Foshnja, e cila ishte e para e infektuar me Covid-19 në Kosovë, ka dalë nga Klinika e Neonatologjisë. Mësohet se gjendja shëndetësore e foshnjes është e mirë

Lajmin e ka konfirmuar drejtori i klinikës dr. Xhevdet Gojnovci. Ai ka thënë se foshnja është në gjendje të mirë shëndetësore.

“Po mund t’ju konfirmoj se foshnja është në gjendje të mirë shëndetësore dhe është dërguar në shtëpi”, ka deklaruar Gojnovci për Express.

I porsalinduri ishte foshnja e parë e konfirmuar pozitive me Covid-19. Foshnja u trajtua për më shumë se 1 javë në klinikën e Neonatologjisë dhe tani është bashkuar me prindërit e saj./CNA.al

Kancelarja gjermane Angela Merkel tha të hënën se nuk është e qartë nëse vendet anëtare të BE-së do të arrijnë një marrëveshje për një fond rimëkëmbjeje nga COVID-19 dhe një buxhet shumëvjeçar gjatë një samiti këtë javë, duke pasur parasysh se mbeten ende mosmarrëveshje.

Udhëheqësit e vendeve anëtare të BE-së do të mblidhen fizikisht të premten dhe të shtunën për të arritur një kompromis për një paketë stimuluese shumë-miliarda dollarëshe të propozuar nga Gjermania dhe Franca. Debati ka qenë i lidhur me një diskutim për buxhetin afatgjatë të bllokut prej 27-vendesh anëtare.

Kancelarja Merkel foli me gazetarët gjatë vizitës së kryeministrit italian Giuseppe Conte në Kalanë Meseberg – shtëpia e pritjes e qeverisë gjermane, në veri të Berlinit, ku të dy zhvilluan bisedime. Ajo tha se pozicionet janë ende shumë larg për të bërë parashikime se si do të zhvillohen negociatat.

Merkel tha se ajo që është e rëndësishme është qëllimi i marrëveshjes.

“Ajo që duam tani, fondi i rimëkëmbjes ose programi i gjeneratës tjetër të BE-së, duhet të jetë diçka e veçantë. Sepse detyra në fjalë është e madhe, dhe për këtë arsye përgjigjja duhet të jetë gjithashtu e madhe,” tha ajo.

Njoftimet italiane të lajmeve cituan kryeministrin Conte të ketë thënë se BE-ja duhet të ofrojë “zgjidhje, jo iluzione dhe frikë”.

Pjesa më e madhe e parave të paketës stimuluese do të shkonin për të ndihmuar vendet që u goditën më shumë nga koronavirusi, dhe ndikimet e tij ekonomike, në vende si Italia dhe Spanja. Disa vende që janë konservatore karshi parametrave fiskalë të BE-së e kundërshtojnë planin francezo-gjerman, sepse kjo do të kërkonte për herë të parë, marrjen e një borxhi nga ana e bllokut në tërësi./VOA

Kërkesa për votimet me postë po rritet. Punonjësit e zgjedhjeve kanë nevojë për trajnim. Dhe qendrat e votimit mund të duhet të jenë të pajisura me mburoja mbrojtëse gjatë pandemisë COVID-19.

Ndërsa zyrtarët përgatiten për zgjedhjet e 3 nëntorit, një gjë është e qartë: ato vijnë me një çmim të lartë.

“Zyrtarët e zgjedhjeve nuk kanë pothuajse fare burime të mjaftueshme për të bërë përgatitjet dhe ndryshimet që duhen për të zhvilluar zgjedhje në kohë pandemie,” thotë Wendy Weiser, drejtuesja e programit për demokraci në Qendrën Brennan. “Ne po e shohim këtë në të gjithë vendin”.

Pandemia ka bërë që zyrtarët shtetërorë dhe lokalë të përpiqen të përgatiten për zgjedhje si pak të tjera, një detyrë e jashtëzakonshme gjatë një gare presidenciale, pasi rastet e infeksioneve po rriten në pjesën më të madhe të vendit.

Shqetësimet e lidhura me COVID-19 po sjellin kërkesa për hapat që duhen marrë për të siguruar që zgjedhjet, vetëm katër muaj larg, janë të sigurta. Por ndihma federale e premtuar prej kohësh për të ndihmuar shtetet e varfëruara nga fondet ka ngecur në Kongres.

Fondet do të ndihmojnë për shndërrimin e procesit të vjetër të votimit në një sistem të gatshëm për kushtet e pandemisë. Thelbësore për këtë janë kostot për shtypjen e fletë-votimeve dhe shërbimin postar. Ka gjithashtu shpenzime për të siguruar që votimi në person është i sigurt me pajisje personale mbrojtëse, për punonjësit në qendrat e votimit, të cilët janë zakonisht të moshuar dhe me më shumë rrezik të sëmuren nga virusi, dhe trajnimin e punonjësve të rinj. Makineritë e kushtueshme janë të nevojshme për të numëruar shpejt votën.

Çështja komplikohet më tej nga mospëlqimi që ka Presidenti Donald Trump ndaj votimit me postë. Ai e ka cilësuar procesin si të rremë, edhe pse nuk ka asnjë dëshmi të manipulimit ndërsa ekipi i tij i rizgjedhjes po përshtatet me realitetin e ri të votimit të përhapur me postë.

“Ndërsa rastet e koronavirusit në këtë vend rriten, është thelbësore që të gjithë votuesit të jenë në gjendje të hedhin votat e tyre nga shtëpia, të hedhin votat e tyre me postë”, tha senatorja demokrate e Minesotës Amy Klobuchar.

Një projekt-ligj i miratuar nga Dhoma e Përfaqësuesve në maj cakton 3.6 miliardë dollarë për të ndihmuar shtetet në përgatitjet për zgjedhje, por Senati nuk do ta shqyrtojë masën deri në fund të korrikut. Republikanët kundërshtuan një fond prej 400 milionë dollarësh të ndihmës zgjedhore këtë mars, përpara se të binin dakord për të.

Por republikanët kryesorë të Senatit duket se ka gjasa të mbështesin më shumë fonde për zgjedhjet, megjithë kundërshtimin e presidentit Trump.

Roy Blunt, është senator republikan nga Mizuri. “Ne mund të vazhdojmë të punojmë për zgjedhje që prodhojnë një rezultat të besueshëm për njerëzit dhe të hartuar në atë mënyrë që të gjithë ata që duan të votojnë, të jenë në gjendje të votojnë.”

Pandemia shpërtheu këtë pranverë në mes të zgjedhjeve paraprake të shteteve, duke detyruar shumë zyrtarë të shtyjnë zgjedhjet me ditë, javë dhe madje muaj. Ata u përballën me mos paraqitjen e punonjësve në qendrat e votimit, ndryshime në vendet e votimit dhe një rritje të votimeve në mungesë.

Grupet e të drejtave të votimit janë veçanërisht të shqetësuara me konsolidimin e qendrave të votimit që kontribuan për rradhë të gjata në Miluoki, Atlanta dhe Las Vegas. Ata kanë frikë se kjo mund të përsëritet në nëntor.

Ndërsa negociatat për projekt-ligjin tjetër të ndihmës për COVID-19 fillojnë në Kongres, shifra përfundimtare për zgjedhjet sigurisht që do të përfundojë shumë më pak se 3.6 miliardë dollarë të parashikuar nga Dhoma e Përfaqësuesve. Kjo shifër pasoi rekomandimet e Qendrës Brennan për t’u përgatitur për një fluks të votimeve në mungesë duke siguruar më shumë mundësi të votimit të hershëm dhe mbrojtjen e qendrave të votimit në zona./ VOA