Connect with Us

Debati për Gjykatën Kushtetuese/ Komisioni i Venecias: Nuk ka vend për interpretime

Politikë

Debati për Gjykatën Kushtetuese/ Komisioni i Venecias: Nuk ka vend për interpretime

Publikuar

-

Debati për Gjykatën Kushtetuese/ Komisioni i Venecias: Nuk ka vend për interpretime

Deutsche Welle: Prof. Nußberger, ju jeni anëtare gjermane e Komisionit të Venecias dhe merreni edhe me çështjet e hapura juridike në Shqipëri. A keni qenë vetë në Shqipëri?

Prof. Angelika Nußberger: Herën e fundit kam qenë në shkurt me delegacionin e Komisionit të Venecias në Shqipëri, pak kohë para shpërthimit të Coronës.

E cila ishte përshtypja nga takimet tuaja?

Në takimet e shumta me përfaqësues nga politika dhe shoqëria civile pata përshtypjen se është shumë urgjente që reforma e drejtësisë të përmbyllet sa më shpejt dhe me sukses.

Së fundmi Komisioni i Venecias ofroi rekomandimet e tij për shqetësimet ekzistuese në Shqipëri lidhur me Gjykatën Kushtetuese në Shqipëri. Cili është hapi tjetër që duhet ndërmarrë tani?

Për Shqipërinë ka një rëndësi të jashtëzakonshme të ketë një Gjykatë Kushtetuese funksionale. Kështu që hapi tjetër i nevojshëm është të ecet përpara me emërimet e tjera të gjyqtarëve të Gjykatës Kushtetuese. Mbi bazën e opinionit të Komisionit të Venecias rruga përpara tani duhet të jetë e qartë.

Por edhe më parë Komisioni i Venecias ka publikuar rekomandimet e veta për mosmarrëveshje të tjera. Rezultati ka qenë shpesh interpretimi politik, ku secila palë thotë, se Komisioni i jep të drejtë dhe grindjet vazhdojnë. Çfarë efekti kanë atëherë rekomandimet tuaja? A përbën një problem fakti që opinionet tuaja nuk janë të detyrueshme?

Është e vërtetë që teknikisht opinionet e Komisionit të Venecias nuk janë të detyrueshme; ato ofrojnë atë që shpesh quhet si “soft law” – “ligji i butë”. Por kjo nuk do të thotë, që ato mund të neglizhohen. Përkundrazi, të dy, kryetari i Parlamentit të Shqipërisë edhe Presidenti i Shqipërisë e kanë kërkuar opinionin, që do të thotë ata që kanë qëndrime të ndryshme në lidhje me emërimet e gjyqtarëve të Gjykatës Kushtetuese Opinioni i Komisionit të Venecias jep një përgjigje për pyetjet e kërkuara. Prandaj nuk mund të ketë asnjë dyshim që do të merret seriozisht. Përgjigjet e dhëna përfaqësojnë komunitetin ligjor europian; ato kanë një autoritet të veçantë.

Pas dëgjimit të të gjithë aktorëve relevantë, Komisioni i Venecias e shpjegon pozicionin e tij ligjor sa më qartë të jetë e mundur. Kështu që nuk ka vend për interpretime.

Ka kohë që Gjykata Kushtetuese nuk funksionon në Shqipëri. Çfarë duhet bërë për të përshpejtuar procesin e emërimeve të Gjykatës Kushtetuese?

Kushtetuta e Shqipërisë vendos një mekanizëm të komplikuar për emërimin e gjyqtarëve të Gjykatës Kushtetuese. Parashikimet kushtetuese çuan në mosmarrëveshje, se si kuptohen ato në kushte të caktuara – në një situatë, ku ka shumë vende bosh në të njëjtën kohë, ku procedura e vetting-ut është ende në vazhdim e sipër dhe ku ka vetëm shumë pak kandidatë. Komisioni i Venecias ka dhënë shpjegimin si të operohet në kushte të tilla. Kështu, bazuar në këtë opinion, aktorët e ndryshëm politikë duhet të fillojnë bashkëpunimin në mirëbesim. “Për të kapërcyer krizën kërkohet dhe është thelbësore arritja e një konsensusi të gjerë për një dialog konstruktiv, ndërinstitucional dhe bashkëpunimi mes institucioneve të shtetit.”

Funksionimi i Gjykatës Kushtetuese do të ketë një efekt pozitiv në zhvillimin e vendit. Çështjet e diskutueshme mund të zgjidhen kështu mbi baza ligjore. Në një rast të mosmarrëveshjeve mes aktorëve të ndryshëm politikë Gjykata Kushtetuese do të jetë arbitri që do të tregojë rrugën përpara.

LEXO EDHE:  Ngritja e Gjykatës Kushtetuese/ PD tregon dy opsionet e Ramës

Komisioni dha rekomandime për disa ndryshime kushtetuese. Megjithatë nuk është i vogël rreziku, që ju të dëgjoni sërish për grindje politike lidhur me to, me rezultatin e një bllokade të re politike. Cila është qasja juaj në këtë rast?

Rekomandimet mbi ndryshimet kushtetuese prekin rregullat e paqarta. Njëherë për njëherë, megjithatë Komisioni i Venecias ka shpjeguar si funksionojnë mekanizmat kushtetues. Kështu që edhe nëse nuk ka konsensus për ndryshimin e Kushtetutës, nuk ka asnjë arsye për një bllokadë politike.

A e ndiqni ju edhe implementimin e rekomandimeve tuaja, apo puna juaj merr fund sapo të jepet opinioni?

Po, Komisioni i Venecias gjithmonë i ndjek nga afër deri në ç’pikë janë implementuar opinionet e tij. Sekretariati i raporton mbledhjes plenare mbi zhvillimet gjatë takimit në Venecia.

Reforma e drejtësisë në Shqipëri është një sfidë që po zgjat me vite, e po të flasësh me njerëzit në vend ata janë të lodhur, sepse institucionet kryesore të ligjit nuk funksionojnë prej vitesh. Çështje të rëndësishme ende presin përgjigje. A ka diçka që do të thonit tani më pas, për reformën, se kjo do duhej të ishte organizuar më mirë vitet e kaluara në Shqipëri?

Komisioni i Venecias i ka analizuar problemet e reformës ligjore në Shqipëri. Lidhur me çështjen e mosfunksionimit të Gjykatës së Lartë, Komisioni i Venecias i ka dedikuar tre kapituj të opinionit të tij mbi faktorët e ndryshëm, influencën e procesit të vetting-ut, influencën e Këshillit të Emërimeve në Drejtësi dhe rrethanat konkrete të të ashtuquajturit “incident procedural”.

Në të ardhmen është i mundur një fillim i ri. Të gjithë aktorët politikë duhet të marrin si pikë startimi nevojën urgjente për të rithemeluar Gjykatën e Lartë. Ky duhet të jetë një qëllim politik i përbashkët, në të cilin nuk duhet të interferojnë interesat personale dhe politiko-partiake.

A keni shembuj, se ku e kanë hapur derën e dialogut rekomandimet tuaja?

Ka shembuj interesantë, ku shtetet që kanë pasur shqetësime kanë ndjekur opinionin e Komisionit të Venecias. Një shembull mund të jetë adoptimi i Aktit të Sistemit Juridik në Bullgari, ku në fund një nga rekomandimet u adresua pjesërisht, dhe rishikimi i Kushtetutës në Gjeorgji, ku opinioni i Komisionit të Venecias u mor për bazë në disa aspekte.

A mendoni se Shqipëria është pranë kësaj?

Gjatë vizitës sonë ne kemi parë se të gjithë aktorët politikë janë të vetëdijshëm për situatën e vështirë të vendit dhe duan të tejkalojnë situatën e krizës. Shqipëria ka juristë të shkëlqyer dhe mund të ngrejë me lehtësi institucione shtetërore që funksionojnë mbi bazën e sundimit të ligjit. Vullneti politik është aty. Nga perspektiva jashtë duket, se problemet janë “self-made” -të krijuara vetë dhe çdo gjë do të rregullohet sa më shpejt që aktorët politikë të bashkojnë përpjekjet e tyre për të gjetur zgjidhje të mira të përbashkëta.

Po tani që nuk mund të vizitoni vendin, si merren vendimet për opinionin?

Për shkak të Coronës, anëtarët e Komisionit të Venecias nuk mundën të takoheshin as në mars, e as në qershor. Megjithatë ne mundëm të pranonim opinione të rëndësishme në formë të shkruar.

Prof. Angelika Nußberger, është anëtare gjermane e Komisionit të Venecias, më parë zëvendëspresidente e Gjykatës Europiane për të Drejtat e Njeriut, drejtoreshë e Institutit për Ligjn Europiano Lindor në Universitetin e Kölnit./ DW

Për të rejat më të fundit behuni pjesë e grupit tonë në facebook : City News Albania
KLIKO PER TE KOMENTUAR

Komentoni

Your email address will not be published. Required fields are marked *

Politikë

Venecia refuzon të bëjë interpretime/ Meta: Koha për zbatimin korrekt të rekomandimeve

Publikuar

-

Nga

Deklarata e anëtares së Venecias/ Meta: Është koha për zbatimin korrekt të rekomandimeve

Presidenti Ilir Meta ka shpërndarë në rrjetet sociale deklaratën e anëtares gjermane të Komisionit të Venecias, Prof. Angelika Nußberger, e cila tha se nuk ka vend për diskutime për ështjen e Gjykatës Kushtetuese.

Meta i jep peshë fjalës së saj dhe deklaron se tani është koha për zbatimin korrekt të rekomandimeve të Komisionit të Venecias.

Sipas tij, kjo është e vetmja rrugë drejt çeljes së negociatave dhe funksionimit të shtetit ligjor.

“Po, nuk ka më vend për interpretime! Tani është koha për zbatimin korrekt të rekomandimeve të Komisionit të Venecias, përmes bashkëpunimit transparent dhe konstruktiv. Është shumë e rëndësishme që Komisioni i Venecias do të ndjekë edhe zbatimin e rekomandimeve të tij të fundit për Gjykatën Kushtetuese dhe Gjykatën e Lartë.

LEXO EDHE:  Gjykata Kushtetuese s’mund të jetë gati në shtator/ Hazizaj: Duhen të paktën edhe 6 muaj

LEXO EDHE:  Spiropali “sfidon” presidentin për dorëheqjen/ Nuk besoj që Meta të mbaj fjalën e dhënë

Po kështu rekomandimet e Komisionit të Venecias janë në ndjekje nga Parlamenti Europian dhe vendet anëtare. Kjo është e vetmja rrugë drejt çeljes së negociatave dhe funksionimit të shtetit ligjor”, nënvizon Kreu i Shtetit./ CNA.al

LEXO TE PLOTE

Politikë

Fatmir Limaj zbulon detaje nga takimi me Ramën/ Vë nën përgjegjësi udhëheqësit e Kosovës: Të anashkalojnë dallimet

Publikuar

-

Nga

Fatmir Limaj zbulon detaje nga takimi me Ramën/ Vë nën përgjegjësi udhëheqësit e Kosovës: Të anashkalojnë dallimet

Kryetari i Nismës në Kosovë Fatmir Limaj, ka zbuluar detaje nga takimi me kryeministrin Edi Rama.

Në një postim në rrjetet sociale, Limaj deklaron se diskutuan për zhvillimet aktuale.

Kreu i Nismës vë nën përgjegjësi udhëheqësit e forcave politike dhe institucionet shtetërorë të Kosovës, të cilëve i thotë që t’i lemë anash dallimet dhe të veprojmë me gjakftohtësi të madhe në interes të vendit.

Ai thekson se Rama i ka ofruar gjithë ndihmën e shtetit shqiptar në çdo proces nëpër të cilat mund të kalojë Kosova.

“Sot patëm kënaqësinë të mirëpresim në selinë e Nismës Socialdemokrate, kryeministrin e Republikës së Shqipërisë, z. Edi Rama, me bashkëpunëtorë, me të cilin diskutuam për zhvillimet aktuale, me theks të veçantë për mundësinë e koordinimit të veprimeve që duhet ndërmarrim si spektër politik në Kosovë pas situatës së krijuar në vendin tonë. Bashkërisht konstatuam se drejtuesit e institucioneve në Kosovë duhet të tregojnë̈ lidership të vërtetë në këto rrethana në të cilat po kalon vendi.

LEXO EDHE:  Gjykata Kushtetuese s’mund të jetë gati në shtator/ Hazizaj: Duhen të paktën edhe 6 muaj

LEXO EDHE:  Ngritja e Gjykatës Kushtetuese/ PD tregon dy opsionet e Ramës

Është përgjegjësi e udhëheqësve të forcave politike dhe institucioneve shtetërorë të Kosovës që t’i lemë anash dallimet dhe të veprojmë me gjakftohtësi të madhe në interes të vendit. Kosova nuk guxon të humbas orientimin e saj dhe duhet t’i përgjigjemi me kujdes situatës, si dhe në të njëjtën kohë jam i bindur se ne do të dalim me të fortë nga kjo situatë. Kryeministri Rama u shpreh i gatshëm që të ofroi gjithë ndihmën e shtetit shqiptar në çdo proces nëpër të cilat mund të kaloj Kosova”, nënvizon ai./ CNA.al

LEXO TE PLOTE

Politikë

Hallet e biznesmenëve në Shëngjin/ Rama i “mjel” me taksë progresive, Basha do t’i “mjelë” me taksën e sheshtë

Publikuar

-

Nga

“Sezoni turistik i gjeti operatorët në kulmin e krizës”/ Basha tregon synimin e PD-së

Kryetari i Republikës së Re, Lulzim Basha, u takua me disa biznese në Shëngjin, të cilët iu ankuan se e kanë falimentimin në prag.

Basha deklaron se dyqanet bosh, hotelet bosh, lokalet bosh, janë treguesi i një krize të rëndë, që po përkthehet në largimin e njerëzve nga puna, veçanërisht në sektorin e turizmit.

“Shumë vështirë, shumë vështirë. Domethënë nuk e di. Ka rënë krejt. Deri tani që unë e kam mbajtur hapur, jam detyruar ti paguaj punëtorët nga xhepi. Llogarite domethënë sa dobët kemi qenë”, u shpreh njëri nga operatorët turistikë, i cili u pasua nga një tjetër i cili e parashikonte me pesimizëm të ardhmen. “Hajt, do ta shtyjmë edhe këto dy muaj, por nëse do vazhdojë kështu, në shtator ose do e lëshoj me qera ose ta mbyll komplet”, tha pronari i një hoteli.

Gjatë qëndrimit në Shëngjin, kreu i opozitës u takua me disa operatorë turistikë, të cilët treguan gjendjen e rëndë të turizmit dhe papunësinë në rritje, për shkak të mungesës së ndihmës nga qeveria dhe keqmenaxhimit të situatës së pandemisë.

“S’kanë me çfarë t’i paguajmë, se s’kanë lekë as njerëzit, a kupton. Shikoje s’ka, s’ka njerëz fare. S’kanë as lekë me paguajt. Shumë dobët këtë vit”- u shpreh njëri nga operatorët turistikë.

Pronari i një biznesi hotelerie u thotë se si shpresë të vetme shikonte turistët nga Kosova, pasi janë të vetmit që frekuentojnë këtë plazh dhe që japin frymën e mbijetesës për hoteleritë në këtë zonë. “Faleminderit vëllezërve nga Kosova që jemi në punë sot dhe Rrugës së Kombit që e ka sjellë turizmin në Shëngjin”, i tha ai zotit Basha, i cili pati rastin të shpjegonte ndryshimin mes tij dhe qeverisë aktuale në trajtimin e biznesit.

LEXO EDHE:  Reforma në Drejtësi/ Ambasada amerikane: Partitë të gjejnë marrëveshjen

LEXO EDHE:  Spiropali “sfidon” presidentin për dorëheqjen/ Nuk besoj që Meta të mbaj fjalën e dhënë

Lideri i opozitës mbështeti kërkesat e operatorëve turistikë për një paketë të veçantë për turizmin, i cili ka marrë një goditje të rëndë nga anulimet e rezervimeve. Basha tha se kjo është klima më e keqe e 30 viteve, pasi qeveria e sheh biznesin vetëm për ta mjelë dhe që kjo do  të ndryshojë shpejt. Ai u zotua se ky ndryshim do të vijë menjëherë me ardhjen e Partisë Demokratike në pushtet, me taksën e sheshtë që do të jetë 9%.

“Një nga faktorët kryesor që duhet të ndihmoheshin me paketat, të ashtuquajtura, se janë gjysëm paketa. Sa na përket ne si opozitë, ne kërkuam shumë më shumë, e ngritëm zërin që taksat tuaja të shkonin për të ndihmuar konsumatorët, të shkonin për të ndihmuar operatorët dhe në tërësi operatorët ekonomikë të vendit, por edhe ato gjysmë paketa që u hartuan me qëllim gjoja për të ndihmuar ata që janë goditur më rëndë, siç është  mes tyre industria e turizmit, nuk kanë  dhënë  asnjë efekt. Synimi ynë do të jetë që brenda një viti Shqipëria të jetë vendi me numrin më të ulët të lejeve dhe autorizimeve në Ballkan. Taksën e sheshtë 9%, kontributet shoqërore 18% dhe 2 masa që besoj, njëra është vendosur që është ulja e çmimit të naftës duke eleminuar taksën e qarkullimit të Ramës, që eshte 240 lekë për litër dhe kjo padiskutim që jep një efekt të jashtëzakonshëm lehtësues për ju dhe natyrisht do të shqyrtohet për bizneset prodhuese dhe për shtresat në nevojë”, Basha./ CNA.al

LEXO TE PLOTE