Drejtori sportiv i Lacios, Igli Tare është në kërkim të përforcimit të skuadrës së Lacios, dhe për këtë po mendon të marrë një lojtar me eksperiencë që e njeh mjaft mirë kampionatin italian dhe jo një talent që pritet të zhvillohet ndeshje pas ndeshje.

Bëhet fjalë për ish-lojtarin e Arsenalit, Lukas Torreira i cili aktualisht aktivizohet me Atletikon e Madridit dhe i cili e njeh mirë Serinë A pasi ka luajtur edhe me skuadrën e Sampdorias vite më parë ku shkëlqeu me paraqitjet e tij dhe u transferua tek “topçinjtë” e Londrës për të hedhur hapin e madh në karrierë.

Për momentin mesfushori uruguajan, vlerësohet të paktën 25 milionë euro, një shifër e lartë për buxhetin e kryeqytetasve, por Tare po mendon që t’a bëjë për vete vetëm në merkaton e verës. Përveç bardhekaltërve dhe Valencia është shumë e interesuar për 24-vjeçarin. Torreira në total midis kampionatit, Kupës dhe Champions-it është aktivizuar në total 13 ndeshje duke shënuar 1 gol dhe dhuruar 1 asist.

Do të jetë Davide Nikola, trajneri i ri i Torinos që do të zëvendësojë Xhampaolon, i cili u shkarkuar ditën e djeshme, pas rezultateve negative këtë sezon. Largimi i tij nga klubi “granata” erdhi pas barazimit në shtëpi të Torinos ndaj Specias. Për sa i përket Nikolës, ai rikthehet te Torino, pas eskperiencës si futbollist, ku u aktivizua 35 ndeshje gjatë sezonit 2005-2006.

Ndërkohë si trajner, 47-vjeçari, së fundi drejtoi klubin e Xhenoas, bëhet fjalë për sezonin 2019-2020.  Tekniku italian gjithashtu në të kaluarën ka drejtuar edhe klube të tjera italiane si Udineze, Krotone, Bari dhe Livorno.

Milani kalon edhe pengesën Kaljari! Kuqezinjtë e Stefano Piolit, triumfuan në transfertë me rezultatin 0-2, falë dopietës së Zllatan Ibrahimoviç. Rikthim i frikshëm i sulmuesit suedez, i cili e nisi ndeshjen si titullar, duke shënuar 2 herë dhe duke i dhuruar 3 pikë të arta skuadrës së tij, që kryeson kampionatin e vetme me 43 pikë në 18 ndeshje.

Edhe pse pa shumë titullarë si Teo Hernandez, Çalhanoglu, Rebiç si dhe Benaser, 7 herë fituesit e Championsit arritën të bindnin. I vetmi “pishman” në këtë sfidë ishte dalja me karton të kuq e Selemekers.

I rikthyer nga dëmtimi, belgu u aktivizua në minutën e 66-të të sfidës, duke zënë vendin e Hauge. Futbollisti i Milanit qëndroi vetëm 8 minuta në fushë, teksa u ndëshkua 2 herë me kartonë të verdhë në minutat 68 dhe 74, duke lënë skuadrën e Piolit me 10 lojtarë për afro 20 minuta.

Pavarësisht inferioritetit numerik, kryesuesit e Serisë A, arritën ta menaxhonin mjaft mirë rezultatin, duke mos e vënë për asnjë moment në dyshim suksesin. Sfidën e radhës Milani do e luajë më datën 23 janar ndaj Atalantës në shtëpi. Ndërkohë për Kaljarin kjo ishte humbja e 5-të radhazi në kampionat.