte urinuar prej 20 ditësh, dhe gjuhët e tyre ishin aq të fryra saqë nuk mund të flisnin dot.

Pema e Jetës

Por mbijetesa në disa raste të pabesueshme nuk kufizohet vetëm tek njerëzit. I tillë është rasti i Pemës së Jetës në Bahrein. Kjo pemë mendohet të jetë mbjellë në vitin 1582 dhe ndodhet në majë të një kodre prej rëre në pikën më të lartë të Bahreinit. Përreth pemës së gjelbër dhe me një pamje të shëndetshme ndodhet një shkretëtirë tepër e thatë.

Aty pranë nuk ka asnjë burim uji. Por pema merr ujë nga diku, dhe besohet se ajo ka rrënjë tepër të thella në një thellësi prej rreth 50 metrash. Disa njerëz thonë se pema ishte mbjellë në vendin e Kopshtit të Edenit, dhe kjo është arsyeja pse ajo është ende e gjallë.

Ernest Heminguei

Gjatë gjithë jetës së tij, shkrimtari i famshëm amerikan u përball me shumë përvoja afër vdekjes. Në Luftën e Parë Botërore, ai ishte shofer ambulance në shërbim të Kryqit të Kuq. Një mortajë austriake për pak sa nuk e vrau atë. Ai shpërthim e detyroi të vendoste një protezë aludimi në kupën e gjurit ndërsa në trup iu ngulën 237 copëza alumini.

Më vonë, ai për pak vrau veten gjatë përleshjes me një peshkaqen në Key West. Por, rreziqet më të mëdha për jetën i erdhën nga 2 aksidente ajrore, të cilat ndodhën brenda dy ditësh.

Kur ishte në Safari në Afrikë në vitin 1954, piloti i avionit Cesna ku udhëtonte Heminguei u rrëzua pasi u përpoq të shmangte një tufë zogjsh. Shkrimtari, bashkëshortja e tij dhe piloti e kaluan natën në xhungël. Më pas të nesërmen hipën në një avion tjetër, që u rrëzua menjëherë dhe mori flakë. Fillimisht Heminguei u raportua se kishte vdekur në aksident, por pak kohë më vonë doli nga xhungla me një tufë bananesh dhe një shishe xhin.

Përkthyer dhe përshtatur nga CNA.al

Foto/ Historitë më të çuditshme dhe misterioze të mbijetesës

LEXO TE PLOTE

Blog

Kina po shantazhon të tjerët me mjete ekonomike, SHBA dhe BE duhet të reagojnë

Publikuar

-

Nga

cna blog

https://www.newsweek.com/china-using-economic-coercion-blackmail-us-eu-must-fight-back-opinion-1667958

 

Nga Anders Fogh Rasmussen “Newsweek”

Për dekada, Tajvani është bllokuar në një pozicion që iu ri-përshtat të gjithëve:as nuk është pjesë e Kinës kontinentale, dhe as duke shpallur zyrtarisht pavarësinë. Republika Popullore e Kinës mund të ruante pretendimin e saj sovran mbi të. Por Tajvani ishte i lirë të zhvillohej si një demokraci liberale dhe një ekonomi moderne.

Dhe bota demokratike ishte në gjendje të mbante lidhje me të dyja, për sa kohë që ata distancoheshin nga çështja e sovranitetit dhe i përmbaheshin politikës së“Një Kine”.Por gjërat kanë ndryshuar. Nëpërmjet veprimeve të saj dhe retorikës së Sekretarit të saj të Përgjithshëm Xi Jingping, Kina ka treguar vitet e fundit se nuk është më e gatshme ta pranojë këtë statuskuo.

Prandaj, bota e lirë duhet që ta ri-mendojë qasjen e saj.

Gjatë mandatit të Sekretarit të Përgjithshëm Xi si udhëheqës, Pekini i ka shtuar sulmet hibride ndaj Tajvanit. Kina po bombardon me dezinformata demokracinë e Tajvanit.

Ajo po përdor gjithë peshën e saj diplomatike në të gjithë skenën botërore, për t’i detyruar organet dhe institucionet shumëpalëshe që të mos përfshijnë Tajvanin. Dhe muajt e fundit ka ndërmarrë inkursione ushtarake gjithnjë e më agresive dhe të rrezikshme në hapësirën ajrore të ishullit.

Edhe pse Kina po kërcënon në mënyrë aktive Tajvanin demokratik, deri më sot shumë njerëz në botën e lirë kanë bërë një sy shurdh ndaj këtyre sulmeve. Ata kanë pasur frikë nga kërcënimet dhe presioni ekonomik i Pekinit,ndaj kanë qenë të gatshëm të tolerojnë përpjekjet e njëanshme të Kinës për të ripërcaktuar atë që Pekini tani e quan “parimi i një Kine”.

Pekini dëshiron që kjo të nënkuptojë, se asnjë vend tjetër nuk mund të ketë marrëdhënie ekonomike apo politike me Taipein. Statuskuoja e Tajvanit ekziston krahas një politike amerikane të përshkruar më së miri si paqartësi strategjike.

Me këtë të fundit nënkuptohet se Shtetet e Bashkuara do të mbështesin Tajvanin nëse Kina do të sulmonte, por shkalla e saktë e çdo përgjigjeje, është lënë qëllimisht e papërcaktuar. Disa herë, presidenti Xho Bajden ka qenë shumë më pak i paqartë në pikëpamjet e tij.

Kina dhe Tajvani janë një fushë e politikës së jashtme, që bashkon të dyja partitë e mëdha në Uashington. Doktrina e “paqartësisë strategjike”, mund të ketë funksionuar mirë në të kaluarën. Por Kina e Xi Jinping nuk është Kina e së shkuarës. Tani duhet pak më shumë qartësi strategjike.

Kjo nuk do të thotë se SHBA-ja duhet t’i japë Tajvanit një garanci sigurie të ngjashme me klauzolën e mbrojtjes reciproke që përcakton neni 5 i traktatit themeltar të NATO-s. Por Shtetet e Bashkuara mund të bëhen më pak të fshehta në mbështetjen e tyre për Taipein.

Shtetet e Bashkuara kanë një interes shumë vetjak për mbrojtjen e Tajvanit. Nëse Tajvani do të bjerë, ndryshimi i ekuilibrit të fuqisë në Indo-Paqësorin më të gjerë do të ishte shkatërrues për kauzën e lirisë dhe demokracisë në mbarë botën.

Në këtë aspekt, as Evropa nuk mund të qëndrojë mënjanë, duke e kritikuar Amerikën për qasjen e saj më agresive ndaj Kinës, duke e lenë SHBA-në të mbajë të gjithë barrën e sfidave në rajonin e Indo-Paqësorit, ndërsa në të njëjtën kohë përpiqet që të ruajë një statuskuo merkantiliste me Pekinin.

Ne po shohim tashmë disa shenja të mira të hershme. Kohët e fundit, Parlamenti Evropian mbështeti me shumicë dërrmuese një rezolutë që kërkon përmirësimin e lidhjeve midis BE- së dhe Tajvanit, duke përfshirë një marrëveshje të re në fushën e investimeve.



Qeveria e re gjermane, me një Ministër të Jashtëm nga radhët e të Gjelbërve, është e orientuar më shumë drejt një politike të jashtme të bazuar tek vlerat. Ndërkohë Lituania ka braktisur një platformë ekonomike kinez në Evropën Qendrore, të njohur më shumë si 17+1, dhe ka lidhur haptazi marrëdhënie ekonomike me Tajvanin.

Këto veprime janë plotësisht në përputhje me “politikën e një Kine”, pasi ato nuk bëjnë asnjë njohje të sovranitetin e Tajvanit. Gjithsesi Kina po lufton kundër të drejtave sovrane të shteteve evropiane për të zhvilluar lidhje me Taipein.

LEXO EDHE:  CNA.al zbuloi pasurinë e vjehrrit të Ben Blushit/ Berisha: Lumturon familjen e Evës me 5 milionë euro!

LEXO EDHE:  Horoskopi i ditës, 12 prill 2021

Prandaj në kundërpërgjigje të lëvizjes së Lituanisë, Kina ka ndërmarrë një sërë lëvizjesh në fushën ekonomike kundër shtetit të vogël evropian, duke kufizuar eksportet e tij, dhe duke bllokuar në portet kineze më shumë se 1 mijë kontejnerë me mallra,për të cilat bizneset lituaneze kanë kryer tashmë pagesën.

Me këto sjellje Kina po ngacmon një aleat të NATO-s dhe një anëtar të BE-së, për të ndikuar tek vendimet e saj sovrane ekonomike dhe politike. Ky është një test për botën e lirë. Nëse e lëmë Lituaninë të vetme në përballje me Pekinin, super-arma e presionit ekonomik do t’u drejtohet edhe të tjerëve, për t’i detyruar më pas demokracitë t’i nënshtrohen vullnetit të Pekinit.

Në një periudhë afatshkurtër, ne duhet t’i ofrojmë Lituanisë hua të buta për të zbutur efektet e goditjeve ekonomike nga Kina. Edhe BE-ja duhet të deklarojë zyrtarisht se veprimet e Kinës po shtrembërojnë të gjithë tregun e përbashkët të BE-së, dhe të veprojë me kundërmasa ndaj Pekinit.

Bashkimi Evropian po punon për krijimin e një instrumenti kundër këtyre sjelljeve të Kinës, dhe kjo gjë që do t’i japë atij mjetet e duhura për të luftuar pikërisht kundër kësaj lloj sjellje. Por sfida e vërtetë e Brukselit nuk është nëse ai zotëron instrumentet e duhura ligjore; por nëse ka vullnet të mjaftueshëm politik për të mbrojtur të drejtën e Lituanisë për të bërë zgjedhjet e veta.

Në terma afatgjatë, bota e lirë mund të krijojë “Nenin 5” në fushën e ekonomisë për të reduktua abuzimet e Kinës me investimet strategjike dhe presionet ekonomik për qëllimet e saj gjeopolitike. Neni 5 i famshëm i NATO-s, thotë se një sulm ndaj një aleati është një sulm ndaj të gjithëve.

Po kështu, një “Nen 5 ekonomik” do të nxiste një përgjigje nga demokracitë,për të mbështetur një shtet apo biznes që përballet me presionet ekonomike që vijnë nga një autokraci. Pekini po e përdor fuqinë e tij ekonomike për të shantazhuar vendet dhe korporatat, pasi ky është një mjet efektiv.

Kjo praktikë ka funksionuar në rastet e kompanive të veshjeve, që u përballën me bojkot pasi vunë në dyshim shkeljet e të drejtave të njeriut, si dhe ndaj prodhuesve australianë të verës, të cilët janë përballur me tarifa të larta pas përkeqësimit të marrëdhënieve midis 2 vendeve.

Edhe Rusia përdor mekanizmat ekonomikë si një mjet për të arritur qëllimet e saj gjeopolitike, sidomos duke përdorur si një armë furnizimet e saj me gaz ndaj Evropës Perëndimore. Ne duhet të neutralizojmë efektet e këtyre taktikave që përdoren nga shtetet autoritare.

Ndërkohë, Evropa dhe Shtetet e Bashkuara kanë gjithashtu një interes të përbashkët në rajonin e Indo-Paqësorit:ta mbajnë këtë të fundit të lirë, të hapur dhe sa më demokratik që është e mundur. Roli i Evropës në këtë aspekt, mund të mos jetë domosdoshmërisht dërgimi i një flote avionësh në zonë.

BE mund të përmirësojë marrëdhëniet e saj politike dhe ekonomike me Tajvanin.

Për shembull, duke zhbllokuar një marrëveshje dypalëshe investimi që u pezullua në kohën kur Brukseli po synonte të nënshkruante një marrëveshje të ngjashme me Kinën.

Përmirësimi i lidhjeve ekonomike, është po aq në interesin tonë sa edhe të Tajvanit, duke pasur parasysh asetet e konsiderueshme që ka Tajvani në fushate teknologjisë së lartë sikurse janë gjysmë përçuesit. Evropa dhe SHBA-ja duhet të kërkojnë së bashku një qasje të re ndaj Kinës, diçka që administrata Bajden ia kërkoi BE-së edhe para inaugurimit të saj në detyrë.

Marrëdhënia jonë me Tajvanin nuk duhet të reduktohet vetëm tek mbështetja ushtarake apo në një marrëveshje specifike investimesh. Ajo ka të bëjë me pyetjen nëse ne jemi të gatshëm të ngrihemi për garantimin e lirisë dhe demokracisë në një rajon, ku që të dyja gjenden në një presion në rritje nga autokracia dhe diktatura.

Shënim: Anders Fogh Rasmussen, Sekretar i Përgjithshëm i NATO-s në vitet 2009-2014, dhe kryeministër i Danimarkës në vitet 2001-2009./ Përshtatur nga CNA.al

LEXO TE PLOTE