Connect with Us

Shtëpia e Bardhë, e hapur për negociata me demokratët për paketën e ndihmave

Bota

Shtëpia e Bardhë, e hapur për negociata me demokratët për paketën e ndihmave

Publikuar

-

Shtëpia e Bardhë njoftoi të hënën se është e hapur për negociata me demokratët e opozitës lidhur me paketën e ndihmave në përgjigje të koronavirusit dhe se është e gatshme të ofrojë më shumë fonde për të arritur një zgjidhje.

“Jemi të gatshëm të ofrojmë më shumë para,” tha Sekretari i Thesarit Steven Mnuchin për rrjetin CNBC.

Presidenti Donald Trump nënshkroi të shtunën urdhra ekzekutivë duke zgjeruar ndihmën e papunësisë për miliona amerikanë që kanë humbur punën nga pandemia si dhe duke lejuar më shumë kohë për të paguar taksat mbi të ardhurat. Në një koment të ri në Twitter, presidenti nuk përjashtoi mundësinë për nagociata të mëtejshme, por fajësoi udhëheqësin e demokratëve në Senat, Chuck Schumer si dhe kryetaren e Dhomës së Përfaqësuesve Nancy Pelosi për dështimin e bisedimeve të së premtes.

“Tani Schumer dhe Pelosi duan të takohen për të diskutuar një marrëveshje,” tha në Twitter presidenti. “Sa e çuditshme si shkojnë gjërat. Ku kanë qenë këto katër javë kur këmbëngulnin në qëndrimin e tyre dhe donin fonde vetëm për shtetet e drejtuara nga demokratët, të cilët po dështojnë keq? Ma dinë numrin e telefonit”.

Në intervistën me kanalin CNBC, zoti Mnuchin tha: “Mendoj se ka vend për kompromis, nëse demokratët janë të gatshëm të tregohen të arsyeshëm. Ka ende plot gjëra që duhet të bëjmë”.

Pas dështimit të bisedimeve javën e kaluar, zoti Schumer dhe zonja Pelosi thanë se demokratët do të heqin 1 trilion dollarë nga paketa origjinale prej 3.4 trilionë dollarësh që ata kanë ofruar si variantin demokrat. Ata i kërkuan Shtëpisë së Bardhë të dyfishojë propozimin e saj prej 1 trilion dollarësh për ta çuar paketën në të paktën 2 trilionë dollarë, por administrata nuk ka pranuar.

Sekretari i Thesarit tha se administrata Trump është e gatshme të shpenzojë më shumë fonde, por “jo sasi të pakufizuara parash pa kuptim”.

Zoti Mnuchin tha se dy palët kanë “rënë dakord për t’u ofruar bizneseve që janë goditur më rëndë ndihma të reja,” duke ndarë çeqe ndihmëse prej 1200 dollarësh për pjesën më të madhe të amerikanëve të rritur, duke mbështetur me fonde shkollat që të arrijnë të rihapen pa rrezik për nxënësit e personelin, si dhe mbështetje me fonde për spitalet si dhe për kompanitë që po punojnë për të zhvilluar një vaksinë kundër koronavirusit.

Një ndër pikat e fërkimit mbetet ndihma për qeveritë lokale, që Presidenti e sulmoi duke e cilësuar si “fonde për të shpëtuar” distrikte që drejtohen nga demokratët e opozitës. Zonja Pelosi dhe zoti Schumer thanë se shtetet dhe bashkitë e goditura nga pandemia kanë nevojë në total 1 trilion dollarë.

LEXO EDHE:  Gjyqi në SHBA/ Diveroli: Sherri me Trebickën, pse trillova për Shkëlzenin

“Kemi parashikuar fonde për të ndihmuar qeveritë lokale, por nuk do të japim 1 trilion dollarë. Nuk është zgjidhje e arsyeshme,” tha Sekretari Mnuchin.

Sekretari i Thesarit i bëri thirrje Kongresit të miratojë paketën, ndërkohë që mund të vazhdojnë më pas debatet për elementë të veçantë të paketës. Por demlokratët nuk duan negociata dhe debate për zëra të veçantë të paketës.

Sekretari Mnuchin nuk pranoi të spekulonte kur mund të rifillojnë negociatat.

Zoti Mnuchin tha se presidenti e pa të nevojshme të hidhej në veprim dhe nënshkroi urdhrat ekzekutivë, pasi negociatat dështuan.

Amerikanët e papunë në pritje të një ndihme të re financiare

Në intervista të dielën, zoti Schumer dhe zonja Pelosi kritikuan propozimin e Shtëpisë së Bardhë si shumë të kufizuar për nevojat aktuale të amerikanëve të pushuar nga puna si rezultat i koronavirusit. Zonja Pelosi tha se veprimet e presidentit ishin jo-kushtetuese sepse vetëm Kongresi dhe jo presidenti, ka të drejtën e miratimit të akteve për shpenzime buxhetore.

Demokratët u përpoqën gjatë negociatave të pasuksesshme të zgjasnin ndihmën e papunësisë prej 600 dollarësh në javë deri në fund të vitit. Presidenti e uli këtë shifër në 400 dollarë në javë dhe tha se shtetet individuale duhet t’u paguajnë personave që përmbushin kriteret 100 dollarë nga kjo shumë.

Presidenti gjithashtu ka pezulluar deri në fund të vitit taksën e të ardhurave prej 7.65% për ata që marrin rrogë më të vogël se 100 mijë dollarë në vit. Amerikanët e papunë nuk përfitojnë pasi aktualisht nuk marrin rrogë. Taksat shërbejnë për të mbështetur fondin e pensioneve dhe të kujdesit shëndetësor për amerikanët e moshuar. Këto pagesa shtyhen për të ardhmen, nëse Kongresi nuk miraton një akt legjislativ për t’i falur taksat.

Presidenti Trump tha se po zgjat mbrojtjen ligjore për qeraxhinjtë që rrezikojnë të dëbohen pasi nuk kanë paguar qeranë. Po ashtu presidenti u dha kohë shtesë amerikanëve për të shlyer pagesat e borxhit studentor, duke e mbajtur në 0% interesin për kredi studentore të dhëna nga qeveria federale.

Pandemia vazhdon të përhapet në Shtetet e Bashkuara. Aktualisht numërohen në total mbi 5 milionë raste të konfirmuara me koronavirus, ndërsa sëmundja ka shkaktuar mbi 163 mijë viktima. Në të dyja këto kategori, Shtetet e Bashkuara renditen të parat në botë./ VOA

Për të rejat më të fundit behuni pjesë e grupit tonë në facebook : City News Albania
KLIKO PER TE KOMENTUAR

Komentoni

Your email address will not be published. Required fields are marked *

Bota

SHBA-ja nënshkruan letrat e interesit me Kosovën dhe Serbinë për të investuar në Autostradën e Paqes

Publikuar

-

Nga

SHBA-ja nënshkruan letrat e interesit me Kosovën dhe Serbinë për të investuar në Autostradën e Paqes

Udhëheqësi i Korporatës Ndërkombëtare të Shteteve të Bashkuara për Zhvillim Financiar, Adam Boehler dhe udhëheqësja e Bankës për Eksport-Import, Kimberly Reed, kanë nënshkruar të martën letrat e interesit me Kosovën dhe Serbinë, përmes së cilave do të ndihmojnë në financimin e Autostradës së Paqes, që do të lidhë Nishin me Prishtinën.

Ky zotim ka qenë një prej pikave të marrëveshjes së nënshkruar më 4 shtator në Shtëpinë e Bardhë mes përfaqësuesve të Kosovës dhe Serbisë.

“Autostrada e Paqes do të nxisë zhvillim ekonomik dhe integrim rajonal, duke lidhur Nishin me Prishtinën. Po ashtu do të shërbejë si simbol i fuqishëm i marrëdhënies së re dhe transformuese të këtyre dy vendeve fqinje”, ka thënë Boelher.

Reed, në anën tjetër, ka thënë se ky projekt është një hap i rëndësishëm drejt bashkëpunimit në mes të Prishtinës dhe Beogradit.

“E përgëzoj punën e presidentit (amerikan, Donald) Trump dhe gjithë administratën e tij për këtë marrëveshje historike”, ka thënë ajo.

LEXO EDHE:  Praktikat zgjedhore në SHBA

LEXO EDHE:  Praktikat zgjedhore në SHBA

Delegacionet e këtyre dy trupave është thënë se do të vizitojnë Prishtinën dhe Beogradin më vonë gjatë këtij muaji, për të çuar përpara punën për Autostradën e Paqes dhe projekte tjera.



Përveç kësaj, është konfirmuar se Korporata Ndërkombëtare e Shteteve të Bashkuara për Zhvillim Financiar do të hapë edhe zyrën e saj në Beograd për të lehtësuar zbatimin e projekteve.

Kryeministri i Kosovës, Avdullah Hoti ka thënë përmes një postimi në rrjetin social, Twitter se ky njoftim përbën lajm të mirë, meqë përmes tij do të zbatohet marrëveshja e nënshkruar në Shtëpinë e Bardhë.

Kryeministri Hoti dhe presidenti serb, Aleksandar Vuçiq kanë nënshkruar marrëveshjen për normalizimin e marrëdhënieve ekonomike më 4 shtator në Shtëpinë e Bardhë, në praninë e presidentit Trump.

Dy palët, megjithatë, nuk i kanë hedhur nënshkrimet në dokumentin e njëjtë, por secila veç e veç i ka nënshkruar zotimet e saj.

Trump ka nënshkruar një letër, përmes së cilës i ka përgëzuar palët për guxim drejt normalizimit të marrëdhënieve./REL

LEXO TE PLOTE

Bota

Gjermania pritet të pranojë 1,500 refugjatë nga ishujt grekë

Publikuar

-

Nga

Gjermania pritet të pranojë 1,500 refugjatë nga ishujt grekë

Gjermania planifikon të ofrojë strehim për 1,500 migrantë që aktualisht janë në ishujt grekë, kanë thënë disa burime qeveritare për agjencinë e lajmeve AFP, ndërkohë që çështja e ndjeshme e migrantëve është përfshirë sërish në agjendën politike të Bashkimit Evropian, pasi një zjarr ka shkatërruar një kamp të stërngarkuar të migrantëve në ishullin grek Lesbos.

Rreth 12,000 ish-banorë të kampit Moria në Greqi janë duke jetuar aktualisht në ndërtesa të braktisura, apo rrugë, pasi kampi është shkatërruar më 8 shtator.

Teksa rritet presioni ndaj bllokut evropian për ta bërë punën e tij, Berlini veçse i është bashkuar iniciativës evropiane për të strehuar 400 fëmijë të pashoqëruar të këtij kampi.

Mirëpo përveç 150 fëmijëve tjerë, Gjermania po ashtu planifikon të mirëpresë familjet me fëmijë që tashmë kanë siguruar statusin e refugjatit dhe mund të mos jenë nga kampi Moria, është cituar një plan i miratuar nga kancelarja gjermane, Angela Merkel dhe ministri i Brendshëm gjerman, Horst Seehofer.

LEXO EDHE:  Praktikat zgjedhore në SHBA

LEXO EDHE:  Praktikat zgjedhore në SHBA

Ky plan është thënë të jetë krijuar pasi qytetet gjermane i kanë bërë thirrje Berlinit që të bëjë më shumë.



Qeveria e Merkelit ka insistuar se duhet të gjendet një zgjidhje evropiane për këtë çështje në vend të individualitetit.

Shefi i Këshillit Evropian, Charles Michel, ka thënë në Athinë, teksa ka takuar kryeministrin Kyriakos Mitsotakis, se BE-ja duhet të ofrojë “përgjigje të fuqishme dhe efikase” për problemin e migrimit.

Greqia është duke rritur përpjekjet për të krijuar strehim të përkohshëm, ndërkohë që banorët lokalë janë duke u përgatitur për mbajtje të protestave kundër migrimit.

Të martën, ministria greke për Migrim ka thënë se rreth 800 banorë të kampit Moria janë strehuar në vendbanime të përkohshme në Lesbos.

Prej tyre, 21 kanë rezultuar pozitivë në testet për koronavirus, ka thënë kjo ministri.

LEXO TE PLOTE

Bota

Trump organizon ceremonitë e normalizimit të marrëdhënieve Izrael-Emirate-Bahrein

Publikuar

-

Nga

Presidenti Donald Trump pritet të udhëheqë ceremonitë e nënshkrimit të marrëveshjeve historike diplomatike mes Izraelit dhe dy vendeve arabe të Gjirit që mund të paralajmërojnë një ndryshim dramatik në dinamikat e Lindjes së Mesme dhe t’i japin atij një shtysë përpara për zgjedhjet e nëntorit. Në një ceremoni të martën në Shtëpinë e Bardhë, Presidenti Trump do të presë më shumë se 700 mysafirë të pranishëm në nënshkrimin e marrëveshjeve mes Izraelit, Emirateve të Bashkuara Arabe dhe Bahreinit. Presidenti Trump dhe aleatët e tij shpresojnë se ky rast do të theksojë aftësitë e zotit Trump si paqebërës në kulmin e fushatës së tij për rizgjedhje.

Kryeministri izraelit Benjamin Netanyahu dhe ministrat e Jashtëm të Emirateve dhe Bahreinit do të nënshkruajnë marrëveshjet para të pranishmëve, mes të cilëve përfaqësues nga trupi diplomatik në Uashington, por edhe personalitete të tjera nga përtej oqeanit. Në ceremoni janë ftuar edhe disa demokratë të Kongresit, të cilët kanë ofruar mbështetje në heshtje për këto marrëveshje.

Përveç marrëveshjeve bilaterale të nënshkruara nga Izraeli, Emiratet e Bashkuara dhe Bahreini, përfaqësuesit e të tre vendeve do të nënshkruajnë një dokument trepalësh, thanë zyrtarët. Marrëveshjet janë quajtur “Marrëveshjet e Abrahamit” për nder të patriarkut të tre feve kryesore monoteiste të botës. Presidenti Trump pritet të nënshkruajë si dëshmitar. Marrëveshjet nuk u japin fund luftërave aktive, por zyrtarizojnë normalizimin e marrëdhënieve tashmë të ngrohta të shtetit hebre me të dy vendet. Ndërsa nuk trajtojnë konfliktin e gjatë izraelo-palestinez, ato mund t’i hapin rrugën një afrimi më të gjerë arabo-izraelit pas dekadash armiqësie.



Skeptikët, përfshirë shumë vëzhgues të Lindjes së Mesme, mes tyre analistë, ekspertë dhe ish-zyrtarë, kanë shprehur dyshime në lidhje me ndikimin e marrëveshjeve. Ata thonë se marrëveshjet injorojnë palestinezët, të cilët i kanë refuzuar ato, duke i cilësuar si një thikë pas shpinë nga vendet e tyre partnere arabe.

LEXO EDHE:  Studimi/ Ja burimi i 80 për qind të të infektuarve me COVID-19

LEXO EDHE:  Praktikat zgjedhore në SHBA

Ish-Nënpresidenti Joe Biden, rivali demokrat i Presidentit Trump, tha se ai mbështet qëndrimet që më shumë vende të normalizojnë marrëdhëniet me Izraelin si përgjigje ndaj një pyetje të bërë se fundmi nga Zëri i Amerikës, por ai shtoi se beson se “Izraeli duhet të jetë i përgatitur të punojë drejt një zgjidhje të sinqertë, me dy shtete” me palestinezët./DW

LEXO TE PLOTE