Elseid Hysaj nuk pati asnjë minutë në fushë mbrëmjen e djeshme kundër Milanit, por fakti se pas mbërritjes së Xhenaro Gatuzos në stolin e Napolit, gjërat për të kanë ndryshuar pozitivisht, këtë gjë kapiteni i Kombëtares së Shqipërisë e pranoi hapur për “Sky Sport”, përpara duelit të përfunduar 2-2 në stadiumin “San Paolo”.

“Napoli është rikthyer që të jetojë një periudhë mjaft pozitive, të rikthehet të luajë një futboll cilësor dhe shpresojmë që këtë ritëm ta ruajmë deri në fund të këtij sezoni, – shpjegon mbrojtësi i djathtë i Napolit, i cili kur pyetet sesa do të ndikojë Gatuzo në të ardhmen e tij, thekson:

Gatuzo është një trajner dhe një person që ndoshta i përjeton ndeshjet edhe më shumë sesa ne, por këtë ritëm ka ditur se si të na e transmetojë të gjithëve në grup.

Edhe për duelin me Milanin, ai ka qenë shumë i karikuar gjatë gjithë këtyre ditëve, duke na shtuar të gjithëve besimin për të bërë një paraqitje të mirë. E ardhmja ime? Dua ta nis duke thënë se kam shumë besim te Gatuzo. Te Napoli ndihem si në shtëpinë time, por në futboll ka gjëra që nuk parashikohen dot”.

Kristiano Ronaldo është rikthyer si një përbindësh pas pezullimit të kampionateve. Portugezi ka shënuar në të gjitha ndeshjet që kur Seria A u rikthye dhe tani numëron 28 gola në kampionat. Një ecuri e tillë ka bërë që ai të jetë vetëm një gol larg Çiro Imobiles në tabelën e golashënuesve të kampionatit italian dhe vetëm 6 nga Robert Levandovski, i cili është lideri në tabelën e “Këpucës së Artë”.

Por Ronaldo e kërcënon seriozisht sulmuesin polak të Bajernit sepse në Serinë A kanë mbetur edhe 6 javë të tjera për t’u luajtur. Kjo do të thotë se Kristiano Ronaldo mund të fitojë “Këpucën e Artë” për herë të pestë në karrierën e tij. Kjo gjë dukej shumë e vështirë dhe e pamundur kur u rikthye futbolli, por portugezi ka shënuar 7 gola në 6 ndeshjet e luajtura për Juventusin në këtë periudhë: Një Bolonjës, një Leçes, një Xhenoas, një Torinos në derbi, një Milanit dhe dy të fundit kundër Atalantës me penallti. Shtatë gola, 4 me penallti për të arritur kuotën e 28 golave në total. Kristiano Ronaldo nuk e ka fituar “Këpucën e Artë” që nga sezoni 2014-2015 kur shënoi as më pak dhe as më shumë sesa 48 gola në La Liga me Realin e Madridit. Që nga ajo ditë, Luis Suarez dhe Leo Mesi në 3 raste kanë qenë fituesit. Ronaldo nuk është shfaqur as në podiumin e këtij trofeu në 3 sezonet e fundit. Ndeshjet që i kanë mbetur Ronaldos për të kaluar Levandovskin janë kundër Sasuolos, Lacios, Udinezes, Sampdorias, Kajlarit dhe Romës.

Me Serinë A thuajse të përfunduar dhe pa rivalitet, duket se objektivi kryesor i të gjithë skuadrës është që Kristiano Ronaldo të dalë golashënuesi më i mirë në kampionatin italian dhe në Europë. Ashtu si Ronaldo, edhe Imobile mund ta parakalojë Levandovskin, sepse kampionati gjerman ka përfunduar. Një “luftë” që pritet elektrizuese deri në javën e fundit duke qenë se diferenca mes “Zonjës së Vjetër” dhe Lacios tashmë është 8 pikë dhe duket se nuk ka më garë. Në këtë sezon, Kristiano Ronaldo ka arritur të shënojë në total 32 gola, 28 në Serinë A, 2 në Champions League dhe 2 në Kupën e Italisë. Interesant është fakti që 6 golat e fundit të shënuar nga Ronaldo kanë qenë nga goditje standarde ose penallti. Vetëm një herë e kishte bërë diçka të tillë në vitin 2009 kundër Junajtid. Portugezi është një hap larg historisë me Juventusin pasi për 2 gola do të barazojë Borelin, i cili në vitin 1934 shënoi 31.